অসম চৰকাৰে “অমৃত বৃক্ষ আন্দোলন”ৰ অধীনত ৰাজ্যজুৰি ১ কোটি গছপুলি ৰোপণৰ পদক্ষেপ গ্ৰহণ কৰাৰ সময়তে, ডিব্ৰুগড় জিলাৰ কেইবাখনো মূল্যৱান বনাঞ্চল ধ্বংস হোৱাৰ প্ৰকৃত তথ্যই উদ্বেগৰ সৃষ্টি কৰিছে। নামৰূপৰ অভয়পুৰ গাঁৱত ২৫ একৰ মাটিত ১ ঘণ্টাত ৩.৫ লাখ গছপুলি ৰোপণ কৰি বিশ্ব অভিলেখ গঢ়াৰ বিপৰিতে এতিয়া বাস্তৱত অন্য এখন ছবিহে পোহৰলৈ আহিছে।
জৈৱ-বৈচিত্ৰ্যৰে সমৃদ্ধ ডিব্ৰুগড় জিলাৰ উল্লেখযোগ্য বনাঞ্চলসমূহৰ ভিতৰত অন্যতম খোৱাংৰ তিনঠেঙীয়া বনাঞ্চল, যাক নামদাং বনাঞ্চল নামেও জনা যায়। এই বনাঞ্চলখন এতিয়া টিংখাঙ সমষ্টিৰ অন্তৰ্গত বনদস্যুসকলৰ মুক্ত বিচৰণস্থলত পৰিণত হৈছে। গছ কাটি মূল্যৱান কাঠৰ চোৰাং ব্যৱসায় চলাই বনাঞ্চলখনক এক ধ্বংসাত্মক প্ৰকল্পৰ ৰূপত পৰিণত কৰিছে।
বিয়াগোম বন বিভাগৰ অধীনত থকা সত্ত্বেও, বন বিষয়াৰ উপস্থিতিত দিন-দুপৰতে বনাঞ্চলৰ মূল্যৱান গছ নিঃশেষ কৰি থকা দৃশ্যই অঞ্চলটোৰ সচেতন ৰাইজৰ মাজত গভীৰ ক্ষোভৰ সঞ্চাৰ কৰিছে। স্থানীয় ৰাইজ, সংগঠনে মিলি প্ৰতিবাদ কৰি অহিছে যদিও বন বিভাগে আজিও কোনো গঠনমূলক পদক্ষেপ গ্ৰহণ কৰা নাই।
২৩১.৭ বৰ্গ কিলোমিটাৰৰ এই বিস্তীৰ্ণ বনাঞ্চলৰ চাৰিসীমা সম্পূৰ্ণৰূপে উন্মুক্ত হৈ থকাৰ বাবে একাংশ লোকৰ বাবে অবাধ দখল আৰু বন উজাৰি দিয়াৰ সুযোগ সৃষ্টি কৰিছে। গছ কাটি বনাঞ্চল উজাৰি বনভূমি সংকুচিত কৰাৰ লগতে এই অঞ্চলৰ জৈৱ-বৈচিত্ৰ্যৰ ওপৰতো আঘাত কৰিছে।
অঞ্চলটোৰ ৰাইজৰ মতে, খোদ ৰাজ্য চৰকাৰৰ মন্ত্ৰী বিমল বৰাৰ সমষ্টিত থকা এই বনাঞ্চল সংৰক্ষণৰ ক্ষেত্ৰত বন বিভাগৰ নিস্ক্ৰিয়তা অত্যন্ত দু:খজনক। সচেতন ৰাইজে গভীৰ উদ্বেগ প্ৰকাশ কৰি কয় যে, চৰকাৰ, বন বিভাগ আৰু প্ৰশাসনৰ উপেক্ষাই বনাঞ্চলখনৰ ধ্বংস নিশ্চিত কৰিছে।
