সাধাৰণতে আমাৰ পেটৰ বিষ হ’লে আমি তাক এচিডিটি বা কোষ্ঠকাঠিন্য বুলি ভাবি ঘৰুৱা ঔষধ খাই আওকাণ কৰো। কিন্তু পেটৰ ওপৰৰ সোঁফালে হোৱা তীব্ৰ বিষ কেতিয়াবা পিত্তথলী বা গ’লব্লাডাৰৰ পাথৰৰ লক্ষণ হ’ব পাৰে। আমাৰ যকৃতে নিঃসৰণ কৰা পিত্ত ৰস পিত্তথলীত জমা হৈ থাকে আৰু ই পাচন প্ৰক্ৰিয়াত সহায় কৰে। কিন্তু যদি আমাৰ জীৱনশৈলী আৰু খাদ্যাভ্যাস সঠিক নহয় তেন্তে এই পিত্ত ৰস ক্ৰমান্বয়ে ঘন হৈ কঠিন পাথৰৰ দৰে হৈ পৰে। বিশেষকৈ খাদ্যত অধিক চৰ্বি আৰু শৰ্কৰাৰ ব্যৱহাৰ, আঁহযুক্ত খাদ্যৰ অভাৱ, মেদবহুলতা আৰু শাৰীৰিক পৰিশ্ৰম নকৰাৰ বাবে পিত্তত ক’লেষ্টৰেলৰ পৰিমাণ বৃদ্ধি পায় আৰু ই পাথৰ গঠনত অৰিহণা যোগায়। এই সমস্যাই পৰৱৰ্তী সময়ত পিত্তথলীৰ কৰ্কট ৰোগৰ দৰে ভয়াৱহ পৰিস্থিতিও সৃষ্টি কৰিব পাৰে।
পিত্তথলী আমাৰ যকৃতৰ পিছফালে থকা এখন সৰু মোনাৰ দৰে অংগ যি পাচন এনজাইমবোৰ ধৰি ৰাখে। আমি আহাৰ গ্ৰহণ কৰাৰ পিছত পিত্তথলীয়ে এই ৰস ক্ষুদ্ৰান্ত্ৰলৈ পঠিয়াই দিয়ে যাৰ দ্বাৰা খাদ্য হজম হয়। কিন্তু যদি পিত্তথলীখন সঠিকভাৱে খালী নহয় তেন্তে তাত থকা ক’লেষ্টৰেল স্ফটিকীয় হৈ পাথৰৰ ৰূপ লয়। বিশেষজ্ঞসকলৰ মতে পুৰুষতকৈ মহিলাসকল এই ৰোগত বেছিকৈ আক্ৰান্ত হোৱা দেখা যায়। ডায়েবেটিছ, উচ্চ ৰক্তচাপ আৰু উচ্চ ক’লেষ্টৰেল থকা লোকসকলৰ ক্ষেত্ৰত এই আশংকা অধিক থাকে। কেতিয়াবা এই পাথৰৰ বাবে পিত্তনলী বন্ধ হৈ পৰিব পাৰে যাৰ ফলত জণ্ডিছ বা অগ্নাশয়ৰ প্ৰদাহ অৰ্থাৎ পেংক্ৰিয়েটাইটিছৰ দৰে মাৰাত্মক সমস্যাৰ সৃষ্টি হয়।
পিত্তথলীৰ পাথৰ হ’লে শৰীৰত বিভিন্ন লক্ষণে দেখা দিয়ে। পেটৰ সোঁফালে অসহ্যকৰ বিষ হোৱাৰ লগতে বমি বমি ভাব, ভোক কমি যোৱা আৰু সঘনাই গেছ বা এচিডিটি হোৱা ইয়াৰ প্ৰাথমিক লক্ষণ। যদি পাথৰৰ বাবে পিত্তৰ প্ৰবাহ বন্ধ হয় তেন্তে জ্বৰ, শৰীৰৰ বিষ আৰু চকু-মুখ হালধীয়া পৰা দেখা যায় যাক অব্ষ্ট্ৰাক্টিভ জণ্ডিছ বুলি কোৱা হয়। যিসকল মহিলাই জন্ম নিয়ন্ত্ৰণৰ বড়ি ব্যৱহাৰ কৰে বা যিসকলে অতিমাত্ৰা জাংক ফুড আৰু চেনি খায় তেওঁলোকৰ ক্ষেত্ৰত এই ৰোগৰ সম্ভাৱনা বেছি। লগতে অতিৰিক্ত ওজন আৰু যকৃতৰ পুৰণি ৰোগ থাকিলেও পিত্তথলীত পাথৰ হ’ব পাৰে।
এই সমস্যাৰ পৰা হাত সাৰিবলৈ স্বাস্থ্যকৰ জীৱনশৈলী গ্ৰহণ কৰাটো অতি জৰুৰী। চাহ, কফি, ধূমপান আৰু মদ্যপানৰ পৰা আঁতৰত থকাৰ লগতে দৈনিক পুৱা খালী পেটত কুহুমীয়া পানীৰ সৈতে নেমুৰ ৰস খালে উপকাৰ পোৱা যায়। ভিটামিন চি যুক্ত খাদ্য আৰু সেউজীয়া শাক-পাচলিয়ে শৰীৰৰ ৰোগ প্ৰতিৰোধ ক্ষমতা বঢ়ায় আৰু ক’লেষ্টৰেল নিয়ন্ত্ৰণত সহায় কৰে। খাদ্য তালিকাত ভজা-পোৰা আৰু ৰেড মীটৰ পৰিমাণ কমাই থলুৱা পুষ্টিকৰ খাদ্য অন্তৰ্ভুক্ত কৰিব লাগে। ইয়াৰ উপৰি দৈনিক অতি কমেও ৩০ মিনিট খোজ কঢ়া আৰু যোগাসন কৰিলে পিত্তথলীৰ পাথৰৰ সমস্যাৰ পৰা হাত সাৰি থাকিব পাৰি।
