অপৰিষ্কাৰ শৌচাগাৰ! সেইবাবে ১০ ঘন্টা উৰিও গন্তব্য স্থানত উপনীত নহ’ল বিমানখন। দীৰ্ঘসময়ৰ কষ্টৰ অন্তত আকাশৰ মাজৰ পৰা যাত্ৰীক লৈ উভতি আহিল বিমানখন। যোৱা বৃহস্পতিবাৰে আমেৰিকাৰ চিকাগোৰ পৰা দিল্লী অভিমুখী এয়াৰ ইণ্ডিয়াৰ বিমানত সংঘটিত হয় এই ঘটনা। অৱশেষত বিমানখনৰ শৌচাগাৰ ব্যৱহাৰ কৰিব নোৱাৰা হৈ পৰাৰ পাছত চিকাগোলৈ উভতি যাব লগা হয়!
৬ মাৰ্চ বৃহস্পতিবাৰে এয়াৰ ইণ্ডিয়াৰ বিমান এ আই ১২৬ চিকাগোৰ অ’হেৰ আন্তঃৰাষ্ট্ৰীয় বিমানবন্দৰৰ পৰা দিল্লী অভিমুখে ৰাওনা হয়। কিন্তু হঠাৎ মিড এয়াৰত এটা ঘোষণা কৰা হ’ল যে জৰুৰীকালীন অৱস্থাৰ বাবে বিমানখন ডাইভাৰ্ট কৰা হৈছে। প্ৰায় ১০ ঘণ্টাৰ দীঘলীয়া যাত্ৰাৰ অন্তত যাত্ৰীসকলে চিকাগোলৈ উভতি যাব লগা হয়।
কিন্তু বিমান সংস্থাটোৱে এক বিবৃতি প্ৰকাশ কৰি কয় যে বিমানখন “কাৰিকৰী সমস্যা”ৰ বাবে চিকাগোলৈ ঘূৰাই পঠিওৱা হৈছে! যাত্ৰীসকলক তেওঁলোকৰ গন্তব্যস্থানলৈ লৈ যোৱাৰ বিকল্প ব্যৱস্থাও কৰা হৈছে। অৱশ্যে বিমানত থকা এজন ব্যক্তিয়ে কয় যে সমস্যাটো কাৰিকৰী দোষ নহয়, বৰঞ্চ শৌচাগাৰত পানী জমা হোৱাহে! বিমানখনৰ ১০টা শৌচাগাৰৰ ভিতৰত ৯টা শৌচাগাৰই ব্যৱহাৰ কৰিব নোৱাৰা হৈ পৰিছিল। মাত্ৰ এটা বিজনেছ ক্লাছৰ শৌচাগাৰহে চলি আছিল। সেয়ে অৱশেষত যাত্ৰীসকলৰ সুবিধাৰ কথা মনত ৰাখি পাইলটে উভতি অহাৰ সিদ্ধান্ত ল’বলগীয়া হ’ল।
উল্লেখ্য যে, বুধবাৰে পুৱা ১১ বজাত চিকাগোৰ পৰা উৰা মাৰিছিল বিমানখন। ৰাডাৰৰ তথ্য অনুসৰি গ্ৰীনলেণ্ডৰ উপকূল পাৰ হোৱাৰ কিছু সময়ৰ পাছতে বিমানখনে গতিপথ সলনি কৰিছিল। অৰ্থাৎ যাত্ৰা আৰম্ভ হোৱাৰ প্ৰায় চাৰি ঘণ্টা ২৫ মিনিট পাছতে বিমানখন ঘূৰিছিল। অৱশেষত নিশা ৯ মান বজাত উভতি আহিল বিমানখন। দিল্লী অভিমুখী বিমানখনত ৩০০ৰো অধিক যাত্ৰী আছিল। বিমান সংস্থাটোৱে এই দুৰ্নীতিৰ দায়িত্ব স্বীকাৰ কৰি যাত্ৰীসকলৰ বাবে বিনামূলীয়া বিকল্প ভ্ৰমণৰ ব্যৱস্থা কৰা হৈছে বুলি জানিবলৈ দিছে। যিসকলে এই সুবিধা লাভ কৰা নাছিল তেওঁলোককো সম্পূৰ্ণ ধন ঘূৰাই দিয়াৰ ব্যৱস্থা কৰা হ’ব।
