কোভিড১৯ত আক্ৰান্তৰ আত্মীয়ই আক্ৰমণ কৰাৰ পিছত তেলেংগানাত কণিষ্ঠ চিকিৎসকে বৰ্জন কৰিছে নিজৰ ডিউটী।
তেলেংগানাৰ হায়দৰাবাদস্থিত গান্ধী জেনেৰেল হাস্পতালৰ প্ৰায় ২০০ কণিষ্ঠ চিকিৎসকে আনকি প্ৰতিবাদী কাৰ্যসূচীতো অংশগ্ৰহণ কৰিছে।
যোৱা মঙলবাৰে নিশা হাস্পতালখনত চিকিৎসাধীন এগৰাকী কোভিড১৯ত আক্ৰান্তৰ মৃত্যু হোৱাৰ পিছত ৰোগীৰ আত্মীয় লোকে এজন কণিষ্ঠ চিকিৎসক আক্ৰমণ কৰিছিল।
উক্ত আক্ৰমণৰ প্ৰতিবাদ স্বৰূপে কণিষ্ঠ চিকিৎসকলে ধৰ্ণা দিয়াৰ লগতে ডিউটী বৰ্জনৰ কাৰ্যসূচী লৈছে।
জানিব পৰা মতে ৰাজ্যখনৰ উক্ত চিকিৎসালয়খনত কোভিড১৯ ৰোগীক চিকিৎসাৰ বাবে উপযুক্ত আন্তঃগাঠনি আছে।
তাৰপিছতো ৫৫ বৰ্ষীয় কোভিড১৯ আক্ৰান্ত লোকজনে পত্নী আৰু পুত্ৰৰ সৈতে চিকিৎসাৰ বাবে চিকৎসালয়খনত ভৰ্তি হোৱাৰ পিছত শৌচালয়ত পৰি ৰোগীজনৰ মৃত্যু ঘটাৰ পিছত প্ৰশ্নৰ উদ্ৰেক হৈছে।
এই ঘটনাত ক্ষুব্ধ হৈ ৰোগীজনৰ পৰিয়ালৰ লোকে এজন কণিষ্ঠ চিকিৎসকক আক্ৰমণ কৰে।
চিকিৎসকসকলে দাবী কৰিছে যে কোভিড১৯ ৰোগীজনক তেওঁৰ বিচনা নেৰিবলৈ বাৰে বাৰে বাধা প্ৰদান কৰিছিল যদিও ৰোগীজনে সেয়া মনা নাছিল।
কণিষ্ঠ চিকিৎসকসকলে অভিযোগ কৰিছে যে মৃত লোকজনৰ পৰিয়ালৰ লোকে সংশ্লিষ্ট চিকিৎসকগৰাকীক চকীৰে আক্ৰমণ কৰে।
চিকিৎসকৰ অভিযোগৰ ভিত্তিত ইতিমধ্যে মৃত লোকজনৰ পুত্ৰ আৰু এজন খুলশালিয়েকক হায়দৰাবাদ আৰক্ষীয়ে গ্ৰেপ্তাৰ কৰিছে।
ইফালে ধৰ্ণাৰত কণিষ্ঠ চিকিৎসকসকলক সাক্ষাৎ কৰি তেলেংগানাৰ স্বাস্থ্যমন্ত্ৰী এটালা ৰাজেন্দ্ৰই কথা পাতিব বুলি আশা কৰিছে ৰাজ্যখনৰ কণিষ্ঠ চিকিৎসক সন্থাৰ সাধাৰণ সম্পাদক ডাঃ কেইজাৰ হুছেইনে।
