চিৰাং জিলাৰ বেংতলস্থিত প্ৰাক্তন এন ডি এফ বি সদস্যৰে গঠিত ‘চাৰ্ভিছ প্ৰভাইডাৰ’ নামৰ স্বেচ্ছাসেৱী সংস্থাৰ ন’ জনীয়া দ’ল এটাই আজি ড্ৰাগছৰ বিৰুদ্ধে অভিযান চলাই ব্ৰাউন চুগাৰৰ ১৭ টা কনটেইনাৰ আৰু ৫ টা চিৰিঞ্জ সহ ছয় সৰবৰাহকাৰীক কৰায়ত্ত কৰি চাপৰ আৰক্ষীক গতাই দিয়ে।
উল্লেখ্য যে উক্ত সস্থাটোৰ দলটোৱে আজি কোকৰাঝাৰ, বঙাইগাঁও আৰু চিৰাঙ জিলাৰ বিভিন্ন স্থানৰ পৰা ক্ৰমে জিতু টুডু (২৩),কনক বসুমতাৰী(২০),দেৰহাছত বসুমতাৰী(১৮),গৌসাত বসুমতাৰী(১৯) আৰু বিজু বসুমতাৰী নামৰ ড্ৰাগছ সৰবৰাহকাৰী আটক কৰি সোধাপোছা কৰাত তেওঁলোকে চাপৰৰ মৌৱাটাৰীৰ ইছৰাইল আলীৰ পুত্ৰ মমৰেজ আলী(২৪)ৰ পৰা ড্ৰাগছ ক্ৰয় কৰি সৰবৰাহ কৰে বুলি স্বীকাৰোক্তি দিয়ে।
তাৰ ভিত্তিতে দলটোৱে এ, এছ ২৮বি ১৩৬৬, এএছ ১৫এল৬২৫২ আৰু এ এছ১৬বি ৮৫৭৮ নম্বৰৰ গাড়ী কেইখনেৰে উক্ত পাঁচ যুৱকক লগত লৈ আজি সন্ধিয়া চাপৰলৈ আহি মমৰেজক ড্ৰাগছ ক্ৰয় কৰাৰ কথা কৈ মাতি আনে আৰু গাড়ীত উঠাই লৈ আহে।
পিছত দলটোৱে উক্ত ছয় ড্ৰাগছ সৰবৰাহকাৰীকে চাপৰ আৰক্ষীক গতাই দিয়ে বুলি চাপৰ আৰক্ষী চকীৰ ভাৰপ্ৰাপ্ত বিষয়া ৰঞ্জিত কাকতিয়ে জানিবলৈ দিয়ে।
উক্ত ঘটনাৰ পাছতে বিলাসীপাৰাৰ মহকুমা আৰক্ষী বিষয়া বিৰিঞ্চি বৰা চাপৰ আৰক্ষী থানাত উপস্থিত হৈ ধৃত ছয় সৰবৰাহকাৰীক সোধাপোছা কৰি অধিক তথ্য আহৰণৰ চেষ্টা চলায়।
উক্ত স্বেচ্ছাসেৱী সংস্থাটোৰ সদস্য সকলক আৰক্ষীয়ে ড্ৰাগছৰ বিৰুদ্ধে অভিযান চলাবলৈ নিয়োগ কৰা বুলি সংবাদ মাধ্যমৰ আগত বিষয়াগৰাকীয়ে প্ৰকাশ কৰে ।
