লুৰীণ জ্যোতি গগৈয়ে দিল্লীত ৰাহুল গান্ধীক লগ কৰা কাৰণে মুখ্য মন্ত্ৰী হিমন্তবিশ্ব শৰ্মা আৰু বিজেপি-আৰ এচ এচৰ কিয় ইমান পোৰণি উঠিছে? যোৱা চল্লিচ বছৰে আমি কি শুনি আছোঁ? মিঞাই অসম খালে।নিৰ্বাচনৰ সময়ত তেওঁলোকৰ এই চিঞৰ-বাখৰৰ কোব চৰে।কিন্তু প্ৰথমবাৰৰ বাবে এটা জাতীয়তাবাদী দল আৰু এজন জাতীয়তাবাদী নেতাই স্পষ্ট ভাষাত কৈছে যে মিঞা বুলি নক’ব বিদেশী বুলি কওক। সেই দলটো হ’ল অসম জাতীয় পৰিষদ আৰু নেতাজন হৈছে লুৰীণ জ্যোতি গগৈ। আপোনালোকৰ মনত আছেনে? হীৰালাল পাটোৱাৰীৰ মৃত্যুৰ পিছত মংগলদৈ লোক সভা সমষ্টিৰ উপ-নিৰ্বাচনৰ সময়ত, হঠাৎ বিদেশী নাগৰিকৰ নামেৰে ভোটাৰ লিষ্ট ভৰি পৰা বুলি তেতিয়া অসমত কেনে হুলস্থূল লগোৱা হৈছিল? কোনো কোনোৱে কয় সেইটো হেনো গোলাপ বৰবৰাৰ চৰকাৰ বগৰাবলৈ স্বাৰ্থ জড়িত মহলৰ এক ষড়যন্ত্ৰহে আছিল। মংগলদৈ আছিল আৰম্ভণি। তাকেলৈ এটা ছবছৰীয়া বিদেশী খেদা আন্দোলন হ’ল। কত প্ৰবন্ধ চলিল, কিন্তু লাখ লাখ বিদেশী(?) য’ত আছিল তাতেই থাকিল। মাজে মাজে কেৱল মিঞাৰ ওপৰত নিৰ্যাতন কৰি বিদেশী খেদা আন্দোলনৰ অভিনয় কৰি থকা হ’ল। ছবছৰীয়া অসম আন্দোলনৰ পিছত অগপই চৰকাৰ কৰিলে। তাৰপিছতো য’ৰ বিদেশী ত’তেই থাকিল। কংগ্ৰেছে একেলেথাৰিয়ে তিনিবাৰ চৰকাৰ কৰিলে। হিমন্তক বিশ্ব শৰ্মাক অসম চুক্তি ৰূপায়ণৰ দায়িত্ব দিলে। কিন্ত তেতিয়াও য’ৰ বিদেশী ত’তেই থাকিল। এইবাৰ মোদী আহিল। দুহেজাৰ চৈধ্য চনৰ নিৰ্বাচনী প্ৰচাৰত নৰেন্দ্ৰ মোদীয়ে ঘোষণা কৰিলে ১৬ মে‘ৰ পিছত, মানে তেওঁ ভাৰতৰ প্ৰধান মন্ত্ৰী হিচাপে শপথ লোৱাৰ পিছত অসমৰ বাংলাদেশীয়ে টালি-টোপোলা বান্ধিব লাগিব। তেনে কিমানটা ১৬ মে‘ আহিল আৰু গ’ল। কিন্তু য’ৰ বিদেশী ত’তেই থাকিল।
আজি আকৌ মিঞাক উচ্ছেদ কৰা হৈছে বাংলাদেশী বিদেশীৰ কথা কৈ। মিঞা শব্দটোক উগ্ৰ হিন্দুত্ববাদী সকলে অসমত এটা গালিলৈ ৰূপান্তৰিত কৰিছে।মিঞা শব্দৰ প্ৰকৃত অৰ্থ অতি শুৱনি, মধুৰ। মিঞা মানে মিতিৰ, বান্ধৈ। কিন্তু বংগমূলৰ মুছলমানক মিঞা বুলি কয় বাবে মুছলমান বিদ্বেষৰ কাৰণে অসমত মিঞাক এটা গালি কৰা হ’ল। আৰু এটা কথা। মানুহে চখত খাচ মাটিত নবহে। বিপদত পৰিহে বহে। হয়, কোনো কোনোৱে মাটিৰ খকতো খাচ মাটিত বহে। মিঞাৰো এটা অংশ তেনে মানুহ আছে। বা তেওঁলোকৰ মাজত হয়তো এই প্ৰৱণতাটো বেছি। কিন্তু বেদখলী মানে বিদেশী নেকি? যদি সকলো বেদখলী বিদেশী তোমালোকে তেওঁলোকক দেশৰ পৰা বহিষ্কাৰ নকৰা কিয়? লুৰীণ জ্যোতি গগৈয়ে কি কৈছে? তেওঁ কৈছে – আপোনালোকে মিঞা বুলি নক’ব, বিদেশী বুলি কওক। একেবাৰে সঠিক কথা।
