দিল্লীৰ এখন আদালতে এটা অতি আচৰিত আৰু ভয়ংকৰ আই ভি এফ চিকিৎসাৰ গোচৰত এজাহাৰ দাখিল কৰাৰ নিৰ্দেশ দিছে। এটা দম্পতীৰ ডি এন এ পৰীক্ষাৰ অন্তত পোহৰলৈ আহে যে তেওঁলোকৰ যমজ কন্যা সন্তান দুগৰাকী প্ৰকৃততে তেওঁলোকৰ নিজৰ সন্তান নহয়। ইয়াৰ পিছতেই উৰ্বৰতা ক্লিনিক বা ফাৰ্টিলিটি ক্লিনিকখনৰ বিৰুদ্ধে ভ্ৰূণৰ সালসলনি আৰু নথি-পত্ৰ জালিয়াতিৰ গুৰুতৰ অভিযোগ উত্থাপন হৈছে।
ৰাহুল আৰু মীনা ৰাঠোৰ নামৰ দম্পতীহালে ২০২৪ চনৰ শেষৰ ফালে গ্ৰেটাৰ কৈলাশৰ এছ চি আই আই ভি এফ হাস্পতালত ইন-ভিট্ৰ‘ ফাৰ্টিলাইজেচন বা আই ভি এফ চিকিৎসাৰ বাবে গৈছিল। ২০২৬ চনৰ ৫ জানুৱাৰীত মীনাই দুগৰাকী যমজ কন্যা সন্তানৰ জন্ম দিয়ে। কিন্তু লাহে লাহে দম্পতীহালৰ মনত সন্দেহ উপজিবলৈ ধৰে কাৰণ সন্তান দুগৰাকীৰ চেহেৰাৰ লগত পিতৃ-মাতৃৰ কোনো মিল নাছিল।
ইয়াৰ পিছত তেওঁলোকে স্বতন্ত্ৰ সংস্থাৰ জৰিয়তে ডি এন এ পৰীক্ষা কৰোৱায় আৰু ফলাফল দেখি আচৰিত হৈ পৰে। ৰিপৰ্টত স্পষ্ট হৈ পৰে যে যমজ কন্যা দুগৰাকী দম্পতীহালৰ সৈতে জিনীয়ভাৱে কোনো সম্পৰ্ক নাই। তাতোকৈ আচৰিত কথাটো হ‘ল যে যমজ সন্তান দুগৰাকীৰো ইজনীৰ সিজনীৰ লগত কোনো তেজৰ সম্পৰ্ক নাই। ইয়াৰ পৰা সন্দেহ কৰা হৈছে যে ক্লিনিকখনে অজ্ঞাত দাতাৰ ভ্ৰূণ ব্যৱহাৰ কৰিছিল।
দম্পতীহালে অভিযোগ কৰা অনুসৰি ক্লিনিকখনে তেওঁলোকৰ সন্মতি পত্ৰ জাল কৰিছিল আৰু কোনো সঠিক তথ্য নিদিয়াকৈয়ে দাতাৰ ভ্ৰূণ স্থাপন কৰিছিল। তেওঁলোকে লগতে দাবী কৰে যে মীনা অজ্ঞান হৈ থকা অৱস্থাত তেওঁলোকৰ পৰা স্বাক্ষৰ লোৱা হৈছিল আৰু এই নথি-পত্ৰসমূহ সঠিকভাৱে পঞ্জীয়ন বা নটাৰী কৰা হোৱা নাছিল। আনহাতে হাস্পতাল কৰ্তৃপক্ষই এই সকলো অভিযোগ অস্বীকাৰ কৰিছে। তেওঁলোকৰ মতে দম্পতীহালৰ নিজৰ জিনীয় পদাৰ্থ ব্যৱহাৰৰ উপযোগী নাছিল বাবে অজ্ঞাত দাতাৰ ভ্ৰূণ ব্যৱহাৰ কৰিবলৈ তেওঁলোকে নিজেই সন্মতি পত্ৰত স্বাক্ষৰ কৰিছিল।
প্ৰথমে আৰক্ষীয়ে এই বিষয়ত কোনো ব্যৱস্থা গ্ৰহণ নকৰাত দম্পতীহালে আদালতৰ কাষ চাপে। আদালতে বিষয়টোৰ গুৰুত্ব উপলব্ধি কৰি আৰক্ষীক তৎকালীনভাৱে এজাহাৰ ৰুজু কৰি বিতং তদন্ত কৰিবলৈ নিৰ্দেশ দিয়ে। এজন দণ্ডাধীশে উল্লেখ কৰে যে এই গোচৰটোৱে জালিয়াতি, আইন উলংঘা আৰু শিশু সৰবৰাহৰ দৰে ভয়ংকৰ সম্ভাৱনাকো আঙুলিয়াই দিছে, সেয়েহে ইয়াৰ এক পুংখানুপুংখ তদন্তৰ প্ৰয়োজন।
ইয়াৰ উপৰিও আদালতে আৰক্ষীক হাস্পতালখনৰ সকলো চিকিৎসাৰ ৰেকৰ্ড, চিচিটিভি ফুটেজ, সন্মতি পত্ৰ আৰু গৱেষণাগাৰৰ নথি-পত্ৰ সংৰক্ষণ কৰিবলৈ নিৰ্দেশ দিছে। হাস্পতাল কৰ্তৃপক্ষই এজাহাৰৰ বিৰুদ্ধে আবেদন কৰিছিল যদিও আদালতে সেয়া নাকচ কৰে আৰু ৰেকৰ্ডত থকা বিসংগতিৰ বাবে দম্পতীহালৰ অভিযোগ সঁচা হোৱাৰ সম্ভাৱনা ব্যক্ত কৰে। বৰ্তমান এই দম্পতীহাল মানসিকভাৱে যথেষ্ট ভাগি পৰিছে যদিও তেওঁলোকে আইনী যুঁজ চলাই যোৱাৰ লগতে এই যমজ কন্যা দুগৰাকীকো মৰমেৰে লালন-পালন কৰি আছে আৰু ন্যায়ৰ বাবে অপেক্ষা কৰিছে।
