বাক্সা জিলাৰ নাগ্ৰীজুলিত যোৱানিশা আৰক্ষীয়ে চলালে ড্ৰাগছ বিৰোধী অভিযান।
অভিযানত জব্দ হয় নিষিদ্ধ ড্ৰাগছ ব্ৰাউন চুগাৰ।
অঞ্চলটোত দীর্ঘ দিনে আৰক্ষী প্ৰশাসনৰ চকুত ধূলি দি একাংশ অসাধু চক্ৰই গঢ়ি তুলিছিল যুৱ প্ৰজন্মক ধ্বংস কৰি দিব পৰা নিষিদ্ধ ড্ৰাগছৰ বৃহৎ বেহা।
নাগ্ৰীজুলিৰ ভাওৰাগুৰী গাঁওৰ বিকি আলী নামৰ এজন যুৱকৰ ঘৰত লুকুৱাই ৰখা অৱস্থাত দুটা কণ্টেইনাৰত উদ্বাৰ হৈছে এই ব্ৰাউন চুগাৰ।
উদ্ধাৰ হৈছে ড্ৰাগছ লোৱাত ব্যৱহাৰ কৰা চিৰিঞ্জ আৰু কিছু অপত্তিজনক সামগ্ৰী।
দণ্ডাধীশৰ উপস্থিতিত আৰক্ষীয়ে জব্দ কৰিছে এই নিষিদ্ধ সামগ্রী খিনি।
নিশাই ঘটনাস্থলীত উপস্থিত হয় বাক্সা জিলা আৰক্ষীৰ উচ্চ পদস্থ বিষয়া।
আৰক্ষীয়ে নিশাই স্থানীয় যুৱকৰ সহযোগত আটক কৰে হেৰ’ইন সৰবৰাহকাৰী মণিৰাম সিংহ নামৰ এজন যুৱকক।
নিশা অৱশ্যে আৰক্ষীৰ অভিযানৰ উমান পাই পলাই যায় বিকি আলি নামৰ মূল অপৰাধী জন।অঞ্চলটোৰ লোকৰ সন্দেহ অনুসৰি দীর্ঘ দিনে বিকি আলী নামৰ যুৱকজনে পৰিয়ালৰ লোকৰ সহযোগত তেওঁলোকৰ ঘৰৰ পৰাই অঞ্চলটোত চলাই গৈছিল ড্ৰাগছৰ অবৈধ বেহা।
কালি মণিৰাম সিংহ নামৰ যুৱকজনে অঞ্চলটোৰ হেৰ’ইনৰ বিক্ৰী কৰা টকা সংগ্ৰহ কৰাৰ সময়তে হাতে লোটে ধৰি আৰক্ষীক খবৰ দিয়াত তামুলপুৰ তথা নাগ্ৰীজুলি আৰক্ষীয়ে ৰাইজৰ সহযোগত অভিযান চলাই জব্দ কৰে ড্ৰাগছ খিনি।
মাজ নিশা পৰ্যন্ত আৰক্ষীয়ে চলায় অভিযান।
ইপিনে কালি নিশা নাগ্ৰীজুলি বজাৰত ড্ৰাগছ উদ্ধাৰ হোৱাৰ ঘটনাৰ চাঞ্চল্য আজিও অব্যাহত আছে।
খবৰ পাই নিশাই এবিএমছুৰ কেন্দ্ৰীয় সমিতিৰ সাধাৰণ সম্পাদক টাইছন হুছেইন আৰু তামুলপুৰ জিলা এবিএমছুৰ সভাপতি বদৰুদ্দিন খানে নাগ্ৰীজুলিত উপস্থিত হয় আৰু ঘটনাৰ বুজ লয়।
আজি পুৱা টাইছন হুছেইন আৰু বদৰুদ্দিন খানে স্থানীয় নাগ্ৰীজুলি আঞ্চলিক এবিএমছুৰ কৰ্মকৰ্তাৰ সহযোগত আত্মগোপন কৰি থকা অৱস্থাত বিকি আলীক আটক কৰে আৰু নাগ্ৰীজুলি আৰক্ষীক চমজাই দিয়ে।
বিকি আলী আৰু মণিৰাম সিংহ নামৰ দুই যুৱকৰ বিৰুদ্ধে তামুলপুৰ আৰক্ষী থানাত এটি গোচৰ ৰুজু কৰি দুই জনকে বাক্সা জিলা সদৰ মুছলপুৰৰ ন্যায়িক দণ্ডাধীশৰ আদালতত হাজিৰ কৰোৱা হয় আৰু পিছত ন্যায়িক জিম্মালৈ প্ৰেৰণ কৰে।
