নগাঁও জিলাৰ জুৰীয়া থানাৰ অন্তৰ্গত ধিং গাঁও নিবাসী আব্দুল জব্বাৰৰ পুত্ৰ তথা চাপৰমুখ গাঁও পঞ্চায়তৰ সচিব মহিবুৰ ৰহমান (৪৭)ৰ মৃতদেহ আজি ৰহস্যজনকভাৱে চাপৰমুখ আৰক্ষী থানাৰ অন্তৰ্গত কপিলী নৈৰ মাৰোৱাৰী পট্টীৰ পাৰঘাটত উদ্ধাৰ হয়।
উল্লেখযোগ্য যে সচিব মহিবুৰ ৰহমান দীৰ্ঘদিন ধৰি নগাঁও চহৰৰ নিকটৱৰ্তী কাতিমাৰী গ্ৰাণ্টত পৰিয়ালসহ বসবাস কৰি আহিছিল যদিও যোৱা ৭ অক্টোবৰৰ দিনা বিয়লি কাতিমাৰীৰ নিজ গৃহৰ পৰা বজাৰ কৰিবলৈ নগাঁও চহৰলৈ যোৱাৰ পিছৰে পৰা সন্ধানহীন হৈ আছিল।
ইয়াৰ পিছতে দুটি সন্তানৰ পিতৃ মহিবুৰ ৰহমানক পৰিয়ালৰ লোকে বিভিন্ন ঠাইত বিচাৰ-খোচাৰ কৰিছিল যদিও কোনো শুংসূত্ৰ পোৱা নাছিল। আনহাতে আজি ৰহস্যজনকভাৱে মহিবুৰৰ মৃতদেহ ৰহস্যজনকভাৱে উদ্ধাৰ হোৱাত পৰিয়ালৰ লোক সকল হতভম্ব হৈ পৰিছে।
প্ৰাপ্ত তথ্য মতে স্থানীয় লোকে আজি দুপৰীয়া প্ৰায় ১২ বজাত মৃতদেহটো প্ৰত্যক্ষ কৰি স্থানীয় আৰক্ষীক খবৰ দিয়াত আৰক্ষীয়ে আহি মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে।
পৰিয়ালৰ লোকে সচিব মহিবুৰ ৰহমানক কোনো দুৰ্বৃত্তই পৰিকল্পিতভাৱে হানি-খুঁচি হত্যাৰ কৰিছে বুলি সন্দেহ প্ৰকাস কৰিছে। লগতে সচিব মহিবুৰ ৰহমানৰ এনে অকাল মৃত্যুত অঞ্চলজুৰি গভীৰ শোকৰ ছাঁ বিয়পি পৰিছে।