ফেব্ৰুৱাৰী মাহ সোমোৱাৰ লগে লগে শীতকাল প্ৰায় শেষ হোৱাৰ পথত। ইতিমধ্যে বহু লোকে গৰম কাপোৰ বা চুৱেটাৰ পৰিহাৰ কৰিছে। ৰাতি শুই থকাৰ সময়তো এতিয়া কম্বল বা চাদৰ ল’লে গৰম অনুভৱ হোৱা আৰম্ভ হৈছে। গতিকে এতিয়া আপোনাৰ প্ৰিয় শীতকালীন কাপোৰবোৰ সামৰি থোৱাৰ সময় আহি পৰিছে। কিন্তু এইবোৰ আলমাৰীত ভৰাই থোৱাৰ আগতে কিছুমান বিশেষ সাৱধানতা অৱলম্বন কৰাটো অতি প্ৰয়োজনীয়, নহ’লে অহা বছৰলৈ আপোনাৰ এই আপুৰুগীয়া কাপোৰবোৰ নষ্ট হৈ যাব পাৰে।
শিমুল কপাহৰ লেপৰ ক্ষেত্ৰত মনত ৰখা উচিত যে এইবোৰ কেতিয়াও পানীৰে ধুব নালাগে বা ড্ৰাই ক্লিনিং কৰিব নালাগে। চাদৰবোৰ পৰিষ্কাৰ কৰি ৰাখিবলৈ কেৱল প্ৰখৰ ৰ’দত দি মেলি ৰখাৰ প্ৰয়োজন। আপুনি মাজে মাজে কেৱল চাদৰৰ কভাৰখনহে ধুই চাফা কৰি ৰাখিব পাৰে। কাপোৰবোৰ ভাঁজ কৰি থোৱাৰ সময়ত পোক-পৰুৱাৰ পৰা ৰক্ষা কৰিবলৈ নেফ্থালিন ব্যৱহাৰ কৰিব পাৰে। ইয়াৰ উপৰি নিম পাত বা ক’লা জিৰা সৰু সৰু টোপোলা কৰি কাপোৰৰ ভাঁজত থৈ দিলে কোনো ধৰণৰ অনিষ্টকাৰী পোকে কাপোৰ নষ্ট কৰিব নোৱাৰে।
বহু লোকে কম্বলবোৰ বাহিৰত ড্ৰাই ক্লিনিং কৰিবলৈ দিয়ে যদিও আপুনি ইচ্ছা কৰিলে ঘৰতে কম্বল পৰিষ্কাৰ কৰিব পাৰে। ইয়াৰ বাবে চাবোনৰ পৰিৱৰ্তে শ্বেম্পু ব্যৱহাৰ কৰিলে কম্বলৰ কোমলতা অটুট থাকে। শ্বেম্পু মিহলি পানীত ১০ ৰ পৰা ২০ মিনিটমান কম্বলখন তিয়াই ৰাখি হাতেৰে লাহে লাহে ঘঁহি ধুব লাগে। মনত ৰাখিব যে কম্বল কেতিয়াও প্ৰখৰ ৰ’দত শুকুৱাব নালাগে, ইয়াক সদায় ছাঁত বা মৃদু ৰ’দত শুকুৱাব লাগে। সম্পূৰ্ণৰূপে শুকোৱাৰ পিছত নেফ্থালিন বা নিম পাত দি ইয়াক নিৰাপদে সামৰি থব লাগে।
আমাৰ ঘৰত ব্যৱহাৰ হোৱা বিভিন্ন ধৰণৰ কম্বল ধোৱাটো অতি সহজ। যিকোনো ডিটাৰজেণ্ট পাউদাৰ পানীত ২০-৩০ মিনিট তিয়াই থৈ আপুনি ঘৰতে এইবোৰ ধুই ল’ব পাৰে। আনহাতে বহুতৰে আকৌ ধূলি-বালি বা পুৰণি কাপোৰৰ পৰা এলাৰ্জী আৰু হাঁপানীৰ সমস্যা হোৱা দেখা যায়। তেনে লোকে শীতকালীন কাপোৰ সামৰি থোৱাৰ আগতে ঠাইখন ভালদৰে পৰিষ্কাৰ কৰি ল’ব লাগে। সদায় মনত ৰাখিব যে অহা বছৰ শীতৰ আৰম্ভণিতে এই কাপোৰবোৰ আলমাৰীৰ পৰা উলিয়াই পুনৰ এবাৰ ভালদৰে ৰ’দত দিহে ব্যৱহাৰ কৰা উচিত।
