অসমত অতি শীঘ্ৰে শিক্ষকবিহীন বিদ্যালয় নাইকীয়া কৰা হ’ব। এই মন্তব্য শিক্ষামন্ত্ৰী ডাঃ ৰণোজ পেগুৰ ৷ বঙাইগাঁও জিলা উপায়ুক্ত কাৰ্যালয়ৰ সভাকক্ষত অনুষ্ঠিত নামনি অসম মণ্ডলৰ বঙাইগাঁও, বৰপেটা, গোৱালপাৰা আৰু ধুবুৰী জিলাৰ লগতে নৱগঠিত দক্ষিণ শালমাৰা আৰু বজালী জিলাৰ অন্তৰ্গত মাধ্যমিক শিক্ষা আৰু প্ৰাথমিক শিক্ষা বিষয়াৰ সন্মিলনত অসম চৰকাৰৰ শিক্ষামন্ত্ৰীগৰাকী উপস্থিত থাকি এই মন্তব্য কৰে ৷ সন্মিলনখনি শুভাৰম্ভ কৰি দিয়া ভাষণত শিক্ষামন্ত্ৰী ডা: পেগুৱে লগতে কয় যে যিবিলাক বিদ্যালয়ত ছাত্ৰ-ছাত্ৰী আছে, অথচ তাত থকা শিক্ষকসকলৰ অৱসৰ হোৱাৰ পিছত আৰু শিক্ষক নিযুক্ত কৰা হোৱা নাই সেইবিলাক বিদ্যালয় নিকটৱৰ্তী বিদ্যালয়ৰ লগত একত্ৰীকৰণ কৰা হ’ব।
স্কুল যিমানে ডাঙৰ হ’ব অৰ্থাৎ ছাত্ৰ-ছাত্ৰীৰ সংখ্যা যিমানে বাঢ়িব সিমানে বিদ্যালয়বিলাক শৈক্ষিক দিশত সুবিধাজনক হ’ব,পৰিচালনা কৰাতো সুবিধা হ’ব বুলি মন্ত্ৰীগৰাকীয়ে উল্লেখ কৰে। আনহাতে যুক্তিপূৰ্ণ বদলিকৰণৰ ক্ষেত্ৰতো চৰকাৰে গুৰুত্ব দিব বুলিও তেওঁ ভাষণ প্ৰসংগত উল্লেখ কৰে।কিয়নো যদিহে এগৰাকী মহিলাই নিজৰ ঘৰৰ ওচৰৰ স্কুলত শিক্ষকতা কৰাৰ সুবিধা পায় তেতিয়া তেওঁ শৈক্ষিক দিশত বেছি মনোযোগ দিব পাৰিব বা কোনো শিক্ষকে যদি বুজাবুজি কৰি নিজৰ নিজৰ ঠাইলৈ বদলি হ’ব বিচাৰে তেনেহ’লে চৰকাৰে একো বাধা নিদিয়ে আৰু সেই ক্ষেত্ৰত শিক্ষা বিষয়াসকলেও আপত্তি কৰিব নালাগে।
আনহাতে যিবিলাক স্কুলত কোনো বিষয়ৰ শিক্ষকৰ পদ যদি খালী হৈ আছে, সেইবিলাক সম্পূৰ্ণকৈ চৰকাৰক জনাবলৈ শিক্ষামন্ত্ৰী ডা:ৰণোজ পেগুৱে শিক্ষা বিষয়াসকলক নিৰ্দেশ দিয়ে যাতে খালী থকা শিক্ষকৰ পদত শিক্ষক নিযুক্ত কৰি বিদ্যালয়সমূহৰ শৈক্ষিক অগ্ৰগতি সাধন কৰিব পাৰে।তেতিয়া শিক্ষাৰ গুণগত মান উন্নত হ’ব বুলিও কয়। তদুপৰি কোন কোন শিক্ষকে কেতিয়া অৱসৰ ল’ব তাৰ হিচাপ বিস্তৃতভাৱে দিয়াটোও নিশ্চিত কৰিবলৈ বিষয়াসকলক শিক্ষামন্ত্ৰীগৰাকীয়ে নিৰ্দেশ দিয়ে।ইয়াৰ উপৰিও যিবিলাক বিদ্যালয়ৰ কেঁচাঘৰ আছিল আৰু বানত নষ্ট হৈছে ,সেই বিদ্যালয় পুনৰাই নিৰ্মাণ কৰোতে পকীঘৰ হিচাপে বনাবলৈ ব্যৱস্থা গ্ৰহণ কৰিবলৈ শিক্ষা বিষয়াসকলক মন্ত্ৰীগৰাকীয়ে নিৰ্দেশ দিয়ে।শিক্ষামন্ত্ৰী ডা:পেগুৱে ভাষণ প্ৰসংগত উল্লেখ কৰে যে বিদ্যালয়ৰ আন্তঃ গাঠনিৰ সমস্যা অহা দুবছৰৰ ভিতৰত অন্ত পেলোৱাৰ বাবে চৰকাৰে মিছন হিচাপে কাম কৰিব আৰু শিক্ষা বিষয়াসকলে তাৰ বাবে গুৰুত্বসহকাৰে কাম কৰিব লাগিব।
