ৰোহিত শৰ্মাৰ দৰে অধিনায়কত্বৰ পৰা অপসাৰণ নহয়। চেন্নাই ছুপাৰ কিংছ ফ্ৰেঞ্চাইজিয়ে দলটোৰ আই পি এলৰ অধিনায়ক মহেন্দ্ৰ সিং ধোনীৰ ভৱিষ্যৎ নিজৰ হাতত এৰি দিছে। মুম্বাই ইণ্ডিয়ানছে অধিনায়ক পদৰ পৰা আঁতৰাই দিছে ৰোহিতক। অৱশ্যে চি এছ কেয়ে নিজৰ অধিনায়কৰ সন্দৰ্ভত সেই পথ অনুসৰণ কৰিবলৈ অনিচ্ছুক। এই সন্দৰ্ভত সাংবাদিকসকলৰ প্ৰশ্নৰ উত্তৰত চি এছ কে কৰ্তা তথা মুখ্য কাৰ্যবাহী বিষয়া কাশী বিশ্বনাথনে স্পষ্ট কৰি দিয়ে।
আই পি এল ২০২৪লৈ এতিয়াও কেইমাহমান বাকী। নিলাম শেষ হ’ল মাত্ৰ। বিশ্বনাথনক সোধা হৈছিল, চেন্নাই আৰু আই পি এলত এইটোৱেই হ’ব নেকি ধোনীৰ শেষ ছিজন? ইয়াৰ উত্তৰত বিশ্বনাথনে ধোনীৰ ক’ৰ্টত বলটো ঠেলি দিয়ে।
চেন্নাইত অনুষ্ঠিত জুনিয়ৰ ছুপাৰ কিংছ ইভেণ্টৰ মুকলি সভাত তেওঁ কয়, “মই সেইটো নাজানো। চাওক, এই বিষয়ে আপোনালোকে অধিনায়কৰ পৰাই পোনপটীয়াকৈ জানি লব পাৰে। তেওঁ কি কৰিবলৈ ওলাইছে সেয়া আমাৰ লগত আলোচনা নকৰে।‘’
ধোনীৰ ফিটনেছৰ সম্পৰ্কত বিশ্বনাথনে কয়, ‘তেওঁতো বেছ ফিট ৷ ফিটনেছ লেভেল বৃদ্ধি কৰিবলৈ জিমলৈ গৈছে। হয়তো আৰু ১০ দিনৰ পাছত নেটতো নামিব।”
লগতে পঢ়কঃ বেংকত পৰি আছে দাবীহীন ৪২,২৭০ কোটি টকা; চাই লওক আপোনাৰো আছে নেকি!
চলিত বৰ্ষৰ আৰম্ভণিতে চেন্নাই ছুপাৰ কিংছক পঞ্চমবাৰৰ বাবে আই পি এল খিতাপ দখল কৰাত সহায় কৰাৰ পিছত জুন মাহত মুম্বাইৰ এখন চিকিৎসালয়ত বাওঁ আঁঠুৰ অস্ত্ৰোপচাৰ সফলতাৰে সম্পন্ন হয় ধোনীৰ। বিশ্বনাথনে কয় যে অহা বছৰৰ মাৰ্চ মাহৰ প্ৰথম সপ্তাহৰ পৰা চেন্নাইত চি এছ কেৰ প্ৰস্তুতি আৰম্ভ হ’ব।
অহা বছৰ লোকসভা নিৰ্বাচন। আন কোনো দেশত IPL অনুষ্ঠিত কৰিব পাৰে। তেনেকুৱাই শুনা গৈছে। চি এছ কেৰ মুৰব্বীগৰাকীক সেই বিষয়ে সোধাত তেওঁ কয়, “মই এতিয়াও এই বিষয়ে একো নাজানো।ফ্ৰেঞ্চাইজিক এতিয়াও অৱগত কৰা হোৱা নাই। নিলামৰ সময়ত মাথোঁ কোৱা হৈছিল ভাৰতত খেলিবলৈ সাজু হোৱা। সেইটোৱেই শুনিলোঁ। আন দেশত কিছুমান মেচ অনুষ্ঠিত হ’ব নেকি নাজানো।”
শেহতীয়াকৈ সমাপ্ত হোৱা আই পি এলৰ নিলামত চি এছ কেই ছয়গৰাকী খেলুৱৈ লৈছে – শাৰ্দুল ঠাকুৰ (৪ কোটি টকা), ৰাচিন ৰবীন্দ্ৰ (১.৮ কোটি টকা), ডেৰিল মিচেল (১৪ কোটি টকা), সমীৰ ৰিজৱী (৮.৪ কোটি টকা), মুস্তাফিজুৰ ৰহমান (২ কোটি টকা) আৰু অভনীশ ৰাও আৰেভেলী (২০ লাখ টকা)।
লগতে পঢ়কঃ মাইক্ৰ’ছফটে আৰু ‘ছাপোৰ্ট’ নকৰিব উইণ্ড’জ ১০; আৱৰ্জনাত পৰিণত হ’ব ২৪ কোটি কম্পিউটাৰ!
এই সন্দৰ্ভত হালধীয়া ব্ৰিগেডৰ নেতাগৰাকীয়ে কয়,“ আমি এটা লক্ষ্য লৈ আগবাঢ়িছিলোঁ। সেয়া পূৰণ হৈছে। আমি ডেৰিল মিচেলক বিচাৰিছিলো। আমাৰ চিপেকৰ উইকেটত চাইড বাউণ্ডেৰীৰ বাবে মুস্তাফিজুৰ ৰহমানক বিচাৰিছিল। সেই অনুসৰি পাইছো। পাম নে নাপাম চিন্তিত হৈ পৰিছিলো। কিন্তু, শেষত আমি বিচৰা সকলোখিনি পালোঁ। হয়তো, এইটোৱেই আছিল আমাৰ এতিয়ালৈকে সৰ্বশ্ৰেষ্ঠ নিলাম।‘’
উদীয়মান প্ৰতিভা সমীৰ ৰিজৱীক লৈ কাশী বিশ্বনাথনে কয়, “সমীৰ ৰিজৱীক বহুতে বিচাৰিছিল। আমাৰ ভাগ্য ভাল ৰিজভিক পালো। আমি আচলতে বিচাৰিছিলো অম্বতি ৰায়ুডুৰ ঠাইত কোনোবা এজনক। আমাৰ সেই ধৰণৰ অভিজ্ঞতা থকা খেলুৱৈ নাছিল। গতিকে, প্ৰতিশ্ৰুতিসম্পন্ন কোনোবা এজনক বাছি লোৱাৰ কথা ভাবিলোঁ। যোৱা বছৰ আমি পাইছিলোঁ শইক ৰছিদ, নিশান্ত সিন্ধু আৰু ৰাজবৰ্ধন হাংগেকাৰক। আমি আচলতে ভৱিষ্যতৰ বাবেও দল গঢ়ি তুলিবলৈ চেষ্টা কৰিছো। পিছত আমাৰ বাবে উপযোগী হ’ব।‘’
