বৰষুণৰ ধুমুহাৰ ফলত প্ৰায় বিধ্বস্ত হৈ পৰিছে হিমাচল প্ৰদেশ। এই পৰ্যন্ত কমেও ১৪ জন লোকৰ মৃত্যু হোৱা বুলি জানিব পৰা গৈছে। ৰাজ্যিক জৰুৰীকালীন অভিযান কেন্দ্ৰৰ তথ্য অনুসৰি ধাৰাসাৰ বৰষুণ, বিধ্বংসী বান আৰু একেৰাহে ভূমিস্খলনৰ ফলত ১৪ জন লোকৰ মৃত্যু হৈছে।
হিমাচল প্ৰদেশত যোৱা কেইদিনমানৰ পৰা ডাৱৰ বিস্ফোৰণৰ বাবে হোৱা বৰষুণ আৰু বানপানীৰ ফলত প্ৰায় ১৬ কোটি টকাৰ সম্পত্তি ধ্বংস হৈছে। দুৰ্যোগৰ বাবে বহু অঞ্চলত বিদ্যুৎ আৰু পানী যোগান ব্যৱস্থা ব্যাহত হৈ পৰিছে। পৰিস্থিতি নিয়ন্ত্রণ কৰিবলৈ উদ্ধাৰকাৰী দলে যুদ্ধকালীনভাৱে উদ্ধাৰ অভিযান চলাইছে৷
সূত্ৰ অনুসৰি, শুকুৰবাৰে হোৱা প্ৰচণ্ড বৰষুণৰ বাবে কিন্নাউৰৰ চোলিং অঞ্চলত ভূমিস্খলন সংঘটিত হয়। যাৰ বাবে শিমলা-ৰেকং পি অ’ ৰাষ্ট্ৰীয় ঘাইপথ সাময়িকভাৱে বন্ধ হৈ পৰে। ধ্বংসাৱশেষ আঁতৰোৱাৰ পিছতে পথটো মুকলি কৰি দিয়া হয়।
বাতৰি অনুসৰি ভূমিস্খলনৰ সময়ত সেই পথেৰে দুখন বাহন পাৰ হৈ আছিল। কিন্তু চালকৰ তৎপৰতাৰ বাবেই এক বৃহৎ দুৰ্ঘটনা ৰোধ সম্ভৱ হয়। আনহাতে, ৰিব্বা অঞ্চলত বিধ্বংসী বানৰ বাবে ৰিব্বা-কাণ্ডে সংযোগী পথটোও আপাততঃ যাতায়তৰ বাবে বন্ধ হৈ আছে।
বৰ্তমানলৈকে চলিত বতৰৰ ধুমুহাৰ ফলত হিমাচল প্ৰদেশত ৪৯টা পথ আৰু ৩টা ট্ৰেন্সফৰ্মাৰ ক্ষতিগ্ৰস্ত হৈছে। যোৱা তিনিদিনত তাত ৩০.৯ মিলিমিটাৰ বৰষুণ হোৱা বুলি জানিব পৰা গৈছে, যিটো স্বাভাৱিকতকৈ ১০৬ শতাংশ বেছি। কিন্নৌৰ জিলাত তিনিদিনত ১৮.৩ মিলিমিটাৰ বৰষুণ হৈছে, যিটো স্বাভাৱিকতকৈ ৪২৩ শতাংশ বেছি। লাহাউল, স্পিটিকে ধৰি হিমাচলৰ কেইবাখনো জিলাত স্বাভাৱিকতকৈ বহু বেছি বৰষুণ হৈছে।
ভাৰতীয় বতৰ বিভাগে হিমাচলত ১২ জুলাইলৈকে প্ৰবলৰ পৰা অতি প্ৰবল বৰষুণৰ সতৰ্কবাণী দিছে। তাত ইতিমধ্যে প্ৰচণ্ড বৰষুণৰ কমলা আৰু হালধীয়া সতৰ্কবাণী জাৰি কৰা হৈছে। যাৰ বাবে স্থানীয় লোকসকলক বিশেষ সাৱধান হ’বলৈ পৰামৰ্শ দিয়া হৈছে।
