ক’ৰ’ণা ভাইৰাছেই শেষ অতিমাৰী নহয়, ক’ৰ’ণাৰ ভেকচিন ওলোৱাৰ পিছতো বিশ্বাবাসীক আন এক অতিমাৰীয়ে আক্ৰান্ত কৰিব।
এই অতিমাৰীৰ ধ্বংসলীলা ক’ৰ’ণাতকৈও বেছি হ’ব।
নতুন ৰোগ বিধক ‘ডিজিজ এক্স’ নামেৰে নামকৰণ কৰিছে এজন বিজ্ঞানীয়ে।
নতুন ধৰণৰ ৰোগ বিধৰ প্ৰাদুৰ্ভাৱৰ কথা প্ৰকাশ কৰি বিশ্ববাসীক সচেতন কৰি দিছে ইবোলা ভাইৰাছৰ আৱিষ্কাৰক জাঁ জাক মুয়েম্বেই।
বিজ্ঞানীগৰাকীয়ে প্ৰকাশ কৰা মতে কংগোৰ এখন চিকিৎসালয়ত এগৰাকী জ্বৰত ভোগা মহিলাৰ চিকিৎসা কৰিবলৈ গৈ চিকিৎসকে প্ৰথমে ‘ডিজিজ এক্স’ নামৰ ৰোগ বিধৰ উপস্থিতিৰ কথা ধৰা পেলায়।
এই ৰোগৰো এটা প্ৰধান লক্ষণ জ্বৰ। সৌসিদিনা ইবোলাই আফ্ৰিকাৰ দেশ সমূহত ত্ৰাসৰ সৃষ্টি কৰিছিল।
নতুন ৰোগ বিধ ইবোলাতকৈও অধিক ভয়ংকৰ হোৱাৰ আশংকা ব্যক্ত কৰিছে ১৯৭৬ চনত ইবোলা ভাইৰাছ প্ৰথমে চিনাক্ত কৰা বিজ্ঞানী জাঁ জাক মুয়েম্বেই।
তেওঁৰ মতে আফ্ৰিকাৰ ঘন অৰণ্যতেই এই নতুন ৰোগ বিধৰ ভাইৰাছৰ উৎপত্তি হোৱাৰ পূৰ্ণ সম্ভাৱনা আছে।
যদি এই ভাইৰাছবিধ বিশ্বৰ আন ঠাইলৈকেও বিয়পি পৰে তেন্তে পৰিস্থিতি ক’ৰ’ণাই সৃষ্টি কৰা পৰিস্থিতিতকৈও বেছি ভয়াৱহ হোৱাৰ আশংকা আছে।