উচটনিমূলক মন্তব্য দিয়া বিজেপি নেতাৰ বিৰুদ্ধে দিল্লী আৰক্ষীক ব্যৱস্থা গ্ৰহণৰ নিৰ্দেশ দিয়া দিল্লী উচ্চ ন্যায়ালয়ৰ ন্যায়াধীশ এছ মুৰুলীধৰক বুধবাৰে নিশা কেন্দ্ৰীয় আইন আৰু ন্যায় মন্ত্ৰ্যালয়ে এখন জাননীৰ জৰিয়তে বদলিৰ নিৰ্দেশ দিয়ে।
জাননীখনৰ মতে ন্যায়াধীশ মুৰুলীধৰক দিল্লী উচ্চ ন্যায়ালয়ৰ পৰা পাঞ্জাৱ আৰু হাৰিয়ানা উচ্চ ন্যায়ালয়লৈ বদলি কৰা হয়।
‘ভাৰতীয় সংবিধানৰ ২২২ অনুচ্ছেদৰ এক নং দফা অনুসৰি ৰাষ্ট্ৰপতিয়ে উচ্চতম ন্যায়ালয়ৰ মুখ্য ন্যায়াধীশৰ সৈতে আলোচনা কৰি ন্যায়াধীশ এছ মুৰুলীধৰক দিল্লী উচ্চ ন্যায়ালয়ৰ পৰা পাঞ্জাৱ আৰু হাৰিয়ানা উচ্চ ন্যায়ালয়ৰ ন্যায়াধীশ হিচাপে বদলি কৰা হৈছে’। জাননীখনত এইদৰে উল্লেখ কৰা হয়।
যোৱা ১২ ফেব্ৰুৱাৰিত চুপ্ৰিম ক’ৰ্টৰ কলেজিয়ামে ন্যায়াধীশ মুৰুলীধৰৰ বদলিৰ পৰামৰ্শ প্ৰদান কৰিছিল।
উল্লেখ্য যে বুধবাৰে মাজনিশা এক বজাত জৰুৰী শুনানী লৈ দিল্লী উচ্চ ন্যায়ালয়ৰ ন্যায়াধীশ মুৰুলীধৰে দেশৰ ৰাজধানী দিল্লীৰ ৰাজপথত মানুহ হত্যা আৰু সম্পত্তি ধ্বংস কৰিবলৈ উচটনি দিয়া বিজেপি নেতাসকলৰ বিৰুদ্ধে ব্যৱস্থা গ্ৰহণ কৰিবলৈ দিল্লী আৰক্ষীক নিৰ্দেশ দিছিল।
এই নিৰ্দেশৰ এদিন পিছতেই মন্ত্ৰ্যালয়ে মুৰুলীধৰক শাস্তিমূলকভাৱে বদলিকৰণ কৰা কাৰ্যত ৰহস্যৰ গোন্ধ থকা বুলি উল্লেখ কৰি দিল্লী উচ্চ ন্যায়ালয়ৰ বাৰ এছ’চিয়েশ্যন, বিৰোধী কংগ্ৰেছৰ লগতে আন বহুতেই তীব্ৰ সমালোচনা কৰিছে।
