নতুন দিল্লীত চলি থকা ইণ্ডিয়া অ’পেন ছুপাৰ ৭৫০ বেডমিণ্টন প্রতিযোগিতাক লৈ এতিয়া তীব্ৰ বিতৰ্কৰ সৃষ্টি হৈছে। ৰাষ্ট্ৰীয় ৰাজধানীখনৰ বায়ুৰ গুণাগুণ, পৰিষ্কাৰ-পৰিচ্ছন্নতাৰ অভাৱ আৰু খেলপথাৰৰ মাজত জীৱ-জন্তুৰ উপস্থিতিক লৈ বিশ্বৰ বিভিন্ন দেশৰ তাৰকা খেলুৱৈসকলে মুকলি অসন্তুষ্টি প্ৰকাশ কৰিছে। ১৩ জানুৱাৰীৰ পৰা ১৮ জানুৱাৰীলৈ অনুষ্ঠিত হোৱা এই প্ৰতিযোগিতাখনত খেলুৱৈসকলে সন্মুখীন হোৱা বিভিন্ন অসুবিধাৰ বাবে আয়োজক ভাৰতে সমালোচনাৰ সন্মুখীন হ’বলগীয়া হৈছে। বিশেষকৈ ইন্দিৰা গান্ধী ক্ৰীড়া কমপ্লেক্স আৰু কে ডি জাধৱ ইনড’ৰ হলৰ দৰে স্থানত বান্দৰ আৰু চৰাইৰ উপদ্ৰৱে খেলৰ পৰিৱেশ বিনষ্ট কৰা বুলি অভিযোগ উঠিছে।
প্ৰতিযোগিতাৰ মাজতে ডেনমাৰ্ক আৰু কোৰিয়াৰ খেলুৱৈসকলে ছ’চিয়েল মিডিয়াৰ জৰিয়তে দিল্লীৰ খেলপথাৰৰ দুৰৱস্থাৰ কথা ৰাজহুৱা কৰিছে। এগৰাকী ফটোগ্ৰাফাৰে ক’ৰ্টৰ নিচেই কাষতে বান্দৰ বহি থকাৰ দৃশ্য ভাইৰেল কৰাৰ লগতে ডেনিছ খেলুৱৈসকলে ইনড’ৰ হলৰ ভিতৰত চৰাইৰ মল-মূত্ৰ পৰি থকাৰ অভিযোগ তুলিছে। আনকি এইচ এছ প্ৰানয়ৰ দৰে শীৰ্ষ খেলুৱৈৰ মেচ চলি থকাৰ সময়তো চৰাইয়ে ক’ৰ্টত আৱৰ্জনা পেলোৱাৰ বাবে খেল কিছু সময় বন্ধ ৰাখি চাফাই কৰিবলগীয়া হৈছিল। কোৰিয়াৰ খেলুৱৈ কাং মিন হ্যুকেও অনুশীলন স্থানত বান্দৰৰ উপস্থিতি দেখি ব্যংগাত্মক মন্তব্য কৰা দেখা গৈছে। ডেনিছ খেলুৱৈ মিয়া ব্লিচফেল্ডে খেলুৱৈৰ স্বাস্থ্য আৰু পৰিচ্ছন্নতাৰ বিষয়টো লৈ গভীৰ উদ্বেগ প্ৰকাশ কৰিছে।
দিল্লীৰ প্ৰদূষণৰ মাত্ৰা অধিক হোৱাৰ বাবেই বিশ্বৰ ৩ নম্বৰ স্থানৰ খেলুৱৈ এণ্ডাৰছ এণ্টনচেনে এইবাৰ প্ৰতিযোগিতাখনৰ পৰা নিজৰ নাম প্ৰত্যাহাৰ কৰিছে। তেওঁৰ মতে, দিল্লীৰ বায়ুৰ গুণাগুণ বেডমিণ্টনৰ দৰে খেলৰ বাবে একেবাৰেই উপযুক্ত নহয়। এই সকলোবোৰ অভিযোগৰ পাছত বিশ্ব বেডমিণ্টন ফেডাৰেচনে এক বিবৃতি জাৰি কৰি পৰিস্থিতি পৰ্যালোচনা কৰাৰ কথা জনাইছে। তেওঁলোকে স্বীকাৰ কৰিছে যে ঠাণ্ডা, কুঁৱলী আৰু বায়ু প্ৰদূষণে খেলুৱৈসকলৰ বাবে প্ৰত্যাহ্বানৰ সৃষ্টি কৰিছে। অৱশ্যে ভাৰতীয় বেডমিণ্টন এছ’চিয়েশ্যনে এই সমস্যাবোৰ সমাধানৰ বাবে তাৎক্ষণিক পদক্ষেপ লোৱা বুলি দাবী কৰিছে। আগন্তুক আগষ্ট মাহত ভাৰততে বিশ্ব বেডমিণ্টন চেম্পিয়নশ্বিপ অনুষ্ঠিত হ’ব, তাৰ পূৰ্বে ইণ্ডিয়া অ’পেনত হোৱা এনে বিশৃংখলতাই ক্ৰীড়াপ্ৰেমীসকলক চিন্তিত কৰি তুলিছে।
