দিল্লীৰ কৰকৰডুমা আদালতে ২০২০ চনৰ দিল্লী হিংসাৰ ডাঙৰ ষড়যন্ত্ৰৰ সৈতে জড়িত ইউএপিএ গোচৰত ছাত্ৰ কৰ্মী ওমৰ খালিদ আৰু চৰ্জিল ইমামক মোক্ষম আঘাত। আদালতে দুয়োজন অভিযুক্তৰে নিয়মীয়া জামিন আবেদন সম্পূৰ্ণৰূপে খাৰিজ কৰিছে। কৰকৰডুমা আদালতৰ অতিৰিক্ত সত্ৰ ন্যায়াধীশ সমীৰ বাজপেয়ীয়ে এই নিৰ্দেশ জাৰি কৰে। ইয়াৰ পূৰ্বে আদালতে দিল্লী আৰক্ষী আৰু অভিযুক্তৰ অধিবক্তা দুয়োপক্ষৰ দীঘলীয়া যুক্তি শুনাৰ পিছত নিজৰ ৰায় সংৰক্ষিত ৰাখিছিল। অভিযুক্তসকলে দীৰ্ঘদিন ধৰি কাৰাগাৰত বন্দী হৈ থকা আৰু গোচৰটোৰ লেহেমীয়া গতিৰ কথা উল্লেখ কৰি সকাহ বিচাৰিছিল, কিন্তু আদালতে তেওঁলোকক জামিন দিবলৈ অস্বীকাৰ কৰে।
শুনানিৰ সময়ত ওমৰ খালিদৰ জ্যেষ্ঠ অধিবক্তা ত্ৰিদীপ পেচে আদালতক জনায় যে উচ্চতম ন্যায়ালয়ে পূৰ্বে জামিন আবেদন নাকচ কৰাৰ সময়ত কৈছিল যে ওমৰ আৰু চৰ্জিলে এবছৰলৈ নতুন জামিন আবেদন কৰিব নোৱাৰিব অথবা সুৰক্ষিত সাক্ষীসকলৰ সাক্ষ্যদান সম্পূৰ্ণ হোৱাৰ পিছতহে জামিন বিচাৰিব পাৰিব। তেওঁ যুক্তি দৰ্শায় যে এই গোচৰটোৰ বিচাৰ প্ৰক্ৰিয়াত এতিয়ালৈকে কোনো বিশেষ অগ্ৰগতি হোৱা নাই। ওমৰ খালিদৰ বিৰুদ্ধে কোনো ধৰণৰ সামগ্ৰী জব্দ কৰা হোৱা নাই আৰু হিংসাত্মক ঘটনাত তেওঁ পোনপটীয়াভাৱে জড়িত থকাৰো কোনো প্ৰমাণ নাই। তেওঁৰ বিৰুদ্ধে মূলতঃ সাক্ষীৰ ভাষ্য আৰু অমৰাৱতীত দিয়া এটা ভাষণৰ ভিডিঅ’হে ৰেকৰ্ডত আছে।
আনহাতে চৰ্জিল ইমামৰ হৈ হাজিৰ হোৱা অধিবক্তা তালিব মুস্তাফাই আদালতত কয় যে তেওঁৰ মক্কেল বিগত প্ৰায় ছয় বছৰ ধৰি কাৰাগাৰত আছে। গোচৰটো এতিয়াও প্ৰাৰম্ভিক পৰ্যায়তে আছে আৰু ই সোনকালে শেষ হোৱাৰ কোনো সম্ভাৱনা দেখা পোৱা নাই। তেওঁ আদালতক কয় যে এই একেটা গোচৰতে আন একাংশ অভিযুক্তই ইতিমধ্যে সকাহ লাভ কৰিছে, গতিকে সমতাৰ নীতিৰ ভিত্তিত চৰ্জিল ইমামকো জামিনৰ সুবিধা দিব লাগে। কিন্তু আদালতে দুয়োৰে যুক্তি নাকচ কৰি তেওঁলোকক জেদতে ৰখাৰ নিৰ্দেশ দিয়ে।
