হাস্পতালত ভৰ্তি হোৱাৰ পিছতো কেৱল অক্সিজেনৰ অভাৱত মৃত্যু হোৱা কোভিড ৰোগীসকলক প্ৰকৃততে গণহত্যা কৰা হৈছে। এইদৰে উত্তৰ প্ৰদেশৰ মুখ্যমন্ত্ৰী যোগী আদিত্যনাথক কঠোৰভাৱে ভৎসৰ্না কৰিছে এলাহাবাদ উচ্চ ন্যায়ালয়ে।
উল্লেখ্য যে লক্ষ্মৌ আৰু মীৰাটত অক্সিজেনৰ অভাৱত কোভিড ৰোগীৰ মৃত্যু হোৱাৰ খবৰ চ’ছিয়েল মিডিয়াত ভাইৰেল হোৱাৰ লগে লগে উত্তৰ প্ৰদেশৰ লগতে সমগ্ৰ দেশতে বিষয়টোৱে চৰ্চা লাভ কৰিছে।
ইয়াৰ পিছতো উত্তৰ প্ৰদেশ মুখ্যমন্ত্ৰী যোগী আদিত্যনাথে ৰাজ্যখনত অক্সিজেনৰ লগতে কোনো ধৰণৰ ঔষধপাতিৰ আৰু চিকিৎসালয়ত বিচনাৰ নাটনি হোৱা নাই বুলি দম্ভালি মাৰি আহিছে। যোগীৰ মতে এয়া ভিত্তিহীন অভিযোগহে।
মুখ্যমন্ত্ৰী যোগীৰ এই দম্ভালিৰ পিছতে এলাহাবাদ উচ্চ ন্যায়ালয়ত এখন ৰাজহুৱা স্বাৰ্থজড়িত আবেদন দাখিল কৰা হয়। এলাহাবাদ উচ্চ ন্যায়ালয়ে এই আবেদনৰ শুনানি গ্ৰহণ কৰি মুখ্যমন্ত্ৰী যোগীক কঠোৰভাৱে ভৎসৰ্না কৰাৰ লগতে এই ধৰণৰ ঘটনাক আইনী অপৰাধ বুলিও মন্তব্য কৰিছে।
মংগলবাৰে ন্যায়াধীশ সিদ্ধাৰ্থ ভাৰ্মা আৰু ন্যায়াধীশ অজিত কুমাৰ বিচাৰপীঠতে এই আবেদনৰ শুনানি গ্ৰহণ কৰি সমগ্ৰ ঘটনাক্ৰমৰ তদন্তৰো নিৰ্দেশ দিছে।
“আমি অতি দুখেৰে লক্ষ্য কৰিছো যে কেনেকৈ হাস্পতালত অক্সিজেনৰ অভাৱত কোভিড ৰোগীৰ মৃত্যু হৈছে। ই আইনী অপৰাধ আৰু গণহত্যাতকৈ ই কোনোগুণে কম নহয়।” আদালতে কয়।
আদালতে আগন্তুক ৪৮ ঘণ্টাৰ ভিতৰত লক্ষ্মৌ আৰু মীৰাটত অক্সিজেনৰ অভাৱত কোভিড ৰোগীৰ মৃত্যু হোৱা ঘটনাৰ তদন্ত সম্পূৰ্ণ কৰি প্ৰতিবেদন জমা দিবলৈও নিৰ্দেশ দিছে।
