গলৱান উপত্যকাত ভাৰত আৰু চীনৰ মাজত হোৱা সংঘৰ্ষৰ পিছৰে পৰা কেন্দ্ৰীয় চৰকাৰৰ ওপৰত অধীক সৰৱ হৈ পৰিছে কংগ্ৰেছ নেতা ৰাহুল গান্ধী।
গলৱান উপত্যকাত পৰিৱেশ সুস্থিৰ কৰাৰ বাবে দুয়োখন দেশৰ শীৰ্ষ পৰ্যায়ৰ সেনা বিষয়াই পুনৰ আলোচনাত মিলিত হোৱাৰ সময়তে চীনে ভাৰতৰ মাটি দখল কৰা বুলি পুনৰ এবাৰ কেন্দ্ৰক আক্ৰমণ কৰিছে ৰাহুল গান্ধীয়ে।
মঙলবাৰে ৰাহুল গান্ধীয়ে টুইটাৰত ৰাজীৱ গান্ধীয়ে উঠোৱা এখন ছবি শ্বেয়াৰ কৰি লিখিছে, ‘আমি চীনৰ আক্ৰমণৰ বিৰুদ্ধে একতাৰে থিয় দিছো। কিন্তু ভাৰতৰ ভূমি চীনে দখল কৰিছে নেকি?’
ৰাহুল গান্ধীয়ে প্ৰথমবাৰৰ বাবে নহয়, ইয়াৰ পূৰ্বেও চীনে ভাৰতৰ মাটি দখল কৰা বুলি কেন্দ্ৰীয় চৰকাৰক উদ্দেশ্যি প্ৰশ্ন উত্থাপন কৰি আছে।
ইয়াৰ পূৰ্বে কৰা টুইটটোত ৰাহুলে লিখিছিল, ‘প্ৰধান মন্ত্ৰীয়ে কৈছে, কোনেও আমাৰ দেশত প্ৰৱেশ কৰা নাই, কোনেও আমাৰ মাটি দখল কৰা নাই। কিন্তু ছেটেলাইট ফটোত সম্পূৰ্ণ স্পষ্ট হৈ পৰিছে যে চীনে পেংগোং হ্ৰদৰ ওচৰত ভাৰত মাতৃৰ ভূমি দখল কৰিছে।’
আন এটা টুইটত তেওঁ কৈছিল যে চীনে আমাৰ সৈনিকক হত্যা কৰি ভূমি দখল কৰিলে। ইমানৰ পিছতো চীনে কিয় প্ৰধান মন্ত্ৰী মোদীৰ প্ৰসংশা কৰি আছে। চীনৰ আক্ৰমণাত্মক স্থিতিৰ বাবে ভাৰতে নিজৰ ভূমি চীনক এৰি দিছে নেকি বুলিও প্ৰশ্ন কৰে।
উল্লেখ্য যে যোৱা শুকুৰবাৰে প্ৰধান মন্ত্ৰী নৰেন্দ্ৰ মোদীয়ে সৰ্বদলীয় বৈঠকত চীনে ভাৰতৰ মাটিত প্ৰৱেশ কৰা নাই আৰু কোনো ভূমি দখল কৰা নাই বুলি মন্তব্য কৰাৰ পিছৰে পৰা ৰাহুল গান্ধীক এইদৰে সৰৱ হৈ পৰা পৰিলক্ষিত হৈছে।
