পঞ্জাৱত নিৰ্বাচন কাষ চাপি অহাৰ লগে লগে অমৃতসৰ সীমান্তত বৃহৎ পৰিমাণৰ অবৈধ অস্ত্ৰ-শস্ত্ৰ উদ্ধাৰ হোৱা ঘটনাই নিৰাপত্তাৰক্ষীৰ বাবে এক ডাঙৰ চিন্তাৰ কাৰণ হৈ পৰিছে। কেৱল জুন মাহৰ প্ৰথম ২৭ দিনতেই নিৰাপত্তা সংস্থাসমূহে অমৃতসৰ সীমান্তৰ পৰা ৭৪ টা পিষ্টল উদ্ধাৰ কৰিছে। ইয়াৰ লগতে এটা একে-৪৭ ৰাইফল, দুটা ছাব-মেচিন গান আৰু শ শ সজীৱ গুলী উদ্ধাৰ কৰা হৈছে। ইয়াৰ পৰা স্পষ্ট হৈ পৰিছে যে চুবুৰীয়া ৰাষ্ট্ৰৰ পৰা ৰাজ্যখনলৈ অত্যাধুনিক অস্ত্ৰ-শস্ত্ৰ সৰবৰাহ কৰাৰ এক নিৰন্তৰ প্ৰচেষ্টা চলি আছে।
প্ৰশাসনৰ মতে, এই অস্ত্ৰ-শস্ত্ৰসমূহ পঞ্জাৱ আৰু ইয়াৰ কাষৰীয়া ৰাজ্যসমূহত সক্ৰিয় হৈ থকা অপৰাধী চক্ৰৰ হাতলৈ যোৱাৰ কথা আছিল। নিৰ্বাচনৰ পূৰ্বে ৰাজনৈতিক আৰু অন্যান্য হিংসাত্মক ঘটনা বৃদ্ধি পোৱাৰ আশংকা কৰা হৈছে। অমৃতসৰৰ আৰক্ষী আয়ুক্ত গুৰপ্ৰীত সিং ভুল্লাৰে জানিবলৈ দিয়া মতে, সীমান্তত নিৰাপত্তা ব্যৱস্থা কটকটীয়া কৰাৰ পিছতো সৰবৰাহকাৰীসকলে ড্ৰোন আৰু অন্যান্য গোপন পথেৰে অস্ত্ৰ-শস্ত্ৰ সৰবৰাহ কৰা কাৰ্য অব্যাহত ৰাখিছে।
এই সৰবৰাহকাৰী চক্ৰবোৰে এতিয়া নতুন কৌশল অৱলম্বন কৰিছে। আৰক্ষী আয়ুক্তগৰাকীয়ে প্ৰকাশ কৰা মতে, অপৰাধী চক্ৰবোৰে এতিয়া অবৈধ অস্ত্ৰ সৰবৰাহৰ বাবে কিশোৰসকলক বেছিকৈ ব্যৱহাৰ কৰিবলৈ লৈছে। কাৰণ কিশোৰসকল ধৰা পৰিলেও আইন অনুসৰি তেওঁলোকে কঠোৰ শাস্তি নাপায়। তেওঁলোকক সহজে জামিন দিয়া হয় আৰু কাৰাগাৰৰ পৰিৱৰ্তে কিশোৰ আৱাসলৈ প্ৰেৰণ কৰা হয়। ইয়াৰ উপৰিও, সৰবৰাহকাৰীসকলে ছ’চিয়েল মিডিয়াৰ জৰিয়তে এই দুৰ্বল যুৱকসকলক বিচাৰি উলিয়াই নিজৰ জালত পেলাইছে। আৰক্ষীয়ে অৱশ্যে এনে একাউণ্টসমূহৰ ওপৰত নজৰ ৰাখিছে আৰু বহু লোকক গ্ৰেপ্তাৰো কৰিছে।
পঞ্জাৱ আৰু পাকিস্তানৰ ৫০০ কিলোমিটাৰতকৈ অধিক দৈৰ্ঘ্যৰ সীমান্তত ড্ৰোন প্ৰতিৰোধী ব্যৱস্থা থকাৰ পিছতো সৰবৰাহকাৰীসকলে নিৰাপত্তাৰক্ষীৰ চকুত ধূলি দিবলৈ নতুন উপায় উলিয়াইছে। আৰক্ষীৰ মতে, যিদিনা নিশা ড্ৰোনৰ জৰিয়তে অস্ত্ৰ আহে, সেইদিনা সীমান্তৱৰ্তী গাঁৱৰ সৰবৰাহকাৰীসকলে অতি ডাঙৰকৈ ডিজে বজাই দিয়ে। এই ডাঙৰ শব্দৰ বাবে স্থানীয় লোক আৰু নিৰাপত্তাৰক্ষীয়ে আকাশত উৰি অহা ড্ৰোনৰ গুণগুণনি শব্দ শুনিবলৈ নাপায়। ইয়াৰ ফলত নিৰাপত্তাৰক্ষীয়ে তৎপৰ হোৱাৰ আগতেই তেওঁলোকে নিৰাপদে অস্ত্ৰখিনি সংগ্ৰহ কৰিবলৈ সক্ষম হয়।
যোৱা ছমাহৰ ভিতৰত পঞ্জাৱত দিন-দুপৰতে ৰাজনৈতিক নেতা আৰু সাধাৰণ নাগৰিকক হত্যা কৰা কেইবাটাও ঘটনা সংঘটিত হৈছে। এতিয়া ইমান বৃহৎ পৰিমাণৰ অবৈধ অস্ত্ৰ উদ্ধাৰ হোৱাৰ লগে লগে নিৰাপত্তা সংস্থাসমূহ অধিক চিন্তিত হৈ পৰিছে। এজন জ্যেষ্ঠ চোৰাংচোৱা বিষয়াই জানিবলৈ দিয়া মতে, সহজে অস্ত্ৰ লাভ কৰাৰ ফলত ভৱিষ্যতে সৰু সৰু কাজিয়াও ডাঙৰ হিংসাত্মক ঘটনালৈ ৰূপান্তৰিত হ’ব পাৰে। ৰাজ্যখনত আইন-শৃংখলাৰ অৱনতি ঘটাই এক অশান্তিকৰ পৰিৱেশ সৃষ্টি কৰাটোৱেই হৈছে পাকিস্তানৰ আই এছ আইৰ মূল লক্ষ্য। সেয়েহে নিৰ্বাচনৰ পূৰ্বে এই অপৰাধী চক্ৰসমূহক উৎখাত কৰাটো পঞ্জাৱ আৰক্ষী আৰু নিৰাপত্তাৰক্ষীৰ বাবে আটাইতকৈ গুৰুত্বপূৰ্ণ হৈ পৰিছে।
