বিশ্ব বজাৰত খাৰুৱা তেলৰ ক্ৰমৱৰ্ধমান মূল্যবৃদ্ধি আৰু গোলকীয় অস্থিৰতাৰ সময়তে দেশবাসীলৈ সকাহ দি কেন্দ্ৰীয় চৰকাৰে এক গুৰুত্বপূৰ্ণ পদক্ষেপ গ্ৰহণ কৰিছে। শুকুৰবাৰে, ৫ জুন তাৰিখে কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীয়ে আনুষ্ঠানিকভাৱে ই-৮৫ ইন্ধন মুকলি কৰে। এই নতুন ইন্ধনে পেট্ৰ’লৰ তুলনাত গ্ৰাহকৰ ধন ৰাহি কৰাই নহয়, বৰঞ্চ কাৰ্বন নিৰ্গমন হ্ৰাস কৰি পৰিৱেশ সুৰক্ষাৰ ক্ষেত্ৰতো এক বৃহৎ পৰিৱৰ্তন আনিব বুলি আশা কৰা হৈছে।
বজাৰত ইতিমধ্যে উপলব্ধ ই-২০ ইন্ধনৰ সফলতাৰ পিছত এতিয়া ই-৮৫ মুকলি কৰা হৈছে। ই-৮৫ ইন্ধনত ৮০ ৰ পৰা ৮৫ শতাংশ ইথানল আৰু বাকী ১৪ ৰ পৰা ১৯ শতাংশ পেট্ৰ’ল মিহলোৱা থাকে। দিল্লীত এই নতুন ইন্ধনৰ মূল্য প্ৰতি লিটাৰত ৮২.১২ টকা নিৰ্ধাৰণ কৰা হৈছে, যিটো ই-২০ পেট্ৰ’লৰ তুলনাত প্ৰায় ২০ টকা সস্তা। ইথানল হৈছে কুঁহিয়াৰৰ ৰস, গোমধান বা ধানৰ তুঁহৰ দৰে জৈৱিক পদাৰ্থৰ পৰা প্ৰস্তুত কৰা এক প্ৰকাৰৰ জৈৱিক এলকহল আৰু পেট্ৰ’লৰ লগত ইয়াক মিহলোৱা প্ৰক্ৰিয়াকে ইথানল ব্লেণ্ডিং বুলি কোৱা হয়।
এই নতুন ইন্ধনৰ ব্যৱহাৰে অৰ্থনৈতিক আৰু পাৰিপাৰ্শ্বিক দুয়ো দিশতে লাভান্বিত কৰিব। ইথানলত পৰ্যাপ্ত পৰিমাণৰ অক্সিজেন থকাৰ বাবে ই ইন্ধনৰ সম্পূৰ্ণ দহনত সহায় কৰে, যাৰ ফলত কাৰ্বন মনোক্সাইড আৰু অন্যান্য বিষাক্ত গেছৰ নিৰ্গমন বহু পৰিমাণে হ্ৰাস পায়। ইয়াৰ উপৰি, দেশত উৎপাদিত এই জৈৱ ইন্ধনৰ ব্যৱহাৰে বিদেশৰ পৰা আমদানি কৰা খাৰুৱা তেলৰ ওপৰত নিৰ্ভৰশীলতা হ্ৰাস কৰিব। কৃষিজাত সামগ্ৰীৰ পৰা ইথানল প্ৰস্তুত হোৱাৰ বাবে ইয়াৰ জৰিয়তে গ্ৰাম্য অৰ্থনীতি সবল হোৱাৰ লগতে কৃষকসকল প্ৰত্যক্ষভাৱে আৰ্থিক দিশত লাভৱান হ’ব।
