মহাৰাষ্ট্ৰৰ বুলকানাৰ এখন চৰকাৰী চিকিৎসালয়ত সংঘটিত হৈছে এক অদ্ভুত কাণ্ড, য’ত এগৰাকী গৰ্ভৱতী মহিলাৰ ছ’ন’গ্ৰাফীৰ পাছত পোহৰলৈ আহিছে চাঞ্চল্যকৰ তথ্য। ছ’ন’গ্ৰাফী ৰিপ’ৰ্টত দেখা গৈছে যে, গৰ্ভৱতী মহিলাৰ পেটত এটা কেঁচুৱাৰ উপৰিও সেই কেঁচুৱাটোৰ পেটত আন এটা কেঁচুৱা আছে।
দুদিন পূৰ্বে মোটালা তহচিলৰ এখন গাঁৱৰ এগৰাকী ৩২ বছৰীয়া গৰ্ভৱতী মহিলা চৰকাৰী মহিলা চিকিৎসালয়লৈ গৈছিল। তাতে ডাঃ প্ৰসাদ আগৰৱালাই ছ’নোগ্ৰাফী কৰি গৰ্ভত আন এটা কেঁচুৱাৰ অস্তিত্ব আৱিষ্কাৰ কৰে। ডাঃ আগৰৱালাই ছ’ন’গ্ৰাফী অধিক বিশদভাৱে পৰীক্ষা কৰি মহিলাগৰাকীৰ গৰ্ভস্থ শিশুটিৰ পেটত আন এটা অপৰিপক্ক কেঁচুৱা আছে বুলি নিশ্চিত কৰে।
ইয়াৰ পাছতে তেওঁ উচ্চ কৰ্তৃপক্ষক ঘটনাৰ খবৰ দিয়ে আৰু প্ৰসৱৰ সময়ত কোনো ধৰণৰ জটিলতাৰ পৰা হাত সাৰিবলৈ মহিলাগৰাকীক সম্ভাজিনগৰলৈ প্ৰেৰণ কৰে। স্ত্ৰীৰোগ বিশেষজ্ঞ ডাঃ প্ৰসাদ আগৰৱালাই কয় যে মহিলাগৰাকীৰ কোনো সমস্যাৰ আশংকা নাই যদিও শিশুটিৰ সোনকালে চিকিৎসা নকৰিলে ইয়াৰ শাৰীৰিক বৃদ্ধি স্তব্ধ হ’ব পাৰে।
চিভিল চাৰ্জন ডা. ভাগৱত ভূছাৰীয়ে কয় যে চিকিৎসাৰ ক্ষেত্ৰত এই পৰিস্থিতিক ‘ভ্ৰুণ-ভ্ৰুণ’ (ভ্ৰূণত ভ্ৰুণ) বুলি কোৱা হয়, যিটো পৃথিৱীত অতি বিৰল। বিশ্বত এনেধৰণৰ মাত্ৰ ২০০টা ঘটনা সংঘটিত হৈছে, ইয়াৰে ১৫ৰ পৰা ২০টা ভাৰতত সংঘটিত হৈছে।
