এগৰাকী মহিলা কনিষ্টবলে কৰা যৌন অত্যাচাৰৰ অভিযোগৰ ভিত্তিত চেণ্ট্ৰেল ৰিজাৰ্ভ পুলিচ ফৰ্চ, চমুকৈ চিআৰপিএফে এজন ডিআইজি পৰ্যায়ৰ আৰক্ষী বিষয়া আৰু এজন ইনস্পেক্টৰক তৎকালীনভাৱে নিলম্বন কৰিছে।
চিআৰপিএফে কৰা প্ৰাথমিক অনুসন্ধানত তেওঁলোক অপৰাধৰ প্ৰমাণ হোৱাৰ পাছতে এই সিদ্ধান্ত লোৱা হয়।
নিলম্বিত আৰক্ষী বিষয়া দুজন হৈছে ডিআইজি খজন সিং আৰু ইনস্পেক্টৰ সুৰজিত সিং।
অপৰাধটো সংঘটিত কৰাৰ সময়ত খজন সিঙে মুখ্য ক্ৰীড়া বিষয়া হিচাপে কাৰ্যনিৰ্বাহ কৰি থকাৰ বিপৰীতে সুৰজীত সিং আছিল দলৰ প্ৰশিক্ষক।
তেওঁলোকৰ বিৰুদ্ধে উত্থাপিত যৌন অত্যাচাৰৰ অভিযোগৰ তদন্ত কৰিবলৈ চিআৰপিএফে দুবাৰকৈ অনুসন্ধান কৰিছিল।
প্ৰথমতে হোৱা প্ৰাথমিক অনুসন্ধানত তেওঁলোক দোষী সাব্যষ্ট হয়।
দোষী সাব্যষ্ট হোৱাৰ পাছতে তেওঁলোকক নিলম্বন কৰা হয়।
ইয়াৰ পাছত পূৰ্ণ পৰ্যায়ৰ অনুসন্ধানতো তেওঁলোক দোষী সাব্যষ্ট হ’লে চাকৰিৰ পৰা বৰ্খাস্ত হ’ব পাৰে।
বিশ্বস্ত সূত্ৰই জনোৱামতে, ইনস্পেক্টৰ সুৰজিৎ সিঙক ১৯ মাৰ্চত নিলম্বিত কৰা হৈছিল।
আনহাতে, ডিআইজি খজন সিঙক কেন্দ্ৰীয় গৃহ মন্ত্ৰালয়ৰ পৰা অনুমতি পোৱাৰ পাছতে নিলম্বিত কৰা হয়।
তেওঁলোকৰ ওপৰত আৰোপিত যৌন অত্যাচাৰৰ অভিযোগটো পুৰণি।
আৰক্ষী বিভাগৰ বিভিন্ন শিতানত কেইবাটাও মেডেলপ্ৰাপ্ত এগৰাকী ৩০ বছৰীয়া মহিলা কনিষ্টবলে তেওঁলোকৰ ওপৰত ধৰ্ষণ আৰু যৌন অত্যাচাৰৰ অভিযোগ উত্থাপন কৰে।
তাৰপাছতে কনিষ্টবলগৰাকীয়ে দিল্লী আৰক্ষীৰ ওচৰত এখন এজাহাৰ দাখিল কৰে যে দুয়োজনে তেওঁৰ ওপৰত বিভিন্ন সময়ত যৌন অত্যাচাৰ কৰি আহিছে।
তেওঁ এজাহাৰ দাখিল কৰা বহু বছৰ পাৰ হৈ গৈছিল।
ইয়াৰ কাৰণ আছিল অভিযোগ অনুসৰি ডিআইজি খজন সিঙে চিআৰপিএফ আৰু কেন্দ্ৰীয় গৃহ মন্ত্ৰালয়ত প্ৰভাৱ বিস্তাৰ কৰি আহিছিল।
উল্লেখযোগ্য যে চিআৰপিএফৰ ডিআইজি খজন সিং এগৰাকী সাঁতোৰবিদো আছিল।
তেওঁ ১৯৮৬ চনত দক্ষিণ কোৰিয়াৰ ছিউলত অনুষ্ঠিত হোৱা এছিয়ান গেমছত ৰূপৰ পদক লাভ কৰিছিল।
তদুপৰি তেওঁক ভাৰত চৰকাৰে অৰ্জুন বঁটাৰেও সন্মানিত কৰিছিল।
কনিষ্টবলগৰাকীৰ অভিযোগনামাত উল্লেখ আছে যে ২০১৪ চনৰ ৩১ অক্টোবৰৰ পৰা ২ নৱেম্বৰলৈকে তাইক দিল্লীৰ বসন্ত কুঞ্জৰ এটা ফ্লেটলৈ লৈ যোৱা হৈছিল আৰু তাত খজন সিং আৰু সুৰজিৎ সিঙে একলগে তাইক তিনি দিন ধৰি ধৰ্ষণ কাৰ্য চলাইছিল।
তদুপৰি ২০১৪ চনৰ ১ নৱেম্বৰত সুৰজিৎ সিঙে অকলে তাইক ধৰ্ষণ কৰা বুলিও অভিযোগ নামাত উল্লেখ কৰে।
২০১৮ চনত কনিষ্টবলগৰাকীয়ে কৈছিল যে তাই ৰাষ্ট্ৰীয় মহিলা আয়োগ, তদানীন্তন চিআৰপিএফ ডিজি ৰাজীৱ ভাটনাগৰ আৰু কেন্দ্ৰীয় গৃহ সচিব ৰাজীৱ গৌবালৈ তেওঁৰ অভিযোগ সম্পৰ্কে পত্ৰ প্ৰেৰণ কৰিছিল।
