ৰাজ্যৰ শিক্ষা ব্যৱস্থাক কেন্দ্ৰ কৰি আজি জনতা ভৱনত এক গুৰুত্বপূৰ্ণ সংবাদমেল সম্বোধন কৰে স্বাস্থ্য মন্ত্ৰী ড০ হিমন্ত বিশ্ব শৰ্মাই।
উক্ত সংবাদমেলতে ৰাজ্যৰ বিদ্যালয়-মহাবিদ্যালয়ৰ নিযুক্তি আৰু প্ৰাদেশিকীকৰণৰ ক্ষেত্ৰত গুৰুত্বপূৰ্ণ ঘোষণা কৰে মন্ত্ৰীগৰাকীয়ে।
মন্ত্ৰীগৰাকীয়ে জনোৱা অনুসৰি ৰাজ্যৰ ১৬ খন মহাবিদ্যালয়ত বিজ্ঞান শাখা প্ৰৱৰ্তন কৰাৰ সিদ্ধান্ত লোৱা হৈছে ৰাজ্য চৰকাৰৰ কেবিনেটত।
মহাবিদ্যালয়কেইখন ক্ৰমে ‘জি.এল.চি কলেজ, বিহালী কলেজ, চিলাপথাৰ কলেজ, ডিডিআৰ কলেজ, জয়া কলেজ, এছ.বি দেওৰা কলেজ, সুৰেণ দাস কলেজ, পূব কাৰ্বি আংলং কলেজ, মাইবং কলেজ, পাথাৰকান্দি কলেজ, জেংৰাইমুখ কলেজ, নগাওঁ কলেজ, বৰক্ষেত্ৰী কলেজ, ৰঙাপাৰা কলেজ, শদিয়া কলেজ, পণ্ডিত দীনদয়াল উপাধ্যায় কলেজ।‘
এই মহাবিদ্যালয়কেইখনত ২৪০ টা অধ্যাপক-অধ্যাপিকাৰ পদৰ লগতে ৮০ টা তৃতীয় আৰু চতুৰ্থ বৰ্গৰ পদ নতুনকৈ সৃষ্টি কৰা হৈছে বুলি তেওঁ সংবাদমেলত জনায়।
মন্ত্ৰীগৰাকীয়ে সদৰী কৰা মতে ‘৪৫ দিনৰ ভিতৰত নিযুক্তি প্ৰক্ৰিয়া সম্পন্ন কৰিবলৈ অনুৰোধ জনোৱা হৈছে মহাবিদ্যালয় কর্তৃপক্ষক। এইবৰ্ষতে বিজ্ঞান শাখাত যাতে নামভৰ্তি কৰিব পাৰে তাৰ প্ৰতি লক্ষ্য কৰি এসপ্তাহৰ ভিতৰত বিজ্ঞাপন দিবলৈ অনুৰোধ জনোৱা হৈছে।‘
অহা ১৫ আগষ্টৰ ভিতৰত বিদ্যালয়-মহাবিদ্যালয় প্ৰাদেশিকীকৰণ কৰা হ’ব বুলি উল্লেখ কৰি তেওঁ লগতে কয়, ‘প্ৰথমখন তালিকা ১৫ আগষ্টৰ পূৰ্বে বিত্ত বিভাগে অনুমোদন দিব কিন্তু কাৰ্য্যকৰী হ’ব ২০২০ ৰ ১ জানুৱাৰিৰ পৰা।‘
‘১৫ আগষ্টৰ ভিতৰত ১৯৭ খন হাইস্কুল, ৯ খন হায়াৰ চেকেণ্ডেৰী, ১৪৯ খন জুনিয়ৰ কলেজ বা চিনিয়ৰ চেকেণ্ডেৰী স্কুল প্ৰাদেশিকীকৰণ কৰা হ’ব। ৪১৪ গৰাকী শিক্ষক আৰু জুনিয়ৰ কলেজৰ ৯৭ গৰাকী শিক্ষকৰ পদ নতুনকৈ প্ৰাদেশিকৃত হ’ব। অৰ্থ্যাৎ মুঠ ৩,৩৫৯ মাধ্যমিক শিক্ষাত শিক্ষক-শিক্ষয়িত্ৰীৰ পদ প্ৰাদেশিকীকৰণ হ’ব। প্ৰাদেশিকীকৰণৰ অৰ্হতা আহৰণ কৰা ৬৯০ গৰাকী মহাবিদ্যালয়ৰ শিক্ষকৰ পদ প্ৰাদেশিকৃত হ’ব।‘ মন্ত্ৰীগৰাকীয়ে লগতে কয়।
ইপিনে, ৰাজ্যৰ নতুনকৈ ৩০ খন মহাবিদ্যালয় প্ৰাদেশীকৃত কৰাৰ লগতে ২৩১ টা পদ নতুনকৈ প্ৰাদেশীকৃত হ’ব বুলি তেওঁ লগতে জনায়।
ইয়াৰোপৰি ৰাজ্যৰ ১১৯ খন চাহ বাগিছাত প্ৰথমবাৰৰ বাবে হাইস্কুলৰ কাম আৰম্ভ হ’ব বুলি সদৰী কৰি মন্ত্ৰীগৰাকীয়ে লগতে জনাই কয়, ‘অহা ২ অক্টোবৰৰ দিনা এইকেইখন চাহবাগিছাত হাইস্কুল নিৰ্মাণৰ কাম আৰম্ভ কৰা হ’ব। প্ৰতিখন বিদ্যালয় নিৰ্মাণৰ বাবদ ১ কোটি ১৫ লাখ টকা ধাৰ্য কৰা হৈছে।‘
মন্ত্ৰীগৰাকীয়ে লগতে নতুন শিক্ষা নীতিৰ বাবে ৪০ জনীয়া কমিটি গঠন, চাব গ্ৰুপ গঠনৰ কথাও সদৰী কৰে।
কেনেকৈ অসমত নতুন শিক্ষানীতি প্ৰয়োগ কৰিব তাৰ বাবে জানুৱাৰি মাহত ব্লু প্ৰিন্ট অনা হ’ব।
তেওঁ কয় যে পঞ্চম শ্ৰেণীলৈকে মাতৃভাষাৰ প্ৰয়োগ হ’লে বহু লোকে শিক্ষা বিভাগৰ লগত জৰিত হৈ পৰাৰ সুযোগ লাভ কৰিব।
তদুপৰি, উচ্চ মাধ্যমিক সাৰ্বজননীন হোৱাৰ বাবে শিক্ষাৰ মানদণ্ড উন্নত হ’ব আৰু পূৰ্ণ মানৱ সম্পদলৈ ৰূপান্তৰিত হ’বলৈ ছাত্ৰ-ছাত্ৰীয়ে সুযোগ পাব বুলিও মন্ত্ৰীগৰাকীয়ে মন্তব্য কৰে।
