“সাম্প্ৰতিক সমাজ-জীৱনৰ বাবে হৃদ ৰোগ এক গুৰুতৰ সমস্যা হৈ পৰিছে ৷ চাপযুক্ত জীৱন পৰিক্ৰমা ইয়াৰ অন্যতম শীৰ্ষ কাৰণ ৷”এই মন্তব্য বিশিষ্ট হৃদৰোগ বিশেষজ্ঞ তথা “দ্য হাৰ্ট, সহৃদয় গোষ্ঠী”ৰ সভাপতি ডাঃ চন্দন মোদকৰ ৷
কাইলৈ দেশে-দেশে উদ্যাপিত হ’ব “বিশ্ব হৃদ দিৱস”৷ তদুপলক্ষে আজি গুৱাহাটীৰ দিছপুৰ প্ৰেছ ক্লাৱত আয়োজন কৰা এখন সংবাদমেলত ডাঃ মোদকে কয় যে জন্মৰে পৰা মৃত্যু পৰ্যন্ত মানুহৰ যিবোৰ অংগই অবিৰাম কাম কৰি থাকে তাৰ ভিতৰত অন্যতম হৈছে হৃদযন্ত্ৰ ৷ গতিকে ইয়াক ৰোগমুক্ত কৰি ৰখাটো সকলো মানুহৰে দায়িত্ব ৷
তেওঁ কয় যে আজিকালি মানুহে বিভিন্ন চাপৰ বোজা লৈ জীৱন যাপন কৰিবলগীয়া হয় ৷ কৰ্মক্ষেত্ৰৰ চাপ, প্ৰতিযোগিতামূলক জীৱন শৈলী, স্বাস্থ্যৰ বাবে ক্ষতিকাৰক খাদ্যাভাস, ধপাত তথা অন্যান্য মাদক দ্ৰৱ্যৰ আসক্তি আদিয়ে মানুহৰ হৃদযন্ত্ৰক দুৰ্বল কৰিছে ৷
প্ৰসংগক্ৰমে তেওঁ উল্লেখ কৰে যে ৮৩ শতাংশ হৃদৰোগৰ কাৰণ হৈছে এনেধৰণৰ জীৱন শৈলী ৷
জন্মগত বা অন্যধৰণে সংক্ৰমিত আৰু আক্ৰান্ত হৃদৰোগীৰ সংখ্যা তুলনামূলকভাৱে কম বুলি সদৰি কৰি ডাঃ মোদকে কয় যে ভাৰতবৰ্ষত বছৰি মৃত্যু হোৱা সকলৰ ভিতৰত প্ৰায় ২৪.৮ শতাংশ হৃদৰোগী ৷ এয়া বাৰুকৈয়ে উদ্বেগৰ কাৰণ ৷
তেওঁ লগতে প্ৰকৃতিৰ ওপৰত মানুহৰ ক্ৰমবৰ্ধমান অত্যাচাৰকো হৃদৰোগৰ বাবে দায়ী কৰে ৷ কিয়নো মানুহৰ শৰীৰৰ বাবে প্ৰয়োজনীয় অক্সিজেন উদাৰ প্ৰকৃতিয়ে বিনামূল্যে প্ৰদান কৰে ৷ কিন্তু প্ৰকৃতিৰ এই উদাৰতাৰ বিপৰীতে এচাম লোকে গছ-বন তহিলং কৰি সমাজ-জীৱনলৈ বিপদ নমাই আনিছে ৷ এনে কাৰ্যৰ বিৰোধীতা কৰাৰ লগতে প্ৰকৃতিক আপডাল কৰিবলৈ আহ্বান জনাই তেওঁ ৷
বিষয় প্ৰসংগৰে তেওঁ সকলোকে খোজ কাঢ়া, চাইকেল চালনা আৰু ব্যায়ামৰ অভ্যাস গঢ়ি তুলিবলৈও আহ্বান জনায় ৷
ইপিনে “বিশ্ব হৃদ দিৱস” উপলক্ষে “দ্য হাৰ্ট, সহৃদয় গোষ্ঠী”য়ে “গ্ৰীণ ক্লাছেচ , গুৱাহাটী”ৰ সহযোগত কাইলৈ এলানি কাৰ্যসূচী ৰূপায়ণৰ দিহা কৰিছে ৷
সেই অনুসৰি পুৱা ৭ বজাত মহানগৰীৰ মঠঘৰীয়াৰ কাৰ্বন গেটৰ পৰা গীতামন্দিৰলৈ পদযাত্ৰা কৰা হ’ব ৷
তদুপৰি পুৱা ১১ বজাৰ পৰা সৰু সজাই ষ্টেডিয়ামৰ বিপৰীতে মহানন্দ তামুলী পথৰ ৰংমন নগৰস্থিত “দ্য হাৰ্ট, সহৃদয় গোষ্ঠী”ৰ কাৰ্যালয়ত বিনামূলীয়া চিকিসা শিবিৰত স্বাস্থ্য পৰীক্ষা কৰা হ’ব ৷
এই কাৰ্যসূচীত সৰ্বস্তৰৰ ৰাইজৰ উপস্থিতি আৰু সহযোগিতা কামনা কৰিছে সংস্থাটিয়ে ৷
