তিনিদিনীয়া ভ্ৰমণ সূচীৰে ভাৰতলৈ অহা আমেৰিকা যুক্তৰাষ্ট্ৰৰ নিৰাপত্তা সচিব লয়েড আষ্টিনে ভাৰতৰ কেন্দ্ৰীয় মন্ত্ৰীসকলৰ সৈতে হোৱা আলোচনাত ভাৰতত উলংঘন হোৱা মানৱ অধিকাৰ প্ৰসংগক সজোৰে উত্থাপন কৰিছে।
ভাৰতীয় সংখ্যালঘু বিশেষকৈ মুছলমানৰ ক্ষেত্ৰত উলংঘা কৰি অহা মানৱ অধিকাৰ প্ৰসংগসমূহ মাৰ্কিন নিৰাপত্তা সচিবগৰাকীয়ে আলোচনা কালত উপস্থাপন কৰিছে।
অৱশ্যে ৰাষ্ট্ৰীয় সংবাদ মাধ্যমত প্ৰকাশ পোৱা অনুসৰি প্ৰধানমন্ত্ৰী নৰেন্দ্ৰ মোদীৰ সৈতে অনুষ্ঠিত বৈঠকত মুছলমান সংখ্যালঘুৰ ওপৰত হোৱা মানৱ অধিকাৰ উলংঘনৰ সম্পৰ্কে আলোচনা কৰিবলৈ সক্ষম নহ’ল মাৰ্কিন নিৰাপত্তা সচিব আষ্টিন।
লগতে পঢ়ক : আলোচনাৰ পূৰ্বে ভাৰতৰ মানৱ অধিকাৰ ভংগৰ কথা সোঁৱৰাই দিলে শীৰ্ষ মাৰ্কিন নীতি নিৰ্ধাৰকে
মাৰ্কিন নিৰাপত্তা সচিবগৰাকীৰ মতে তেওঁ সাক্ষাৎ লাভ কৰা কেন্দ্ৰীয় কেবিনেটৰ সদস্যসকলৰ সৈতেহে এই বিষয়ে আলোচনা কৰিছে।
“তেওঁৰ সৈতে সেই বিষয়ে কথা পাতিবলৈ মই সুযোগ পোৱা নাছিলো। এই বিষয়ত কেবিনেটৰ আন সদস্যসকলৰ সৈতেহে মোৰ বাৰ্তালাপ হৈছিল।” মানৱ অধিকাৰ উলংঘনৰ বিষয়টোৰ সম্পৰ্কত এইদৰে কয় লয়েড আষ্টিনে।
“আমি মনত ৰাখিব লাগিব যে ভাৰত আমাৰ অংশীদাৰ, আৰু অংশীদাৰিত্বক আমি মূল্য দিছো। আৰু মই ভাবো অংশীদাৰসকলে এই ধৰণৰ আলোচনা কৰিবলৈ সক্ষম হোৱাতো প্ৰয়োজন। আৰু নিশ্চিতভাৱে আমি সেইটো কৰি সন্তোষ লাভ কৰিছো। আৰু আপুনি সেই আলোচনাবোৰ অতি অৰ্থপূৰ্ণ ধৰণে কৰিব পাৰে আৰু সেই ধৰণেৰে আগবঢ়াই নিব পাৰে।” তেওঁ লগতে কয়।
লগতে পঢ়ক : প্ৰধানমন্ত্ৰী মোদীৰে বৈঠকত অংশগ্রহণ মাৰ্কিন প্ৰতিৰক্ষা সচিব লয়েড আষ্টিনৰ
উল্লেখ্য যে মাৰ্কিন চিনেট ফৰেইন ৰিলেশ্যন কমিটিৰ অধ্যক্ষ ব’ব মেনেণ্ডেজে ভাৰতত গণতন্ত্ৰৰ অৱনতি হোৱা বুলি উল্লেখ কৰি এক পত্ৰৰ যোগে আষ্টিনক ভাৰতত উলংঘন হৈ থকা মানৱ অধিকাৰ প্ৰসংগটো আলোচনা কালত উত্থাপন কৰিবলৈ পৰামৰ্শ দিছিল।
মেনেণ্ডেজে আনকি ভাৰতত সংখ্যালঘু মুছলমানৰ ওপৰত, কা বিৰোধী আন্দোলন, কৃষি আইন বিৰোধী আন্দোলন, জন্মু আৰু কাশ্মীৰৰ পৰা ৩৭০ প্ৰত্যাহাৰ কৰাৰ সময়ত সংঘটিত মানৱ অধিকাৰৰ উলংঘনে ভাৰতত গণতন্ত্ৰক অৱনমন কৰা বুলিও দাবী কৰিছিল।