সদ্যসমাপ্ত উত্তৰ কাছাৰ পাৰ্বত্য স্বায়ত্তশাসিত পৰিষদ নিৰ্বাচনত একক সংখ্যাগৰিষ্ঠতা লাভ কৰা ভাৰতীয় জনতা পাৰ্টিৰ দেৱলাল গাৰ্লোছাক ১২ সংখ্যক স্বায়ত্তশাসিত পৰিষদখনৰ মুখ্য কাৰ্যবাহী সদস্য ৰূপে নিযুক্তি দিয়া হৈছে। ৰাজভৱনৰ পৰা জাৰি কৰা নিৰ্দেশনা মৰ্মে গাৰ্লোছাক নিযুক্তি দিয়া হয়।
ইয়াৰ পূৰ্বেও গাৰ্লোছা ১১ সংখ্যক পৰিষদৰ মুখ্য কাৰ্যবাহী সদস্য হিচাপে পাঁচ বছৰ কাৰ্যভাৰ চলাইছিল। গাৰ্লোছাই ১৯ নং দেহাংগী সমষ্টিৰ পৰা প্ৰতিদন্দ্বিতা আগ বঢ়াই বিজয়ী হৈছিল।
মুঠ ২৮টা সমষ্টিযুক্ত স্বায়ত্তশাসিত পৰিষদখনৰ সাধাৰণ নিৰ্বাচন বিগত ১৯ জানুৱাৰিত অনুষ্ঠিত হৈছিল। ২২ জানুৱাৰিত ফলাফল ঘোষণা কৰা নিৰ্বাচনত বিজেপিয়ে অভূতপূৰ্ব সফলতা দেখুৱাইছিল।
পৰিষদখনৰ নিৰ্বাচনত কংগ্ৰেছে মাত্ৰ ২খন আৰু অগপই ১খন মাত্ৰ আসন পায়। দুয়োটা দলে পোৱা আসনৰ যোগফল নিৰ্দলীয়ই পোৱা আসনতকৈ কম। মুঠ ৬জন নিৰ্দলীয় প্ৰাৰ্থী জয়ী হয় পৰিষদলৈ।
