নিৰ্বাচনৰ দিন চমু চাপি অহাৰ লগে লগে ৰাজনৈতিক নেতা, পালিনেতা, দলীয়কৰ্মী আৰু মনোনীত প্ৰাৰ্থীৰ ব্যস্ততা বাঢ়ি অহাৰ সমান্তৰালভাবে ৰাজ্যৰ প্ৰশাসন তথা আৰক্ষীৰো ব্যস্ততা বাঢ়িছে৷
নিৰ্বাচনী আয়োগৰ নিৰ্দেশত ৰাজ্যৰ বিভিন্ন ঠাইত চলিছে ফ্লায়িং স্কোৱাড তথা স্থানীয় আৰক্ষীৰ তালাচী অভিযান৷
এনে সময়তে যোৱা নিশা প্ৰায় ২ বজাত দুধনৈ আৰক্ষী থানাৰ ভাৰপ্ৰাপ্ত বিষয়া মুকুট কাকতি আৰু উপ-পৰিদৰ্শক সুনীল তালুকদাৰে নিশাৰ ভাগত নিয়মীয়া টহল দি থকাৰ সময়চোৱাত দুধনৈ সাপ্তাহিক বজাৰ (হাটখোলা) লৈ পথত এখন বগা ৰঙৰ মাৰুতি এলট’ ৮০০ কাৰ (AS-25-CC-0625) ৰৈ থকা দেখা পাই সন্দেহবশত সোধপোচ কৰে।
উল্লেখ্য যে উক্ত নম্বৰৰ গাড়ীখন আগৰে পৰাই আৰক্ষীৰ নজৰত আছিল।
আৰক্ষীয়ে সোধপোচ কৰিবলৈ লওঁতেই গাড়ীত থকা চাৰিগৰাকী আৰোহীয়ে পলাবলৈ চেষ্টা কৰে যদিও আটাইকেইজনকে আৰক্ষীয়ে আটক কৰিবলৈ সক্ষম হয়।
ধৃত যুৱক কেইজন ক্ৰমে- জয়দুল ইছলাম (২৫, জোৰশিমলী ছয়গাওঁ কামৰূপ), জব্বৰ আলী (২৩, জোৰশিমলী, ছয়গাওঁ কামৰূপ), চৈয়দ আলী (২০, চাটবেন্টি জলেশ্বৰ, গোৱালপাৰা) আৰু মাহিৰ আলী (৩২’ পশ্চিম কাংকি, বগুৱান গোৱালপাৰা)। পিছত আটাইকেইজনক দুধনৈ আৰক্ষী থানালৈ লৈ আহে।
আৰক্ষী সূত্ৰে জানিব পৰা মতে, ধৃত আটইকেইজন অপৰাধীয়ে এনেদৰে পথৰ কাষত ৰৈ নিশা ৰাজপথেৰে চুপাৰী, তামোল, কাজু, বা অন্যান্য ব্যবসায়ীক সামগ্ৰী কঢ়িয়াই লৈ অহা-যোৱা কৰা পিকআপ ভেন জাতীয় সামগ্ৰী কঢ়িওৱা সৰু বাহনবোৰ ৰাস্তাত ৰখাই মাৰণাস্ত্ৰ দেখুৱাই চালক তথা হেণ্ডিমেনক আঘাতপ্ৰাপ্ত কৰি গাড়ী সহ সামগ্ৰী, টকা-পইচা, মোবাইল লৈ উধাও হয়।
আৰক্ষীৰ হাতত ধৃত চাৰিওজন দুৰ্বৃত্তই এনে ধৰণৰ ডকাইতি কাণ্ডৰ লগত জড়িত বুলি জানিব পৰা গৈছে৷
আৰক্ষীয়ে ধৃত চাৰিওগৰাকী অপৰাধীৰ বিৰূদ্ধে গোচৰ ৰুজু কৰি স্বাস্থ্য পৰীক্ষা কৰাই আজি গোৱালপাৰালৈ প্ৰেৰণ কৰে।