গেছ চেম্বাৰত পৰিণত হৈছে ৰাজধানী দিল্লী। ‘চৰম’ স্তৰত উপনীত হৈছে বায়ুৰ গুণাগুণ সূচকাংক। এই ভয়াৱহ পৰিস্থিতিত দিল্লী চৰকাৰে ব্যৱস্থা গ্ৰহণ কৰিছে।
দিল্লীৰ চৰকাৰী কাৰ্যালয়ৰ ৫০ শতাংশ কৰ্মচাৰীক ঘৰৰ পৰাই কাম কৰিবলৈ নিৰ্দেশ দিছে দিল্লী চৰকাৰে। বাকী ৫০ শতাংশ শ্ৰমিক আহিব লাগিব কাৰ্যালয়লৈ। দিল্লীৰ পৰিৱেশ মন্ত্ৰী গোপাল ৰয়ে এই কথা ঘোষণা কৰিছে।
ইফালে মঙলবাৰৰ তুলনাত বুধবাৰে প্ৰদূষণৰ প্ৰভাৱ কিছু হ্ৰাস পালেও দিল্লীৰ পৰিস্থিতি এতিয়াও যথেষ্ট আতংকজনক।
বুধবাৰে পুৱা ৬ বজাৰ ভিতৰত ৪৫০ বজাত দেখা গ’ল AQI। দিল্লীৰ মুণ্ডকাৰ (৪৬৪)ক আটাইতকৈ প্ৰদূষিত অঞ্চল হিচাপে ঘোষণা কৰা হৈছে।
লগতে বাৰিজপুৰ আৰু আলিপুৰত ৪৬২ AQI ৰেকৰ্ড কৰা হৈছে। প্ৰদূষণৰ বাবে সমগ্ৰ দিল্লী ধোঁৱাই আৱৰি ধৰিছে।
পৰিস্থিতি ইমানেই বেয়া হৈ পৰিছে যে ৭৯খন বিমানে পলমকৈ উৰা মাৰিব লগা হৈছে। বাতিল কৰা হৈছে ৬ খন বিমান। দেৰিকৈ চলি আছে ৰে’ল।
এনে পৰিস্থিতিত চৰকাৰে প্ৰদূষণ ৰোধৰ বাবে সকলো কৰিবৰ চেষ্টা কৰিছে। দ্বাদশ শ্ৰেণীলৈকে বিদ্যালয় বন্ধ দিয়া হৈছে।
ডিজেল চালিত বাহনৰ ওপৰত নিষেধাজ্ঞা আৰোপ কৰা হৈছে।
ইতিমধ্যে দিল্লীৰ ৫৭৫টা ব্যক্তিগত খণ্ডৰ সংস্থাই নিজৰ কৰ্মচাৰীসকলক ঘৰৰ পৰাই কাম কৰিবলৈ নিৰ্দেশ দিছে।
