দেশৰ ৰাজধানী দিল্লীৰ ক্ৰীড়া মন্ত্ৰ্যালয়টো ভালদৰে চোৱা চিতা কৰিবলৈ ৰাজ্যখনৰ মুখ্য মন্ত্ৰী অৰবিন্দ কেজৰিৱালক টুইটযোগে অনুৰোধ জনাইছে দেশৰ ক্ৰীড়া আৰু যুৱ কল্যাণ মন্ত্ৰী কিৰেন ৰিজিজুৱে।
‘অৰবিন্দ কেজৰিৱালজি হয়তো ৰাজনীতিৰ কাম-কাজত ব্যস্ত হৈ আছে কিন্তু ক্ৰীড়া মন্ত্ৰ্যালয়টো ভালদৰে চোৱাচিতা কৰিবলৈ কাৰোবাক নিয়োগ কৰিবলৈ মই অনুৰোধ জনাইছো’। অৰবিন্দ কেজৰিৱালক উদ্দেশ্যি সোমবাৰে সন্ধিয়া এইদৰে টুইট কৰে কিৰেন ৰিজিজুৱে।
Delhi CM @ArvindKejriwal ji may be busy for political activities but I request him to put someone in his cabinet to look after the affairs of sports properly. https://t.co/kvLjDBRWAt
— Kiren Rijiju (@KirenRijiju) January 14, 2020
গুৱাহাটীত চলি থকা খেলো ইণ্ডিয়াত দিল্লীৰ ২১ অনূৰ্ধ্বৰ ছোৱালীৰ ফুটবল দলটো সোমবাৰে হাঁহিয়াতৰ পাত্ৰ হোৱাৰ পিছতে কিৰেন ৰিজিজুৱে এই মন্তব্য কৰিছিল।
সাধাৰণতে এখন ফুটবল মেচত ১১ গৰাকী খেলুৱৈ আৰু তিনিগৰাকী অতিৰিক্ত খেলুৱৈৰ প্ৰয়োজন হয়। কিন্তু সোমবাৰৰ এখন মেচত দিল্লীৰ দলটোৱে খেলুৱৈৰ অভাৱত ৯ গৰাকীৰে খেলপথাৰত নামিছিল।
ইফালে দিল্লীৰ বিপক্ষে খেলা উৰিষ্যাৰ দলটোত আছিল ১৮ গৰাকী খেলুৱৈ। যাৰ বাবে দিল্লীক অতি শোচনীয়ভাৱে ১০-০ গ’লৰ ব্যৱধানত পৰাস্ত কৰিবলৈ সক্ষম হয়।
মেচখনক লৈ বিভিন্ন সমালোচনাৰ সন্মুখীন হোৱাৰ পিছতে দিল্লী চৰকাৰৰ বিভাগীয় কৰ্তৃপক্ষই এই সন্দৰ্ভত কয় যে বিমানৰ উৰণত দেৰি হোৱা বাবে আমাৰ গোটেই দলটো ভূৱনশ্বৰত ৰ’বলগীয়া হয় আৰু যাৰ বাবে সময়মতে গুৱাহাটীত উপস্থিত হ’ব নোৱাৰিলে।
‘বিমানৰ উৰণত দেৰি হোৱা বাবে মেচৰ সময়ত বাকী খেলুৱৈসকল উপস্থিত হ’ব নোৱাৰাত আমি প্ৰথম দিনা ৯ গৰাকী খেলুৱৈৰে খেলিবলগয়া হ’ল’। মেইল টুডে নামৰ বাতৰি কাকতত প্ৰকাশিত দিল্লী চৰকাৰৰ বিভাগীয় কৰ্তৃপক্ষৰ উদ্ধৃতি।