জুবিন গাৰ্গ শুকুৰবাৰে এই বাতৰি লিখাৰ পৰলৈকে সম্পূৰ্ণৰূপে সংকটমুক্ত হৈছে।
নেমকেয়াৰ হস্পিটেলৰ হৃদশল্য বিশেষজ্ঞ ডাঃ অপূৰ্ব কুমাৰ শৰ্মাই সংবাদমাধ্যমক এই কথা অৱগত কৰিছে।
ইয়াৰ পূৰ্বে হস্পিটেলখনৰ আন এজন চিকিৎসক ডাঃ হিতেশ বৰুৱায়ো জুবিন সংকটমুক্ত বুলি সদৰী কৰিছিল।
চিকিৎসকে জনোৱা মতে, জনপ্ৰিয় শিল্পীগৰাকীৰ জ্ঞান ঘূৰি আহিছে।
চিকিৎসকে তেওঁৰ হঠাৎ মুৰ্চ্ছা যোৱাৰ কাৰণ সন্দৰ্ভত এতিয়াও মন্তব্য আগবঢ়োৱা নাই।
তেওঁৰ হঠাৎ অসুস্থতাৰ কাৰণ জানিবলৈ চিকিৎসকে বিভিন্ন পৰীক্ষা আৰম্ভ কৰিছে।
সদ্যহতে জুবিনক আই চি ইউত ৰখা হ’ব। ডাঃ বৰুৱাই জনোৱা মতে, শিল্পীজনৰ শাৰীৰিক অৱস্থাক সম্পূৰ্ণ নিৰীক্ষণত ৰখাৰ বাবে তেওঁক আই চি ইউত ৰখাৰ সিদ্ধান্ত লোৱা হৈছে।
শুকুৰবাৰে সন্ধিয়া গুৱাহাটী টাউন ক্লাবত এটা বিশেষ অনুষ্ঠানৰ মাজতে জুবিন হঠাৎ অসুস্থ হৈ পৰিছিল।
অচেতন প্ৰায় হৈ মাটিত ঢলি পৰিবৰ উপক্ৰম হোৱা অৱস্থাতে কাষতে থকা অনুৰাগী আৰু বন্ধুবৰ্গই কোনোমতে নপৰাকৈ ৰাখিবলৈ সক্ষম হয় সকলো অসমীয়াৰ মৰমৰ শিল্পীজনক।