ঘৰখন পৰিষ্কাৰ কৰি ৰখাৰ বাবে আমি প্ৰায়েই বাহিৰৰ জোতা-চেণ্ডেল দুৱাৰমুখতে খুলি থৈ ভিতৰলৈ যাওঁ। বহুতে আকৌ ঘৰৰ ভিতৰত খালী ভৰিৰে খোজ কাঢ়িবলৈ আৰামদায়ক বুলি ভাবে। তেওঁলোকৰ ধাৰণা যে এনে কৰিলে ঘৰখন লেতেৰা নহয়। কিন্তু আপোনাৰো যদি এনে অভ্যাস আছে তেন্তে এতিয়াই সাৱধান হোৱা উচিত। বিশেষজ্ঞসকলৰ মতে ঘৰৰ ভিতৰত দীৰ্ঘসময় খালী ভৰিৰে খোজ কাঢ়িলে ভৰি, গাঁঠি আৰু মেৰুদণ্ডৰ স্বাস্থ্যৰ বাবে ই ক্ষতিকৰ হ’ব পাৰে। এই অভ্যাসৰ পৰাই শৰীৰত নানা গুৰুতৰ সমস্যাই দেখা দিব পাৰে।
টাইম মেগাজিনৰ এক শেহতীয়া প্ৰতিবেদন অনুসৰি ঘৰৰ মজিয়াখন দেখাত যিমানেই পৰিষ্কাৰ যেন নালাগক কিয় তাত চকুৰে নেদেখা বহুতো বেক্টেৰিয়া, ভেঁকুৰ আৰু বীজাণু থাকিব পাৰে। বিশেষকৈ পাকঘৰ আৰু স্নানাগাৰৰ ওচৰৰ ঠাইবোৰত আৰ্দ্ৰতা বা সেমেকা ভাব বেছি থাকে যিয়ে ভেঁকুৰৰ সংক্ৰমণৰ আশংকা বৃদ্ধি কৰে। খালী ভৰিৰে খোজ কাঢ়িলে ভৰিৰ আঙুলিৰ মাজত হোৱা সংক্ৰমণ, খজুৱতি, দাদ, ভৰিৰ গোৰোহা ফাটা আৰু ছালত জ্বলা-পোৰা কৰাৰ দৰে সমস্যা হ’ব পাৰে। যাৰ ছাল বেছি সংবেদনশীল বা ভৰিত আগৰে পৰা কিবা কটা-চিঙা বা ক্ষত আছে তেওঁলোকৰ বাবে সংক্ৰমণৰ আশংকা অধিক বেছি হৈ পৰে।
আমাৰ মাজৰ বহুতৰে পাকঘৰত ৰন্ধা-বঢ়া কৰাৰ সময়ত, খটখটী বগাওঁতে বা ঘৰ চাফা কৰাৰ সময়ত খালী ভৰিৰে থকাৰ অভ্যাস আছে। এই সকলোবোৰ কাম টান মজিয়াৰ ওপৰত কোনো ধৰণৰ ছাপৰ্ট নোহোৱাকৈ কৰা হয়। ইয়াৰ ফলত ভৰিৰ তলত থকা কোমল চৰ্বিৰ তৰপটোৱে সমগ্ৰ শৰীৰৰ চাপ চম্ভালিব লগা হয়। নিয়মিতভাৱে এনে চাপ পৰাৰ ফলত ভৰি ফুলা, বিষ আৰু ভাগৰুৱা অনুভৱ হ’ব পাৰে যিয়ে পৰৱৰ্তী সময়ত মেটাটাৰচেলজিয়া বা প্লান্টাৰ ফেচিয়াইটিছৰ দৰে দীৰ্ঘদিনীয়া যন্ত্ৰণাদায়ক ৰোগৰ সৃষ্টি কৰিব পাৰে।
বিশেষকৈ ডায়বেটিছত আক্ৰান্ত ৰোগীসকলৰ বাবে ঘৰৰ ভিতৰত খালী ভৰিৰে খোজ কঢ়াটো অধিক বিপদজনক। এই ৰোগত ভৰিৰ স্নায়ুৰ সংবেদনশীলতা কমি যায় যাৰ ফলত ভৰিৰ যিকোনো সৰু আঘাত, ফোসকা বা কটা-চিঙা সহজতে ধৰা পৰি নাযায়। মজিয়াত পৰি থকা সামান্য কোনো বস্তুৰ পৰাও গুৰুতৰ ক্ষত বা সংক্ৰমণৰ সৃষ্টি হ’ব পাৰে। বিশেষজ্ঞসকলৰ মতে ঘৰৰ ভিতৰতো সঠিক চেণ্ডেল পিন্ধিলে শৰীৰৰ ভাৰসাম্য ৰক্ষা হয় আৰু যিকোনো আঘাতৰ পৰা হাত সাৰিব পাৰি।
টাইলছ বা মাৰ্বলৰ দৰে টান মজিয়াৰ ওপৰত খালী ভৰিৰে খোজ কাঢ়িলে গোৰোহা, আঁঠু আৰু কঁকালত অতিৰিক্ত চাপ পৰে। ইয়াৰ ফলত গোৰোহাৰ বিষ, গাঁঠি টান হৈ যোৱা আৰু পিঠিৰ বিষৰ দৰে সমস্যাই দেখা দিব পাৰে। ঠাণ্ডা মজিয়াত খালী ভৰিৰে বেছি সময় থাকিলে শৰীৰৰ তাপমাত্ৰাৰ ওপৰতো প্ৰভাৱ পৰে যাৰ ফলত চৰ্দি-কাহ বা ভৰিৰ পেশী জঠৰ হৈ পৰিব পাৰে। শিশু আৰু বৃদ্ধসকলৰ ক্ষেত্ৰত এই প্ৰভাৱ বেছি সোনকালে দেখা যায়। দীৰ্ঘ সময় ধৰি ঠাণ্ডা মজিয়াৰ সংস্পৰ্শত থাকিলে পেশীত টান ধৰা বা খিঁচুনীৰ দৰে সমস্যাও হ’ব পাৰে।
