দিল্লীত চলি থকা তীব্ৰ প্ৰতিবাদৰ মাজতে আৰক্ষীৰ বিৰুদ্ধে যৌন নিৰ্যাতনৰ এক ভুৱা ভিডিঅ’ নিৰ্মাণ কৰি ছ’চিয়েল মিডিয়াত প্ৰচাৰ কৰাৰ অভিযোগত হাৰিয়ানাৰ এজন যুৱকক দিল্লী আৰক্ষীয়ে গ্ৰেপ্তাৰ কৰিছে। আৰক্ষীয়ে জানিবলৈ দিয়া মতে, নাদীম আহমেদ নামৰ ২৪ বছৰীয়া যুৱকজনে কৃত্ৰিম বুদ্ধিমত্তাৰ (এআই) সহায়ত এই ভুৱা চিচিটিভি ফুটেজটো নিৰ্মাণ কৰিছিল। হাৰিয়ানাৰ পালৱালৰ বাসিন্দা নাদীমে আৰক্ষীৰ ভাবমূৰ্তি ম্লান কৰা আৰু প্ৰতিবাদকাৰীসকলৰ মনত আৰক্ষীৰ প্ৰতি ঘৃণাৰ ভাৱ জগাই তোলাৰ উদ্দেশ্যেই এই কাৰ্য কৰা বুলি জেৰাৰ সময়ত স্বীকাৰ কৰিছে।
দিল্লীৰ অতিৰিক্ত আৰক্ষী উপায়ুক্ত (ডিচিপি) মনজিতে সংবাদ মাধ্যমৰ আগত জানিবলৈ দিয়া মতে, যোৱা ৩ অক্টোবৰত ছ’চিয়েল মিডিয়াত এটা চিচিটিভি ফুটেজ ভাইৰেল হৈ পৰিছিল। সেই সময়ত ৰাজধানী চহৰখনত মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত ছাত্ৰ-যুৱকসকলৰ প্ৰতিবাদী কাৰ্যসূচী চলি আছিল। ভিডিঅ’টোত আৰক্ষীৰ পোছাক পৰিহিত এজন লোকে এগৰাকী মহিলাৰ সৈতে দুৰ্ব্যৱহাৰ কৰা দেখা গৈছিল আৰু ইয়াক প্ৰতিবাদস্থলীৰ চিচিটিভি ফুটেজ বুলি দাবী কৰা হৈছিল। আনকি ভিডিঅ’টোত থকা আৰক্ষীজনৰ পৰিচয়ো ছ’চিয়েল মিডিয়াত প্ৰকাশ কৰা হৈছিল। কিন্তু আৰক্ষীৰ তদন্তত স্পষ্ট হৈ পৰে যে সমগ্ৰ ভিডিঅ’টো এআই প্ৰযুক্তি ব্যৱহাৰ কৰি নিৰ্মাণ কৰা এক ভুৱা সমল (Content) আছিল।
উল্লেখ্য যে, নিৰ্বাচন আয়ুক্তৰ বিৰুদ্ধে প্ৰতিবাদ চলি থকাৰ মাজতেই বাস্তৱত এগৰাকী মহিলা সাংবাদিকে দিল্লী আৰক্ষীৰ এজন সহকাৰী আয়ুক্তৰ (এচিপি) বিৰুদ্ধে যৌন নিৰ্যাতনৰ গুৰুতৰ অভিযোগ উত্থাপন কৰিছিল। এই বাস্তৱ ঘটনাৰ মাজতেই এআই নিৰ্মিত ভুৱা ভিডিঅ’টো প্ৰচাৰ হোৱাটোৱে পৰিস্থিতি অধিক স্পৰ্শকাতৰ কৰি তোলে। অতিৰিক্ত ডিচিপি মনজিতে কয় যে যিটো ইনষ্টাগ্ৰাম একাউণ্টৰ পৰা ভিডিঅ’টো পোষ্ট কৰা হৈছিল, সেয়া পালৱালৰ নাদীম আহমেদৰ বুলি চিনাক্ত কৰাৰ পাছতেই তেওঁক গ্ৰেপ্তাৰ কৰা হয়। নিজকে সাংবাদিক বুলি পৰিচয় দিয়া নাদীমে দিল্লীৰ ছাকেতৰ এখন মাদ্ৰাছাত দশম শ্ৰেণীলৈকে পঢ়িছিল যদিও উত্তীৰ্ণ হ’ব পৰা নাছিল। আৰক্ষীৰ মতে, তেওঁৰ ইনষ্টাগ্ৰাম একাউণ্টত প্ৰায় ২৪ হাজাৰ অনুগামী আছে আৰু তেওঁ এআই সঁজুলি ব্যৱহাৰ কৰি এনে ধৰণৰ ভিডিঅ’ নিৰ্মাণ কৰে।
আৰক্ষীৰ জেৰাত অভিযুক্ত যুৱকজনে জনায় যে প্ৰতিবাদকাৰীসকলে যাতে আৰক্ষীক আক্ৰমণ কৰে, তাৰ বাবেই তেওঁলোকৰ মনত আৰক্ষীৰ বিৰুদ্ধে ঘৃণাৰ সৃষ্টি কৰিবলৈ তেওঁ এই ভুৱা ভিডিঅ’টো নিৰ্মাণ কৰিছিল। দিল্লী আৰক্ষীয়ে ইতিমধ্যে অভিযুক্তৰ মোবাইল ফোন জব্দ কৰিছে আৰু ইয়াৰ আঁৰত আন কোনো বৃহৎ ষড়যন্ত্ৰ আছে নেকি, সেই দিশতো তদন্ত অব্যাহত ৰাখিছে।
আনহাতে, প্ৰতিবাদস্থলীৰ শেহতীয়া পৰিস্থিতি আৰু সাংবাদিকৰ সৈতে আৰক্ষী বিষয়াৰ আচৰণক লৈ প্ৰশ্ন উত্থাপন হোৱাৰ পাছত দিল্লী আৰক্ষীয়ে মঙলবাৰে সংবাদ সংগ্ৰহ কৰিবলৈ যোৱা সাংবাদিকসকলৰ বাবে এক বিশেষ নিৰ্দেশনা জাৰি কৰিছে। নিৰ্দেশনাত প্ৰতিগৰাকী সাংবাদিকক নিজৰ প্ৰতিষ্ঠানৰ পৰিচয় পত্ৰ পৰিধান কৰিবলৈ কোৱা হৈছে, যাতে কৰ্তব্যৰত আৰক্ষীয়ে তেওঁলোকক সহজে চিনাক্ত কৰিব পাৰে। ইয়াৰ লগতে প্ৰতিবাদস্থলীৰ পৰা বাতৰি সংগ্ৰহ কৰাৰ সময়ত নিৰাপদ দূৰত্ব বজাই ৰাখিবলৈকো আৰক্ষীয়ে সাংবাদিকসকলক পৰামৰ্শ প্ৰদান কৰিছে।ো
