১০ গৰাকীকৈ ডিগ্ৰীহীন হোমিঅ’পেথিক ‘চিকিৎসক’এ ৰোগীক সেৱা আগবঢ়াই আছে শিৱসাগৰ চহৰৰ লগতে সমগ্ৰ জিলাখনত।
খোদ জিলা স্বাস্থ্য বিভাগে দিয়া আৰ টি আইৰ তথ্যতে পোহৰলৈ আহিছে এই ভয়ংকৰ তথ্য। স্বাস্থ্য বিভাগৰ হাতত এই ১০ গৰাকী চিকিৎসকৰ কোনো তথ্য নাই, কিন্তু ব্যৱস্থা গ্ৰহণৰ প্ৰয়োজনীয়তাও বিভাগটোৱে আজি পৰ্য্যন্ত উপলব্ধি কৰা নাই।
আৰ টি আইৰ তথ্য মতে বৰ্তমান শিৱসাগৰত ২৪ জন হেমিঅ’পেথিক চিকিৎসকে শিৱসাগৰ পৌৰসভা এলেকাৰ ভিতৰত আৰু বাহিৰত চে’ম্বাৰত চিকিৎসা আগবঢ়াই আছে।
হোমিঅ’ চিকিৎসকক চিকিৎসা সেৱাৰ বাবে প্ৰয়োজন ক্নিনিকেল এষ্টাব্লিচমেণ্ট চাৰ্টিফিকেটৰ। কিন্তু সূত্ৰ মতে কোনোবা হেমিঅ’ চিকিৎসকৰ চে’ম্বাৰ বা কোনো প্ৰতিষ্ঠানত ৩ মহীয়া পাঠ্যক্ৰম চিকিৎসক হৈছে এইসকল।
অনলাইনযোগে এই চাৰ্টিফিকে’টৰ আবেদন কৰিবলৈ প্ৰয়োজন হোৱা “চে’ণ্ট্ৰেল কাউঞ্চিল ফৰ হেমিঅ’পেথি”ৰ অনুমোদিত কলেজ বা প্ৰতিষ্ঠানত গ্ৰহণ কৰা ডিগ্ৰীৰ প্ৰমাণ পত্ৰৰ লগতে ৰাজ্য চৰকাৰৰ স্বাস্থ্য শিক্ষা সঞ্চালকালয়ৰ পঞ্জীয়ন নম্বৰো নাই এইসকল চিকিৎসকৰ।
তাৰোপৰি হোমিঅ’পেথি অধ্যয়নৰ বাবে পদাৰ্থ বিজ্ঞান, জীৱ বিজ্ঞান, ৰাসায়ন বিজ্ঞান আৰু ইংৰাজীক বিষয় হিচাপে লৈ উচ্চতৰ মাধ্যমিক বিজ্ঞান শাখাত অধ্যয়ন কৰা বাধ্যতামূলক। কিন্তু শিৱসাগৰত চে’ম্বাৰ খুলি বহি থকা বহুকেইজন ‘চিকিৎসকে’ বিজ্ঞান শাখাত অধ্যয়নেই কৰা নাছিল।
আছু, আটাছু, আহোম সেনা, বৃহত্তৰ অসমীয়া যুৱ মঞ্চ, ঐক্য সেনাকে ধৰি ১০টা সংগঠনে এই ভুৱা চিকিৎসকসকলক গ্ৰেপ্তাৰ কৰাৰ লগতে তৎকালে তেওঁলোকৰ চে’ম্বাৰ বন্ধ কৰিবলৈ দাবী উত্থাপন কৰাৰ পাছতো কোনো ব্যৱস্থা লোৱা নাই প্ৰশাসন তথা স্বাস্থ্য বিভাগে।