কেন্দ্ৰীয় মন্ত্ৰী হৰদীপ সিং পুৰীয়ে জনোৱা অনুসৰি, বৰ্তমান দেশৰ ৰাজহুৱা খণ্ডৰ তেল বিপণন কোম্পানীসমূহৰ ৪৮ টা খুচুৰা বিক্ৰী কেন্দ্ৰত এই ই-৮৫ ইন্ধন উপলব্ধ হ’ব। চলিত বৰ্ষৰ ডিচেম্বৰ মাহৰ ভিতৰত এই সংখ্যা ৫০০ লৈ আৰু ২০২৭ চনৰ ডিচেম্বৰৰ ভিতৰত ৫০০০ টা বিক্ৰী কেন্দ্ৰলৈ বৃদ্ধি কৰাৰ পৰিকল্পনা চৰকাৰে হাতত লৈছে। ব্ৰাজিলত প্ৰায় এক দশক ধৰি ইথানল ব্লেণ্ডিং সফলতাৰে ব্যৱহাৰ হৈ আহিছে আৰু বৰ্তমান সেই দেশৰ ৮০ শতাংশ লঘু বাহন ফ্লেক্স ফুৱেল প্ৰযুক্তিৰে চলে। ভাৰততো ই-২০ ইন্ধন ব্যৱহাৰৰ ফলত ইঞ্জিন বিকল হোৱাৰ কোনো অভিযোগ এতিয়ালৈকে পোহৰলৈ অহা নাই।
অৱশ্যে, এই ই-৮৫ ইন্ধন সকলো ধৰণৰ বাহনত ব্যৱহাৰ কৰিব পৰা নাযাব। এই ইন্ধন কেৱল ফ্লেক্স ফুৱেল প্ৰযুক্তিৰে নিৰ্মিত বিশেষ বাহনতহে ব্যৱহাৰ কৰিব পাৰিব। ই-২০ ইন্ধনৰ বাবে নিৰ্মাণ কৰা বাহনত ই-৮৫ ভৰালে ইঞ্জিনৰ কাৰ্যক্ষমতা হ্ৰাস পোৱাৰ লগতে ইন্ধন প্ৰণালীৰ ক্ষতি হোৱা আৰু জং লগাৰ দৰে দীৰ্ঘম্যাদী সমস্যাৰ সৃষ্টি হ’ব পাৰে। গ্ৰাহকৰ সুবিধাৰ্থে আৰু বিভ্ৰান্তি দূৰ কৰিবলৈ পেট্ৰ’ল পাম্পসমূহত এই ইন্ধনৰ বাবে সুকীয়া ব্ৰেণ্ডিং আৰু লেবেলৰ ব্যৱস্থা কৰা হ’ব। ফ্লেক্স ফুৱেল বাহনসমূহত সাধাৰণ পেট্ৰ’ল আৰু উচ্চ মাত্ৰাৰ ইথানল ব্লেণ্ড দুয়োটাই ব্যৱহাৰ কৰিব পাৰি আৰু এনে বাহনত সেউজগৃহ গেছৰ নিৰ্গমন সাধাৰণ বাহনৰ তুলনাত প্ৰায় ৬১ শতাংশ কম হয়।
এই ইন্ধনৰ বহুতো ইতিবাচক দিশ থকাৰ পিছতো বৰ্তমান সময়ত ইয়াৰ কিছুমান প্ৰত্যাহ্বান বিদ্যমান। ই-৮৫ ইন্ধনৰ আটাইতকৈ ডাঙৰ সীমাবদ্ধতাটো হ’ল যে ইয়াক সকলো বাহনতে ব্যৱহাৰ কৰিব নোৱাৰি আৰু ইয়াৰ মাইলেজ সাধাৰণ পেট্ৰ’লৰ তুলনাত প্ৰায় ১৫ ৰ পৰা ২৫ শতাংশ কম। তথাপিও, বায়ু প্ৰদূষণৰ দৰে গুৰুতৰ সমস্যাৰ সন্মুখীন হৈ থকা ভাৰতবৰ্ষৰ বাবে এই নতুন প্ৰযুক্তিয়ে পৰিৱেশ সুৰক্ষা আৰু বহনক্ষম অৰ্থনৈতিক উন্নয়নৰ দিশত এক শক্তিশালী ভেটি নিৰ্মাণ কৰিব বুলি চৰকাৰীভাৱে আশা প্ৰকাশ কৰা হৈছে।
