পশ্চিম অসমৰ ধুবুৰী জিলাৰ চাপৰ থানাৰ অন্তৰ্গত আৰু ইয়াৰ উপকণ্ঠ অঞ্চলত আজি বহু দিনৰে পৰা একাংশই গোটেই নিশা জুৰি বিকট শব্দৰ মাজেৰে প্ৰকাণ্ড প্ৰকাণ্ড আকৃতিৰ” ডিজে ” বজাই ৰাইজৰ টোপনি হৰণ কৰাৰ লগতে ছাত্ৰ ছাত্ৰী সকলৰ পঢ়া শুনা কৰাত অসুবিধাৰ সৃষ্টি কৰাত অলপো কুণ্ঠা বোধ কৰা নাই ।
সমাজ সচেতন ব্যক্তি সকলে এই কাৰ্য্যক তীব্ৰ ভাবে গৰিহণা দি এই প্ৰথা বন্ধ কৰাৰ বাবে আৰক্ষী- প্ৰশাসনক অনুৰোধ কৰিছে।
ৰাজ্য চৰকাৰে বলবৎ কৰা নতুন এছ ও পি মতে নিশা ১০ বজাৰ পৰা পুৱা ৬ বজালৈকে কাৰ্ফিউ। কিন্তু এনে নিয়মৰ মাজতো তেনে স্থানত গোটেই নিশা “ডিজে” বজাই ৰাইজক অসুবিধাত পেলাই যাব নেকি বুলি সচেতন মহলে প্ৰশাসনক প্ৰশ্ন কৰিছে।
ৰাইজে অভিযোগ কৰা মতে এই বিকট শব্দযুক্ত “ডিজে” যি স্থানত বজোৱা হয় সেই ঠাইৰ লগতে বহু দূৰ লৈকে কাণেৰে সহিব নোৱাৰা শব্দ হয় আৰু মাটিত কম্পনৰ সৃষ্টি হয়।
ইয়াৰ ফলত বেমাৰীৰ লগতে কণ কণ শিশুসকলৰ বহু ক্ষতি হৈছে।
