তিনিচুকীয়া জিলাত সংঘটিত হৈছে এক লজ্জাজনক ঘটনা। বিদ্যালয়ৰ পৰা ঘৰলৈ উভতি অহা সময়ত এগৰাকী সপ্তম শ্ৰেণীৰ কিশোৰী ছাত্ৰীক দলবদ্ধ ধৰ্ষণ কৰাৰ অভিযোগ উঠিছে।
ঘটনা অনুসৰি, ছাত্ৰীগৰাকীক চাহ বাগিচাৰ সমীপৰ পথৰ কাষত অৰ্ধচেতন অৱস্থাত উদ্ধাৰ কৰা হয়। চাহ বাগিচাৰ ওচৰত এগৰাকী ই-ৰিক্সা চালকে তেওঁক এই অৱস্থাত দেখা পাই পৰিয়ালৰ সৈতে যোগাযোগ কৰে।
ভুক্তভোগী কিশোৰীগৰাকীৰ ভাষ্য অনুসৰি, তিনিজন লোক এই নৃশংস কাণ্ডত জড়িত আছিল। ভুক্তভোগীয়ে আৰক্ষীক জনাইছে যে আক্ৰমণকাৰীসকলে ধৰ্ষণ কৰাৰ পিছত তেওঁক পথৰ কাষত পেলাই থৈ যায়।
ঘটনাৰ খবৰ পোৱাৰ লগে লগে আৰক্ষী দল ঘটনাস্থলীত উপস্থিত হয় আৰু কিশোৰীগৰাকীক তৎকালিনভাৱে তিনিচুকীয়া চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰে।
আৰক্ষীৰ সূত্ৰ অনুসৰি, দিনৰ প্ৰায় ২:৩০ বজাত বিদ্যালয় ছুটি হোৱাৰ পিছত ছোৱালীজনী ঘৰলৈ উভতি নহাত পৰিয়ালৰ লোক চিন্তিত হৈ পৰে আৰু বিচাৰিবলৈ ধৰে। প্ৰায় ৫ বজাত এজন ই-ৰিক্সা চালকে পৰিয়ালটোৰ সৈতে যোগাযোগ কৰি জনায় যে ছাত্ৰীগৰাকীক চাহ বাগিচা এটাৰ ওচৰত অৰ্ধচেতন অৱস্থাত পৰি থকা দেখা গৈছে।
এজন জ্যেষ্ঠ আৰক্ষী বিষয়াই সংবাদ মাধ্যমৰ আগত সদৰী কৰা অনুসৰি, “ঘটনাটোৰ খবৰ পোৱা মাত্ৰেই আৰক্ষী দল ঘটনাস্থলীলৈ পঠোৱা হয় আৰু কিশোৰীগৰাকীক চিকিৎসালয়লৈ নিয়া হয়। চিকিৎসা প্ৰতিবেদন লাভ কৰাৰ পিছতে পৰৱৰ্তী কাৰ্যবিধী গ্ৰহণ কৰা হ’ব।”
এই চাঞ্চল্যকৰ ঘটনাই জনসাধাৰণক ক্ষুব্ধ কৰি তুলিছে আৰু অতি শীঘ্ৰে দোষীসকলক গ্ৰেপ্তাৰ কৰি কঠোৰ শাস্তি প্ৰদানৰ দাবী জনাইছে। আৰক্ষীয়ে ইতিমধ্যে সন্দেহযুক্ত লোককেইজনৰ সন্ধান আৰম্ভ কৰিছে।
