ক’ৰ’না মহামাৰীয়ে অসমত ভয়ংকৰ ৰূপ ধাৰণ কৰাৰ সময়তে অসমৰ চাহ বাগিচা সমূহৰ স্বাস্থ্য ব্যবস্থাৰ পয়ালগা দিশটো সন্মুখলৈ আহিছে।
অতি উদ্বেগজনক কথাটো হ’ল যে ৰাজ্যৰ প্ৰায় ৭০ শতাংশ চাহ বাগিচাত নাই চিকিৎসক।
ৰাজ্যৰ প্ৰায় ৮৫০ খন চাহ বাগিচাৰ মাত্র ৩০-৪০ শতাংশ বাগিচাৰ চিকিৎসালয়তহে আছে চিকিৎসক।সততে পুঁজিপতি গোষ্ঠীৰ স্বাৰ্থত কাম কৰা চৰকাৰ খনৰো এই ক্ষেত্ৰত কোনো কাণসাৰ নাই।
অসমৰ অৰ্থনীতিলৈ সৰ্বাধিক অৰিহণা যোগোৱা চাহ শ্রমিক সকলৰ ক্ষেত্রত চৰকাৰৰ উদাসীনতা কোনো নতুন কথা নহয়। তেওঁলোকৰ শিক্ষা, স্বাস্থ্য, উপযুক্ত মজুৰি আদি সকলো দিশতে চৰকাৰে অৱহেলাৰ মনোভাৱ পোষণ কৰি আহিছে।
বছৰৰ পিছত বছৰ আবেদন-নিবেদন, ধৰ্ণা-প্ৰতিবাদেও চৰকাৰৰ গা লৰাব পৰা নাই। এক প্ৰেছ বিজ্ঞপ্তিত এইদৰে কয় লিবাৰেল ডেম’ক্ৰেটিক পাৰ্টি, অসমৰ।
যি সময়ত সমগ্র ৰাজ্যই গণসংক্ৰণৰ শংকাত ভূগিছে তেনে সময়ত ৰাজ্যৰ লাখ লাখ চাহ শ্রমিকে নিজৰ জীৱনৰ প্ৰতি অহা শংকা নেওচি কৰ্তব্য পালন কৰি আহিছে। তাৰোপৰি বাগিচাৰ চিকিৎসালয় সমূহত ঔষধ যোগানো সন্তোষজনক নহয়। প্ৰয়োজনীয় ঔষধ পাতিও উপলব্ধ নহয়। বিজ্ঞপ্তিত এনেদৰে কয়।
পাৰ্টিয়ে আৰু কয়, উল্লেখযোগ্য যে বাগিচাসমূহত এতিয়ালৈ নমুনা সংগ্রহৰ কামো আৰম্ভ হোৱা নাই। যিহেতু চাহ বাগিচাৰ কামত সকলো সময়তে সামাজিক ব্যৱধান বজাই ৰখাটো সম্ভৱ নহয়। গতিকে চাহ বাগিচা সমূহত ব্যাপক হাৰত নমুনা সংগ্রহ কৰা আৰু পৰীক্ষা কৰাটো অতি প্ৰয়োজনীয়।
এনে এটা জটিল সময়ত চাহ শ্রমিক সকলৰ সুৰক্ষাৰ প্ৰতি চৰকাৰে অৱহেলা কৰাৰ বিষয়টোক এল ডি পিয়ে নিন্দা কৰিছে। এইদৰে কয় এল ডি পিয়ে।
প্ৰেছ বিজ্ঞপ্তিত এল ডি পিয়ে আৰু কয় যে, চাহ বাগিচা সমূহত চৰকাৰে চিকিৎসক নিযুক্তি দিয়ক, ঔষধ আৰু চিকিৎসা সম্পর্কীয় সকলো ধৰণৰ সঁজুলি চৰকাৰে অনতি পলমে যোগান ধৰক।
মুখ্যমন্ত্ৰী ডাঙৰীয়াই ২০ টকীয়া একোটা মাস্ক বিতৰণৰ বাবে ৫-৬ লাখ টকা খৰচ কৰি চাহ বাগিচালৈ হেলিকপ্টাৰ লৈ যোৱাৰ পৰিবৰ্তে তেওঁলোকৰ সমস্যা সমূহ সমাধানত গুৰুত্ব আৰোপ কৰক। অন্যথা গণসংক্ৰমন হ’লে বাগিচা সমূহৰ পৰিস্থিতি নিয়ন্ত্রণ কৰাটো অসম্ভৱ হৈ পৰিব।
