কলকাতা উচ্চ ন্যায়ালয়ত আই-পিএচি গোচৰৰ শুনানি স্থগিত হোৱাৰ পিছতে এতিয়া এনফৰ্চমেণ্ট ডাইৰেক্টৰেট বা ইডিয়ে দেশৰ শীৰ্ষ আদালতৰ দ্বাৰস্থ হৈছে। বহু কোটি টকীয়া কয়লা কেলেংকাৰীৰ তদন্তত পশ্চিম বংগ চৰকাৰ আৰু মুখ্যমন্ত্রী মমতা বেনার্জীয়ে বাধা দিয়াৰ গুৰুতৰ অভিযোগ উত্থাপন কৰি কেন্দ্ৰীয় সংস্থাটোৱে সংবিধানৰ ৩২ নং অনুচ্ছেদৰ অধীনত উচ্চতম ন্যায়ালয়ত এখন আবেদন দাখিল কৰিছে। ইডিয়ে তেওঁলোকৰ আবেদনত এই সমগ্ৰ ঘটনাৰ তদন্ত কেন্দ্ৰীয় তদন্তকাৰী ব্যুৰো চমকৈ চিবিআইৰ দ্বাৰা কৰাবলৈ দাবী জনাইছে। সংস্থাটোৰ মতে, ৰাজ্যিক যন্ত্ৰৰ হস্তক্ষেপৰ বাবে তেওঁলোকৰ এক স্বতন্ত্ৰ আৰু নিৰপেক্ষ তদন্ত চলোৱাৰ অধিকাৰ খৰ্ব হৈছে।
এই বিবাদৰ আৰম্ভণি হৈছিল কলকাতাৰ আই-পিএচিৰ সৈতে জড়িত চৌহদত ইডিয়ে চলোৱা এক তালাচী অভিযানক কেন্দ্ৰ কৰি। আই-পিএচি হৈছে তৃণমূল কংগ্ৰেছৰ নিৰ্বাচনী কৌশল প্ৰস্তুত কৰা এক ৰাজনৈতিক পৰামৰ্শদাতা প্ৰতিষ্ঠান। ইডিয়ে অভিযোগ কৰিছে যে কয়লা সৰবৰাহৰ তদন্তৰ বাবে প্রয়োজনীয় নথি-পত্ৰ আৰু ইলেক্ট্ৰনিক সঁজুলিসমূহ জব্দ কৰাৰ সময়ত তেওঁলোকক বাধা প্ৰদান কৰা হৈছিল। আনকি ৰাজ্যৰ উচ্চপদস্থ বিষয়াসকলৰ উপস্থিতিত কিছুমান গুৰুত্বপূৰ্ণ প্ৰমাণ বলপূৰ্বকভাৱে আঁতৰাই নিয়াৰো অভিযোগ উত্থাপন কৰিছে সংস্থাটোৱে। ইডিয়ে যুক্তি দিছে যে আৰক্ষী আৰু ৰাজ্যিক কৰ্তৃপক্ষৰ এনে ধৰণৰ হস্তক্ষেপ ন্যায়ৰ পথত এক ডাঙৰ হেঙাৰ স্বৰূপ।
আনহাতে, ইডিৰ এই পদক্ষেপৰ সম্ভাৱনাৰ কথা আগতীয়াকৈ অনুমান কৰি পশ্চিম বংগ চৰকাৰেও উচ্চতম ন্যায়ালয়ত এক সতৰ্কবাণী বা কেভিয়েট দাখিল কৰি থৈছে। ইয়াৰ জৰিয়তে ৰাজ্য চৰকাৰে বিচাৰিছে যে তেওঁলোকৰ পক্ষ নুশুনাকৈ আদালতে যাতে কোনো একপক্ষীয় আদেশ জাৰি নকৰে। তৃণমূল কংগ্ৰেছ আৰু আই-পিএচিয়ে ইডিৰ সকলো অভিযোগ অস্বীকাৰ কৰিছে। তেওঁলোকৰ মতে, অভিযানৰ সময়ত জব্দ কৰা সামগ্ৰীসমূহ কেৱল নিৰ্বাচনী ৰণনীতিৰ সৈতে জড়িত আছিল আৰু ইয়াৰ সৈতে ধন সৰবৰাহৰ কোনো সম্পৰ্ক নাই। ইডিয়ে অবৈধভাৱে দলৰ গোপনীয় তথ্য সংগ্ৰহ কৰিবলৈ চেষ্টা কৰা বুলিও তেওঁলোকে ওলোটা অভিযোগ কৰিছে।
ইডিয়ে দাবী কৰিছে যে কয়লা কেলেংকাৰীৰ প্ৰায় ১০ কোটি টকা হাৱালাৰ জৰিয়তে আই-পিএচিলৈ প্ৰেৰণ কৰা হৈছিল, যাৰ বিনিময়ত প্ৰতিষ্ঠানটোৱে গোৱা নিৰ্বাচনৰ সময়ত তৃণমূলৰ হৈ কাম কৰিছিল। ইয়াৰ পূৰ্বে কলিকতা উচ্চ ন্যায়ালয়ত এই সন্দৰ্ভত শুনানি হোৱাৰ কথা আছিল যদিও আদালতৰ পৰিৱেশ উত্তপ্ত হৈ পৰাত ন্যায়াধীশে শুনানি ১৪ জানুৱাৰীলৈ পিছুৱাই দিয়ে। ইয়াৰ লগে লগে কলকাতা আৰক্ষীয়েও ইডিৰ বিষয়াসকলৰ বিৰুদ্ধে নথি চুৰি আৰু নিৰ্যাতনৰ গোচৰ ৰুজু কৰি তদন্ত আৰম্ভ কৰিছে। চিচিটিভি ফুটেজ আৰু সাক্ষীৰ জৰিয়তে অভিযুক্ত ইডি বিষয়াসকলক চিনাক্ত কৰাৰ প্ৰক্ৰিয়া চলাই থকা হৈছে। বৰ্তমান এই সমগ্ৰ আইনী যুঁজখনে উচ্চতম ন্যায়ালয়ত কি গতি লয়, সেয়া লক্ষণীয় হ’ব।
