অৰুণাচল প্ৰদেশৰ এক বিশাল অঞ্চলত শেহতীয়াকৈ ভয়ংকৰ অগ্নিকাণ্ডৰ ঘটনা সংঘটিত হৈছে। ৰাজ্যখনৰ পাছিঘাটৰ অন্তৰ্গত মেবো আৰু ছিগাৰ অঞ্চলত এই জুই বনানিৰ পৰা দ্ৰুতগতিত বিয়পি পৰিছিল। পৰিস্থিতি অধিক ভয়াৱহ হোৱাৰ সম্ভাৱনা প্ৰত্যক্ষ কৰি ভাৰতীয় বায়ুসেনাই উদ্ধাৰ অভিযানত জপিয়াই পৰে। বায়ুসেনাৰ এখন বিশেষ হেলিকপ্টাৰে আকাশৰ পৰা ধাৰাসাৰ পানী ঢালি এই জুই নিয়ন্ত্ৰণ কৰিবলৈ সক্ষম হয়। এই সমগ্ৰ অভিযানৰ তথ্য বায়ুসেনাই তেওঁলোকৰ সামাজিক মাধ্যমৰ জৰিয়তে ৰাজহুৱা কৰিছে।
বায়ুসেনাই জনোৱা অনুসৰি, অৰুণাচলৰ এই দুৰ্যোগৰ সময়ত তেওঁলোকে অতি দ্ৰুত আৰু নিখুঁতভাৱে অভিযান চলাইছিল। জুই নিৰ্বাপনৰ বাবে বায়ুসেনাৰ এখন এম আই-১৭ ভি৫ হেলিকপ্টাৰ মোতায়েন কৰা হৈছিল। হেলিকপ্টাৰখনৰ সহায়ত কেইবাবাৰো আকাশমাৰ্গৰ পৰা মুঠ ৬৬ হাজাৰ লিটাৰ পানী জুইৰ মাজত ঢালি দিয়া হয়। বিশেষকৈ ওচৰতে থকা গাওঁ আৰু মানুহৰ ঘৰবোৰ যাতে জুইত জাহ নাযায়, সেই লক্ষ্য আগত ৰাখিয়েই এই বৃহৎ পৰিমাণৰ পানী ছটিয়াই জুই নুমুৱাবলৈ সক্ষম হয়।
উল্লেখ্য যে অৰুণাচলত এনেধৰণৰ বনজুইৰ ঘটনা এয়াই প্ৰথম নহয়। ইয়াৰ পূৰ্বে যোৱা ১৮ ফেব্ৰুৱাৰীত ৱালং অঞ্চলতো এক ভয়াবহ অগ্নিকাণ্ড সংঘটিত হৈছিল। সেই সময়তো বায়ুসেনাই অত্যন্ত উচ্চতাৰ পৰা প্ৰায় ১ লাখ ৩৯ হাজাৰ ৮০০ লিটাৰ পানী ঢালি জুই নিয়ন্ত্ৰণ কৰিছিল। ইয়াৰ উপৰিও প্ৰাকৃতিক দুৰ্যোগ আৰু জৰুৰীকালীন পৰিস্থিতিৰ মোকাবিলা কৰিবলৈ শেহতীয়াকৈ তেহৰী হ্ৰদত বায়ুসেনা আৰু সেনাবাহিনীৰ এক যৌথ অনুশীলন সম্পন্ন হৈছে। যিকোনো কঠিন পৰিস্থিতিত দেশৰ সুৰক্ষা আৰু সহায়ৰ বাবে সেনাবাহিনী যে সাজু আছে, এই অভিযানে পুনৰবাৰ তাকেই প্ৰমাণ কৰিলে।
