চিনেমাপ্ৰেমীসকলৰ দীৰ্ঘদিনীয়া অপেক্ষাৰ অন্ত পেলাই অৱশেষত ছবিগৃহলৈ আহিল চুপাৰষ্টাৰ মোহনলালৰ বহু প্ৰত্যাশিত থ্ৰিলাৰ ছবি দৃশ্যম ৩। ছবিখনে দৰ্শকৰ পৰা কিছু মিশ্ৰিত সঁহাৰি লাভ কৰিছে যদিও বক্স অফিচত ইয়াৰ প্ৰভাৱ কম পোৱা হোৱা নাই। প্ৰথম দিনাই ছবিখনে বাম্পাৰ উপাৰ্জন কৰি সকলোকে আচৰিত কৰি তুলিছে আৰু আনকি ৰাজা শিৱাজী ছবিখনৰ দৌৰতো আংশিকভাৱে ব্যাঘাত জন্মাইছে। জীঠু জোচেফৰ পৰিচালনাত নিৰ্মিত এই ছবিখনত মোহনলালে কৰা জৰ্জকুটিৰ চৰিত্ৰটোক দৰ্শকে পুনৰ এবাৰ বহুত প্ৰশংসা কৰিছে।
ভাৰতৰ লগতে সমগ্ৰ বিশ্বতে কেইবাটাও ভাষাত মুক্তি লাভ কৰা দৃশ্যম ৩ চিনেমাখনে প্ৰথম দিনাই এক ডাঙৰ অভিলেখ গঢ়িছে। ছেকনিল্কৰ ৰিপৰ্ট অনুসৰি, ভাৰতত ৫,৫০৬ টা শ্ব’ৰ জৰিয়তে ছবিখনে প্ৰথম দিনটোত প্ৰায় ১৫.৮৫ কোটি টকাৰ নেট সংগ্ৰহ কৰিবলৈ সক্ষম হৈছে। কেৱল দেশতেই নাহয়, বিদেশৰ বজাৰতো ছবিখনৰ জনপ্ৰিয়তা দেখিবলৈ পোৱা গৈছে। বহিঃৰাজ্যৰ পৰা ছবিখনে ২৫ কোটি টকাৰ মুঠ সংগ্ৰহ লাভ কৰিছে। ইয়াৰ ফলত প্ৰথম দিনাই ছবিখনৰ সৰ্বমুঠ বিশ্বব্যাপী উপাৰ্জন হৈছে ৪৩.৩৭ কোটি টকা।
মন কৰিবলগীয়া যে ২০১৩ চনত মুক্তি পোৱা এই ধাৰাবাহিকখনৰ প্ৰথমখন ছবি দৃশ্যমে বক্স অফিচত ৫০ কোটি টকাৰ সীমা অতিক্ৰম কৰা প্ৰথমখন মালয়ালম ছবি হিচাপে ইতিহাস সৃষ্টি কৰিছিল। ইয়াৰ পিছত ক’ভিড মহামাৰীৰ বাবে ২০২১ চনত দৃশ্যম ২ চিনেমাখন পোনপটীয়াকৈ অ’টিটি প্লেটফৰ্মত মুকলি কৰা হৈছিল। মোহনলালৰ কেৰিয়াৰৰ আন ডাঙৰ ছবিবোৰৰ সৈতে তুলনা কৰিলে দেখা যায় যে যোৱা বছৰ মুক্তি পোৱা এল২ এম্বুৰাণ ছবিখনে প্ৰথম দিনা ২১ কোটি টকা উপাৰ্জন কৰি তালিকাৰ শীৰ্ষত আছিল। ইয়াৰ বিপৰীতে তেওঁৰ ক্ৰাইম থ্ৰিলাৰ থুদাৰুম ছবিয়ে ৫.৪৫ কোটি টকা আৰু হৃদয়পুৰ্ব ছবিয়ে ৩.২৫ কোটি টকা সংগ্ৰহ কৰিছিল। অৱশ্যে তেওঁৰ একচন ছবি বৃশভা বক্স অফিচত ফ্লপ হৈছিল আৰু মাত্ৰ ৬০ লাখ টকা উপাৰ্জন কৰিছিল।
আশীৰ্বাদ চিনেমাৰ বেনাৰত এণ্টনি পেৰুম্বাৱুৰে প্ৰযোজনা কৰা দৃশ্যম ৩ ৰ কাহিনী লিখিছে আৰু পৰিচালনা কৰিছে জীথু জোচেফে। এই ছবিখনত মোহনলালৰ লগতে মীনা, আনছিবা হাছান, এষ্টাৰ অনিল, মুৰালী গোপী, ছিদ্দিক আৰু আশা শৰাথে নিজৰ পুৰণি চৰিত্ৰসমূহতে আকৌ এবাৰ সুন্দৰ অভিনয় কৰিছে। জৰ্জকুটিয়ে কেনেকৈ নিজৰ পৰিয়ালক সকলো বিপদৰ পৰা ৰক্ষা কৰে, তাৰেই এক আৱেগিক আৰু ৰহস্যৰে ভৰা কাহিনী চিনেমাখনত আগবঢ়াই লৈ যোৱা হৈছে।
