৮-৯টা ভুৱা একাউণ্ট, মহিলাৰ ছবি বিকৃত কৰি ছ’চিয়েল মিডিয়াত পোষ্ট; আৰক্ষীৰ জালত পুৰোহিত

অনলাইনত বৃদ্ধি পাইছে হাৰাশাস্তিৰ ঘটনা। এইবাৰ ভুক্তভোগী গুজৰাটৰ এগৰাকী মহিলা। গুজৰাটী মহিলাগৰাকীৰ ছবি আৰু ভিডিঅ’ ইনষ্টাগ্ৰামত এআই ব্যৱহাৰ কৰি বিকৃত কৰাৰ অভিযোগ এজন দিল্লীৰ যুৱকৰ বিৰুদ্ধে।

কেৱল সেয়াই নহয়, অভিযুক্তই মহিলাগৰাকীৰ মাতৃৰ ছবি আৰু ভিডিঅ’ বিকৃত কৰিও ছ’চিয়েল মিডিয়াত পোষ্ট কৰে। আহমেদাবাদ আৰক্ষীয়ে যুৱকজনক গ্ৰেপ্তাৰ কৰিছে।

আৰক্ষীৰ সূত্ৰ অনুসৰি ২৭ বছৰীয়া সুমিত নেমচান্দ শৰ্মাই ছচিয়েল মিডিয়াত ধৰ্মীয় ভিডিঅ’ বনাইছিল। পেছাত তেওঁ আছিল এজন পুৰোহিত। অভিযুক্তই প্ৰথমে ইনষ্টাগ্ৰামত গুজৰাটী মহিলাগৰাকীৰ সৈতে ধৰ্মীয় বিষয়ত কথা পাতিবলৈ আৰম্ভ কৰে। পিছত যেতিয়া তেওঁ বন্ধুত্ব কৰিবলৈ চেষ্টা কৰিছিল তেতিয়া মহিলাগৰাকীয়ে সেয়া নাকচ কৰে।

তাৰ পিছতেই আৰম্ভ হ’ল প্ৰতিশোধ লোৱাৰ প্ৰয়াস। যুৱকজনে মহিলাগৰাকীক বাৰে বাৰে মেছেজ দি হাৰাশাস্তি কৰি থাকিল। কিন্তু যেতিয়া মহিলাগৰাকীয়ে কোনো সঁহাৰি নিদিলে তেতিয়া অভিযুক্তই আন এটা পথ বাছি ল’লে।

জানিব পৰা মতে, ২০২৫ চনৰ ডিচেম্বৰৰ পৰা ২০২৬ চনৰ এপ্ৰিললৈকে তেওঁ মহিলাগৰাকীক অনলাইনযোগে অনুসৰণ আৰু হাৰাশাস্তি কৰি থাকিল। যুৱকজনে মহিলাগৰাকী আৰু মাতৃৰ ছবি ইনষ্টাগ্ৰামৰ পৰা ডাউনলোড কৰি ইণ্টাৰনেটত ‘AI Remove Clothes’ ব্যৱহাৰ কৰি এশৰো অধিক ভুৱা নগ্ন ছবি আৰু ভিডিঅ’ তৈয়াৰ কৰি ছ’চিয়েল মিডিয়াত পোষ্ট কৰে।

আৰক্ষীয়ে লগতে কয় যে ইয়াৰ পিছত মহিলাগৰাকীৰ নাম আৰু ছবি ব্যৱহাৰ কৰি ভুৱা ইনষ্টাগ্ৰাম একাউণ্ট আৰু ইউটিউব চেনেল তৈয়াৰ কৰা হয় আৰু সেই অশ্লীল ছবি আৰু ভিডিঅ’ আপলোড কৰা হয়। তদন্তত প্ৰকাশ পাইছে যে অভিযুক্তই ছ’চিয়েল মিডিয়াত মুঠ ৮-১০টা ভুৱা একাউণ্ট সৃষ্টি কৰিছিল। যুৱকজনৰ উদ্দেশ্য আছিল মহিলাগৰাকী আৰু তেওঁৰ পৰিয়ালক বদনাম আৰু হাৰাশাস্তি কৰা।

মহিলাগৰাকীয়ে যেতিয়া আহমেদাবাদ চহৰৰ চাইবাৰ ক্ৰাইম ব্ৰাঞ্চত যুৱকজনৰ বিৰুদ্ধে এজাহাৰ দাখিল কৰে, তেতিয়া চাইবাৰ ক্ৰাইম টিমে অভিযুক্ত যুৱকজনক ডিজিটেল ট্ৰেকিঙৰ জৰিয়তে উত্তৰ-পূব দিল্লীৰ উছমানপুৰ অঞ্চলৰ পৰা বিচাৰি উলিয়াই তাৰ পৰাই গ্ৰেপ্তাৰ কৰে।

মন কৰিবলগীয়া যে অনলাইন চাইবাৰ অপৰাধ ৰোধৰ বাবে আহমেদাবাদ আৰক্ষীয়ে আৰম্ভ কৰিছে ‘Mission Cyber Rakshika: #SecureHerSpace’। এই অভিযানৰ অধীনত আহমেদাবাদ আৰক্ষীয়ে সমগ্ৰ তদন্ত প্ৰক্ৰিয়া চলাইছে। মূলতঃ অনলাইনত মহিলাসকলৰ সুৰক্ষা নিশ্চিত কৰাৰ বাবে এই প্ৰচেষ্টা। অভিযুক্ত যুৱকজনৰ বিৰুদ্ধে তথ্য প্ৰযুক্তি আইন আৰু ভাৰতীয় দণ্ডবিধিৰ বিভিন্ন ধাৰাত গোচৰ ৰুজু কৰা হৈছে।