লোকসভাৰ পাছত দিল্লী অধ্যাদেশ বিধেয়ক, ২০২৩ ৰাজ্যসভাতো গৃহীত হয়। সোমবাৰে নিশা প্ৰায় ৯:৩০ বজাৰ পৰা সংসদৰ উচ্চ সদনত দিল্লী অধ্যাদেশ বিধেয়ক সন্দৰ্ভত ভোটদান আৰম্ভ হয়। দুৰ্নীতিমুক্ত প্ৰশাসনৰ বাবে এই বিধেয়কখন অতি গুৰুত্বপূৰ্ণ হ’ব বুলি কেন্দ্ৰই দাবী কৰে। সোমবাৰে ৰাজ্যসভাত এনে দাবী উত্থাপন কৰে গৃহমন্ত্ৰী অমিত শ্বাহে।
এই বিধেয়ক ইতিমধ্যে লোকসভাত গৃহীত হৈছে। ৩ আগষ্টত লোকসভাত ধ্বনি ভোটৰ জৰিয়তে দিল্লী অধ্যাদেশ বিধেয়ক গৃহীত হয়। এইবাৰ ৰাজ্যসভাতো এই বিধেয়কখন গৃহীত হ’ল। ১৩১জন সাংসদে বিধেয়কখনৰ সপক্ষে ভোটদান কৰে। বিৰুদ্ধে পৰে ১০২ টা ভোট।
ৰাজ্যসভাৰ মুঠ আসনৰ সংখ্যা ২৪৫খন। ইয়াৰে ৮খন আসন বৰ্তমান খালী হৈ থকাৰ ফলত ৰাজ্যসভাৰ মুঠ সাংসদৰ সংখ্যা বৰ্তমান ২৩৭ জন। বিধেয়কখনক ৰাজ্যসভাত সংখ্যাগৰিষ্ঠতা লাভ কৰিবলৈ প্ৰয়োজন হৈছিল ১১৯ জন সাংসদৰ সমৰ্থন।
দিল্লীৰ আমোলাসকলক নিজৰ হাতত ৰাখিবলৈ আতুৰ হৈ কেন্দ্ৰই এই বিধেয়কখন সংসদৰ উচ্চ সদনত গৃহীত কৰিব বিচাৰিছিল। এন ডি এৰ বাহিৰৰ কেইবাটাও দল যেনে বিজু জনতা দল, ৱাই এছ আৰ চি পিয়েও বিধেয়কখনৰ প্ৰতি সমৰ্থন জনোৱাৰ কথা ঘোষণা কৰে।
এই পৰিস্থিতিত বিৰোধীয়ে এই বিধেয়কখন গৃহীত কৰাত বাধা দিবলৈ সৰ্ব শক্তিৰে জপিয়াই পৰে। এনে পৰিস্থিতিৰ মাজতে কালি ৰাজ্যসভাত উপস্থিত হয় প্ৰাক্তন প্ৰধানমন্ত্ৰী তথা কংগ্ৰেছৰ সাংসদ মনমোহন সিং। অসুস্থ হ’লেও মনমোহন সিঙে হুইল চেয়াৰত উঠি সংসদ পায়হি। ইতিমধ্যে তেওঁৰ এই ছবি ভাইৰেল হৈছে। ইয়াৰ পূৰ্বে তেওঁক হুইল চেয়াৰত বহি ৰাষ্ট্ৰপতি নিৰ্বাচনত ভোটদান কৰা দেখা গৈছিল।
উল্লেখ্য যে ২০০৯ চনত এইমছত প্ৰাক্তন প্ৰধানমন্ত্ৰীগৰাকীৰ বাইপাছ অস্ত্ৰোপচাৰ কৰা হৈছিল। ইয়াৰ পূৰ্বে ২০২১ চনৰ এপ্ৰিল মাহত মনমোহন সিঙক কৰ’নাৰ বাবে চিকিৎসালয়খনৰ ট্ৰমা কেয়াৰ চেণ্টাৰত ভৰ্তি কৰোৱা হৈছিল। পিছত অক্টোবৰ মাহত সিঙক জ্বৰ, শাৰীৰিক দুৰ্বলতাৰ বাবে পুনৰ এইমছত ভৰ্তি কৰা হয়। তেওঁ হৃদৰোগ বিশেষজ্ঞ নীতিশ নাইকৰ অধীনত চিকিৎসাধীন হৈ আছিল। সেইবাবেই বছৰৰ শীতকালীন অধিৱেশনৰ সময়ত মনমোহন সিং সংসদলৈ অহা নাছিল। ইয়াৰ পিছতো সংসদত তেওঁক বৰকৈ দেখা পোৱা হোৱা নাছিল।
