ইউটিউবাৰ ধ্ৰুৱ ৰাথীৰ এটা বিতৰ্কিত ভিডিঅ’ সামাজিক মাধ্যমৰ পৰা আঁতৰোৱাৰ সন্দৰ্ভত দিল্লী উচ্চ ন্যায়ালয়ে চৰকাৰক এক গুৰুত্বপূৰ্ণ নিৰ্দেশ দিছে। আদালতে কেন্দ্ৰীয় চৰকাৰৰ অভিযোগ আপীল সমিতিক আহিবলগীয়া ১৫ দিনৰ ভিতৰত এই সন্দৰ্ভত চূড়ান্ত সিদ্ধান্ত ল’বলৈ সময়সীমা বান্ধি দিছে।
উল্লেখ্য যে ধ্ৰুৱ ৰাথীয়ে তেওঁৰ এটা ইউটিউব ভিডিঅ’ত হিন্দু দেৱ-দেৱী ভগৱান ৰাম, সীতা আৰু ভগৱান কৃষ্ণই মাংস আৰু সুৰা সেৱন কৰিছিল বুলি কৰা দাবীৰ বিৰুদ্ধে এই আইনী ব্যৱস্থা গ্ৰহণ কৰা হৈছে। ইলেকট্ৰনিক্স আৰু তথ্য প্ৰযুক্তি মন্ত্ৰালয়ৰ অধীনত থকা এই সমিতিখনে অনলাইন সমল বা একাউণ্ট সম্পৰ্কীয় অভিযোগৰ ওপৰত ডিজিটেল প্লেটফৰ্মসমূহে লোৱা সিদ্ধান্তৰ বিৰুদ্ধে কৰা আপীলসমূহৰ ওপৰত বিচাৰ কৰে। আদালতে স্পষ্টকৈ সকীয়াই দিছে যে এই আদেশ অমান্য কৰিলে তাক অত্যন্ত গুৰুত্বসহকাৰে লোৱা হ’ব।
এই শুনানীৰ সময়ত কেন্দ্ৰীয় চৰকাৰৰ হৈ প্ৰতিনিধিত্ব কৰা অতিৰিক্ত ছলিচিটৰ জেনেৰেল চেতন শৰ্মাই যুক্তি দৰ্শায় যে ইউটিউবে নিজেই উচিত সাৱধানতা অৱলম্বন কৰিব লাগিছিল আৰু এনে আপত্তিজনক তথা ঘৃণা বিয়পোৱা সমল ততালিকে আঁতৰাব লাগিছিল। ইউটিউবত ৩২.৪ মিলিয়ন অনুগামী থকা জনপ্ৰিয় ইউটিউবাৰ ধ্ৰুৱ ৰাথীয়ে তেওঁৰ এটা ভিডিঅ’ত এই বিতৰ্কিত মন্তব্যসমূহ কৰিছিল।
অতিৰিক্ত ছলিচিটৰ জেনেৰেলগৰাকীয়ে আদালতক জনায় যে ৰাথীয়ে আপলোড কৰা এই সমল অত্যন্ত ক্ষতিকাৰক আৰু সমাজত বিভাজন আনিব পৰা ধৰণৰ। তেওঁ কয় যে গুগলে হয় আদালতৰ সন্মুখত এই ভিডিঅ’টো আঁতৰাব বুলি সন্মতি প্ৰকাশ কৰিব লাগে, নহয় আদালতে ইয়াৰ ওপৰত নিজাকৈ ব্যৱস্থা ল’ব লাগে। তেওঁ লগতে কয় যে গুগলে সমাজত অশান্তি সৃষ্টি কৰা আৰু সংখ্যাগৰিষ্ঠ সমাজৰ আৱেগক আঘাত কৰা এনে সমলসমূহ প্লেটফৰ্মত থকাটো নিষিদ্ধ কৰিব লাগে।
আনহাতে গুগলৰ অধিবক্তাগৰাকীয়ে উচ্চ ন্যায়ালয়ক জনায় যে কোম্পানীটোৱে ইতিমধ্যে আৱেদনকাৰী অধিবক্তা অমিতা সচদেৱাক ইয়াৰ উত্তৰ দিছে আৰু এই সন্দৰ্ভত অভিযোগ আপীল সমিতিৰ ওচৰতো এখন আপীল দাখিল কৰা হৈছে। দুয়োপক্ষৰ যুক্তি শুনাৰ পিছত ন্যায়াধীশ স্বৰণা কান্ত শৰ্মাই চৰকাৰী সংস্থাটোক অহা ১৫ দিনৰ ভিতৰত এই আপীলৰ ওপৰত সিদ্ধান্ত ল’বলৈ নিৰ্দেশ দিয়ে। আদালতে পুনৰ দোহাৰে যে এই আদেশক অৱজ্ঞা কৰিলে তাক আইনগতভাৱে কঠোৰভাৱে চোৱা হ’ব। উল্লেখ্য যে অধিবক্তা অমিতা সচদেৱাই ধ্ৰুৱ ৰাথীয়ে যোৱা ২১ মাৰ্চত আপলোড কৰা ভিডিঅ’টোৰ বিৰুদ্ধে আপত্তি দৰ্শাই দাখিল কৰা এখন আবেদনৰ ভিত্তিত আদালতে এই গুৰুত্বপূৰ্ণ ৰায় প্ৰদান কৰে।