এইবাৰ তেওঁলোকে মানে হিমন্ত-বিজেপি-আৰ এচ এচ আৰু তেওঁলোকৰ সমৰ্থক সকলে ৰাউচি জুৰিছে লুৰীণ জ্যোতি আৰু জগদীশ ভূঞাই কিয় কংগ্ৰেছৰ শীৰ্ষ নেতা ৰাহুল গান্ধীক লগ কৰিব? তেওঁলোকে ছহিদৰ কথা উলিয়াইছে। তোমালোকক মই এটা কথা মনত পেলাই দিব বিচাৰিছোঁ। অসম আন্দোলন যেতিয়া মৰহি গৈছিল, হিতেশ্বৰ শইকীয়া যেতিয়া অসমৰ মুখ্যমন্ত্ৰী হৈ আছিল তেতিয়া ৰাজীৱ গান্ধীয়ে অসমীয়াৰ আবেগৰ প্ৰতি সন্মান জনাই অসম চুক্তি কৰা নাছিলনে? হিতেশ্বৰ শইকীয়াৰ চৰকাৰ ভংগ কৰি নিৰ্বাচন পাতি অগপক শাসনলৈ অহাত কোনে সহায় কৰিছিল? ৰাহুল গান্ধীৰ দেউতাক ৰাজীৱ গান্ধীয়ে নহয় জানো? কিয়, এতিয়া সেইবোৰ কথা পাহৰি যোৱা? তাৰো আগলৈ যাওঁ। বৃটিছে গ্ৰুপিঙৰ দ্বাৰা অসমক পূব পাকিস্তানত সুমাব বিচাৰিছিল। কোনে বাধা দিছিল? গোপীনাথ বৰদলৈ আৰু অসম কংগ্ৰেছে নহয়নে? আৰু তাৰ বিপৰীতে ‘কা‘ আনি কোনে পাঁচজনকৈ অসমীয়া ল’ৰাৰ প্ৰাণ ল’লে? বিজেপি-আৰ এচ এচ-এ নহয়নে? এসময়ত তোমালোকে সৰ্বভাৰতীয় ৰাজনৈতিক দলক বৰ্জন কৰিছিলা। এতিয়া তোমালোক হিন্দুত্ববাদী বিজেপি-আৰ এচ এচৰ নেগুৰ হৈছা।হিমন্তই হিতেশ্বৰ শইকীয়াৰ দিনৰ পৰা তৰুণ গগৈৰ দিনলৈ কিমান বছৰ কংগ্ৰেছত থাকিল তেতিয়া একো জগৰ নালাগিল।এতিয়া হিমন্তই ফুটনি মাৰিছে কংগ্ৰেছত হেনো তেওঁ দমত আছিল। সেই ভিডিঅ ফুটেজ এতিয়াও বিচাৰিলে পোৱা যাব, যেতিয়া হিমন্তই তৰুণ গগৈ সম্পৰ্কে কৈছিল- ‘চি এম চাৰক পুৱা লগ কৰিবলৈ যাওঁতে যদি তেওঁ হাঁহি এটা মাৰে মোৰ গোটেই দিনটোৱে ভাল লাগি থাকে।’ ছোনীয়া গান্ধীক লগ কৰি আহি হিমন্তই কি কৈছিল মোৰ এতিয়াও মনত আছে। ‘মোৰ চাগে লাক ভাল আছিল সেইকাৰণেই মই ছোনীয়াজীক লগ কৰিব পাৰিলোঁ।’ হিমন্তই কিমান বোন্দাপৰ দি ৰাহুলক লগ কৰিছিলগৈ কোনে নাজানে? এতিয়া লুৰীণ-জগদীশে গৈ ৰাহুল গান্ধীক লগ কৰা কাৰণে তেওঁলোকৰ গাত জুই লাগিছে। এই জুই লগাৰ আচল কাৰণ কি জানেনে? যোৱা বিধানসভাৰ নিৰ্বাচনত লুৰীণ-অখিল যদি কংগ্ৰেছৰ লগত থাকিলহেঁতেন অসমত অবিজেপি চৰকাৰ হ’লহেঁতেন? বিজেপি- আৰ এচ এচে অসমৰ মানুহক কেনেকৈ জ্বলাকলা খুৱাইছে মানুহে দেখি আছে। গতিকে আচল ভয় ক’ৰবাত। সেইকাৰণে বৰকৈ জাতীয়তাবাদী ফটা ঢোল বজাইছে অসমীয়াৰ জাতীয় পৰিচয় হিন্দুত্বত বিলীন কৰিব বিচৰা হিমন্তবিশ্ব শৰ্মা আৰু তেওঁৰ সাংগোপাংগো সতলে। পিছে এইবাৰ এই দালি নগলে। প্ৰকৃত অসমীয়া জাতীয়তাবাদী সকলে সেই কথা বুজি পাইছে।অসমত পৰিবৰ্তনৰ বতাহ বলিছে।
