নিৰ্বাচনৰ সময়ত পশ্চিমবংগত ৯০ লাখ ভোটাৰৰ নাম তালিকাৰ পৰা কৰ্তন কৰা বিষয়টোৱে এতিয়া তীব্ৰ চৰ্চা লাভ কৰিছে। এইবাৰৰ বিধানসভা নিৰ্বাচনত মমতা বেনার্জীৰ নেতৃত্বত চলি থকা ১৫ বছৰীয়া তৃণমূল চৰকাৰৰ পতন ঘটিছে আৰু বিজেপি ক্ষমতায়নলৈ আহিছে। নিৰ্বাচন আয়োগে মৃত আৰু ভুৱা ভোটাৰৰ নাম আঁতৰাবলৈ যি বিশেষ সংশোধনী প্রক্রিয়া চলাইছিল, তাৰ জৰিয়তে শেষ মুহূর্তত প্রায় ৯০ লাখ লোকৰ নাম বাদ দিয়া হৈছিল। তৃণমূল কংগ্ৰেছে আৰম্ভণিৰ পৰাই এই প্রক্রিয়াক পক্ষপাতদুষ্ট বুলি অভিযোগ কৰি আহিছিল।
তথ্য অনুসৰি ৰাজ্যখনৰ প্ৰায় ৫০খন আসনত নিৰ্বাচন আয়োগে অযোগ্য ঘোষণা কৰা ভোটাৰৰ সংখ্যা জয়ৰ ব্যৱধানতকৈ বহুত বেছি আছিল। আনকি যিবোৰ ভোটাৰৰ তথ্য এতিয়াও পৰীক্ষা চলি আছে, সেই সংখ্যাও এই আসনবোৰত থকা জয়ৰ পাৰ্থক্যতকৈ বেছি। ২৫ হাজাৰতকৈ অধিক ভোটাৰৰ নাম বাদ পৰা ১৪৭খন আসনৰ ভিতৰত ৯৫খনতে বিজেপি জয়ী হৈছে। আনহাতে তৃণমূল কংগ্ৰেছে তেনেকুৱা আসনৰ ভিতৰত মাত্র ৫১খনতহে জয় লাভ কৰিবলৈ সক্ষম হৈছে।
যিবোৰ আসনত ১৫ হাজাৰৰ পৰা ২৫ হাজাৰ পৰ্যন্ত ভোটাৰৰ নাম বাদ পৰিছিল, তেনে ৬৭খন আসনৰ ভিতৰত ৪৭খনতে বিজেপি জিকিছে। ৫ হাজাৰৰ পৰা ১৫ হাজাৰ ভোটাৰৰ নাম কৰ্তন হোৱা ৬২খন আসনৰ ভিতৰত ৫০খনতে বিজেপি ফুলিছে। আনকি ৫ হাজাৰতকৈ কম নাম বাদ পৰা ১৩খন আসনৰ আটাইকেইখনতে বিজেপিৰ প্রার্থী জয়ী হৈছে। এই পৰিসংখ্যাই স্পষ্ট কৰি দিছে যে ভোটাৰ তালিকাৰ পৰা নাম কৰ্তন কৰা বিষয়টোৱে নিৰ্বাচনৰ ফলাফলত এক ডাঙৰ ভূমিকা লৈছে।
জিলা ভিত্তিত চালে দেখা যায় যে মুৰ্ছিদাবাদত আটাইতকৈ বেছি ভোটাৰৰ নাম কৰ্তন কৰা হৈছে। তাত ৪ লাখ ৫৫ হাজাৰৰো অধিক ভোটাৰৰ নাম কৰ্তন কৰা হৈছে। ইয়াৰ পিছতে আছে উত্তৰ ২৪ পৰগনা আৰু মালদহ জিলা। ২০২১ চনৰ নিৰ্বাচনত মুৰ্ছিদাবাদৰ ২২খন আসনৰ ২০খনতে তৃণমূল জিকিছিল, কিন্তু এইবাৰ তেওঁলোকৰ আসন মাত্ৰ ৯খনলৈ হ্ৰাস পাইছে। উত্তৰ ২৪ পৰগনা জিলাতো তৃণমূলৰ আসন ২৮খনৰ পৰা কমি এইবাৰ ৮খন হৈছে। বেছিভাগ আসনতে বিজেপিৰ জয় যাত্ৰা দেখা গৈছে।
ভোটাৰ তালিকাৰ পৰা নাম বাদ পৰাৰ প্ৰভাৱ কেইখনমান আসনত অতি স্পষ্টকৈ দেখা গৈছে। দক্ষিণ বংগৰ চাঁপদানি সমষ্টিত বিজেপিৰ দিলীপ সিংহে মাত্র ১৩টা ভোটত জয়ী হৈছে, কিন্তু সেই আসনখনত ৭ হাজাৰ ৬০০তকৈ অধিক ভোটাৰৰ নাম বাদ পৰিছিল। কৰণদিঘি আসনতো বিজেপিৰ বিৰাজ বিশ্বাসে ১৯ হাজাৰ ভোটৰ ব্যৱধানত জিকিছে যদিও তাত ৩১ হাজাৰৰো অধিক ভোটাৰৰ নাম অযোগ্য বুলি ধৰা হৈছিল। জংগীপুৰতো একেই অৱস্থা দেখা গৈছে য’ত জয়ৰ ব্যৱধানতকৈ বাদ পৰা ভোটাৰৰ সংখ্যা বহুত বেছি।
আনকি উত্তৰ বংগৰ দিনহাটাৰ পৰা দাৰ্জিলিং লৈকে সকলোতে একেই ছবি দেখা গৈছে। বালি সমষ্টিত জয়ৰ ব্যৱধান ৪ হাজাৰ ৬০০ হ’লেও তাত ১১ হাজাৰৰো অধিক ভোটাৰৰ নাম পৰীক্ষাৰ অধীনত আছিল। তৃণমূল কংগ্ৰেছ জিকি অহা লালগোলা বা সুতিৰ দৰে সমষ্টিতো হাজাৰ হাজাৰ ভোটাৰৰ নাম বাদ পৰাৰ ঘটনা ঘটিছে। লালগোলাত ১৯ হাজাৰ ভোটৰ ব্যবধানত তৃণমূল জিকিছে যদিও তাত ৫৫ হাজাৰতকৈ অধিক নামৰ পৰীক্ষা এতিয়াও শেষ হোৱা নাই। এই সকলোবোৰ তথ্যই ইংগিত দিয়ে যে ভোটাৰ তালিকাৰ পৰা বৃহৎ সংখ্যক নাম বাদ পৰা বিষয়টোৱে পশ্চিমবংগৰ ৰাজনৈতিক দৃশ্যপট সলনি কৰি দিছে।
