যোৱা তিনি বছৰত প্ৰায় ৯০০টা অবৈধ গৰ্ভপাত! ত্ৰিশ হাজাৰ টকাৰ বিনিময়ত কৰা হৈছিল এই প্ৰতিটো গৰ্ভপাত। অৱশেষত এই অবৈধ ৰেকেট চলাই থকা চিকিৎসকজন পৰিছে আৰক্ষীৰ ফান্দত।
এই আইন বিৰোধী কাৰ্যকলাপত জড়িত থকাৰ অভিযোগত চিকিৎসকজনৰ লগতে তেওঁৰ লেব টেকনিচিয়ানকো গ্ৰেপ্তাৰ কৰিছে আৰক্ষীয়ে। এই ঘটনা সংঘটিত হৈছে কৰ্ণাটকৰ বাংগালুৰুত।
অভিযোগ অনুসৰি, ডাঃ চন্দন বাল্লাল আৰু তেওঁৰ লেব টেকনিচিয়ান নিছাৰে মাইচুৰুৰ এখন চিকিৎসালয়ত চলাই আছিল এই অবৈধ কাৰ্যকলাপ। প্ৰতিটো গৰ্ভপাতৰ বাবে তেওঁলোকে প্ৰায় ৩০ হাজাৰ টকাকৈ সংগ্ৰহ কৰিছিল।
যোৱা সপ্তাহত দুয়োকে আৰক্ষীয়ে জিম্মাত লৈছিল। আৰক্ষীয়ে সদৰী কৰা মতে, চলিত মাহৰ আৰম্ভণিতে চিকিৎসালয়খনৰ মেনেজাৰ মীনা আৰু ৰিচেপচনিষ্ট ৰিজমা খানক গ্ৰেপ্তাৰ কৰা হৈছিল।
যোৱা মাহত মাইচুৰুৰ সমীপৰ মাণ্ডিয়াত আৰক্ষীয়ে এক লিংগ নিৰ্ণয় আৰু মহিলা ভ্ৰুণ হত্যাৰ ৰেকেট উৎখাত কৰিছিল। এই ৰেকেটৰ সৈতে জড়িত থকাৰ অভিযোগত শিৱলিংগে গৌড়া আৰু নয়ন কুমাৰ নামৰ দুজন ব্যক্তিক গ্ৰেপ্তাৰ কৰা হৈছিল।
আৰক্ষীৰ জেৰাৰত দুয়ো মাণ্ডিয়াত আল্ট্ৰাছাউণ্ড স্কেন চেণ্টাৰ হিচাপে ব্যৱহাৰ কৰা গুড় প্ৰস্তুতকাৰী এক স্থানৰ বিষয়ে স্বীকাৰ কৰে আৰু উক্ত স্থানৰ পৰা পিছত আৰক্ষীয়ে স্কেন মেচিনটো জব্দ কৰে।
এই ৰেকেটটোৰ পিছৰ পৰ্যায়ৰ তদন্তত মাইচুৰুৰ চিকিৎসকগৰাকীৰ কাণ্ড পোহৰলৈ আহে। এই বৃহৎ ৰেকেটৰ সৈতে জড়িত আন লোকসকলক গ্ৰেপ্তাৰৰ বাবে তদন্ত চলাই থকা হৈছে বুলি এগৰাকী আৰক্ষী বিষয়াই সদৰী কৰে।
