দ্বিতীয়সংখ্যক ড০ টি আও উত্তৰ-পূব আন্তঃৰাষ্ট্ৰীয় গ’ল্ড কাপ (অনূৰ্ধ্ব ২১) ফুটবল প্ৰতিযোগিতাখন অহা ১৯-২৮ ফেব্ৰুৱাৰিত অনুষ্ঠিত হ’ব। ড০ টি আও জন্ম শতবাৰ্ষিকী কমিটীৰ উদ্যোগত অনুষ্ঠিত হ’ব লগীয়া প্ৰতিযোগিতাখনৰ বাবে ইতিমধ্যে প্ৰস্তুতি পূৰ্ণ গতিত চলাই থকা পৰিলক্ষিত হৈছে।
লক্ষ্মীবাঈ ৰাষ্ট্ৰীয় শাৰীৰিক শিক্ষা প্ৰতিষ্ঠান আৰু গুৱাহাটীৰ ছাই আঞ্চলিক কেন্দ্ৰৰ খেলপথাৰত ১০ দিনীয়াকৈ অনুষ্ঠিত হ’ব লগীয়া এই সন্মানীয় প্ৰতিযোগিতাখনত উত্তৰ-পূবৰ ৮খন ৰাজ্যৰ লগতে চুবুৰীয়া ৰাষ্ট্ৰ বাংলাদেশ, নেপাল আৰু ভূটানৰ মুঠ ১১টা দলে অংশগ্ৰহণ কৰিব।
প্ৰতিযোগিতাখন লীগ আৰু নক আউট পদ্ধতিত অনুষ্ঠিত হ’ব। ইফালে ছাই খেলপথাৰতে অহা ২৭ ফেব্ৰুৱাৰিত ছেমিফাইনেল মেচ দুখন আৰু ২৮ ফেব্ৰুৱাৰিত ফাইনেল মেচখন অনুষ্ঠিত হ’ব বুলি আয়োজকে জানিবলৈ দিয়ে।
আনহাতে, ১৯ ফেব্ৰুৱাৰিৰ বিয়লি ৪.৩০ বজাত ছাই ফিল্ডত অনুষ্ঠিত হ’ব প্ৰতিযোগিতাৰ উদ্বোধনী অনুষ্ঠান। উদ্বোধনী অনুষ্ঠানত দেশৰ কেইবাগৰাকীও আগশাৰীৰ ফুটবলাৰৰ লগতে সংগীতজ্ঞই অংশ ল’ব বুলি আয়োজকে জনায়।
