হাতীগাঁওস্থিত মাডাৰ্ছ অল্ড এজ হোম পৰিচালনাৰ ক্ষেত্ৰত দুজন মালিকৰ মাজত উৎপত্তি হোৱা তথা বিভিন্ন সংবাদ মাধ্যমত স্থান পোৱা সংঘাতৰ বিষয়ত দণ্ডাধীশ পৰ্যায়ৰ তদন্তৰ নিৰ্দেশ দিছে কামৰূপ মহানগৰ জিলা দণ্ডাধীশ বিশ্বজিৎ পেগুৱে।
বৃহস্পতিবাৰে অতিৰিক্ত জিলা দণ্ডাধীশ সুস্বপ্না কাকতিক তদন্তৰ দায়িত্ব অৰ্পন কৰি জিলা দণ্ডাধীশগৰাকীয়ে ৭২ঘন্টাৰ ভিতৰত তদন্তৰ প্ৰতিবেদন দাখিল কৰাৰ নিৰ্দেশ দিছে। ইয়াৰ পাছতে এই প্ৰতিবেদন চৰকাৰলৈ প্ৰেৰণ কৰা হ’ব।
ইয়াৰ পূৰ্বে হাতীগাঁওস্থিত মাডাৰ্ছ অল্ড এজ হোম পৰিচালনাৰ ক্ষেত্ৰত শেহতীয়াকৈ সৃষ্টি হোৱা বেমেজালিৰ ঘটনা দৃষ্টিগোচৰ হোৱাৰ পাছত মুখ্যমন্ত্ৰী ডঃ হিমন্ত বিশ্ব শৰ্মাই বৃদ্ধাৱাসখনত সংঘটিত সমগ্ৰ ঘটনাৰাজিৰ তদন্ত কৰি ৭২ ঘণ্টাৰ ভিতৰত প্ৰতিবেদন দাখিল কৰিবলৈ কামৰূপ (মহানগৰ) জিলাৰ উপায়ুক্তক নিৰ্দেশ দিছিল।
মুখ্যমন্ত্ৰীয়ে মাডাৰ্ছ অল্ড এজ হোমৰ শেহতীয়া পৰিস্থিতি ব্যক্তিগতভাৱে তদাৰক কৰিবৰ বাবে সমাজ কল্যাণ মন্ত্ৰী অজন্তা নেওগক নিৰ্দেশ প্ৰদান কৰিছিল।
উল্লেখ্য যে মাডাৰ্ছ অল্ড এজ হোম পৰিচালনাৰ সৈতে জড়িতসকলৰ মাজত বিভিন্ন বিষয়কলৈ সৃষ্টি হোৱা মতানৈক্যৰ ফলত বৃদ্ধাশ্ৰমখন বন্ধ হৈ পৰাৰ উপক্ৰম ঘটিছিল।
ইয়াৰ ফলত ৯ বছৰ পুৰণি বৃদ্ধাশ্ৰম খনত থকা আইতাসকলে চৰম অনিশ্চয়তাৰ মাজেৰে সময় পাৰ কৰিবলগীয়া হৈছে।