নৱম আৰু দশম শ্ৰেণীৰ ডিজিটেল ক্লাছ কৰাৰ ওপৰতো গুৰুত্ব আৰোপ কৰে শিক্ষামন্ত্ৰীগৰাকীয়ে। বঙাইগাঁও জিলাৰ উপায়ুক্ত নবদ্বীপ পাঠকে আদৰণি ভাষণ ৰখা সন্মিলনত মাধ্যমিক শিক্ষা বিভাগৰ সচিব ভাৰত ভূষণ দেৱ চৌধুৰীয়ে উপস্থিত থাকি জিলা পৰ্যায়ৰ শিক্ষা বিষয়াসকলক বিভিন্ন পৰামৰ্শ আগবঢ়ায়। সন্মিলনত প্ৰাথমিক শিক্ষা বিভাগৰ সচিব ড:বিজয়া চৌধুৰী, মাধ্যমিক শিক্ষা সঞ্চালক মমতা চৌধুৰী, প্ৰাথমিক শিক্ষা সঞ্চালক সুৰঞ্জনা সেনাপতি, বঙাইগাঁও জিলাৰ অতিৰিক্ত উপায়ুক্ত(শিক্ষা) শ্যামল ক্ষেত্ৰ গগৈ, বঙাইগাঁও, বৰপেটা, গোৱালপাৰা, ধুবুৰী, দক্ষিণ শালমাৰা আৰু বজালী জিলাৰ বিদ্যালয়সমূহৰ পৰিদৰ্শকসকল, জিলা প্ৰাথমিক শিক্ষা বিষয়াসকল, উপ-পৰিদৰ্শকসকল আৰু খণ্ড প্ৰাথমিক শিক্ষা বিষয়াসকল উপস্থিত থাকে। ইপিনে শিক্ষামন্ত্ৰীগৰাকীয়ে সংবাদ মাধ্যমৰ আগত কয় যে প্ৰাথমিক আৰু মাধ্যমিক বিদ্যালয়ৰ শিক্ষাৰ কিছুমান জলন্ত সমস্যা জিলা আৰু ব্লক পৰ্যায়ৰৰ বিষয়াসকলৰ লগত মুখামুখী কৈ বহি সমাধান কৰাৰ কাৰণে আমি এলনি পদক্ষেপ লৈছো ৷
আমি অসমখনক পাঁচটা মণ্ডলত ভাগ কৰি প্ৰতিটো মণ্ডলত দিনজোৰা একোখনকৈ মাণ্ডলিক সভা কৰিছো ৷ বঙাইগাঁৱত অনুষ্ঠিত এই সভাত জিলা কেইখনৰ শিক্ষা বিভাগৰ সকলো বিষয়াসকলৰ লগতে প্ৰাথমিক শিক্ষা আৰু মাধ্যমিক শিক্ষা বিভাগৰ সচিব, সঞ্চালিকা আদি আহি মুখামুখীকৈ তেওঁলোকৰ সৈতে কেইটামান বিষয় আলোচনা কৰিছো ৷ মূলত বিদ্যালয়ৰ একত্ৰীকৰণৰ যি অভিযান চলি আছে সেইটোৰ লগতে বেছ স্কুলৰ সমস্যা, জিলাৰ ভিতৰতে বদলিকৰণ প্ৰক্ৰিয়া, এজনীয়া শিক্ষকৰ সমস্যা আদি বিষয়সমূহ আলোচনা কৰা হ’ব ৷ আনহাতে শেহতীয়াভাৱে ৰাজ্য চৰকাৰৰ শিক্ষা বিভাগে সাংবাদিকতাৰ সৈতে জড়িত এজন শিক্ষকক ইতিমধ্যে নিলম্বন কৰা তথা যিসকল শিক্ষকে শিক্ষকতাৰ বাহিৰেও সাংবাদিকতা , এল আই চিৰ এজেণ্ট আৰু আন বৃত্তিৰ সৈতে জড়িত আছে তেওঁলোককো চাকৰিৰ পৰা নিলম্বন কৰাৰ প্ৰক্ৰিয়া অব্যাহত থাকিব নেকি বুলি সাংবাদিকে সোধাত শিক্ষামন্ত্ৰী ডাঃ পেগুৱে কয় যে চাকৰিৰ পৰা নিলম্বনটো সমস্যাৰ সমাধান নহয় ৷ মই সকলো শিক্ষক – শিক্ষয়িত্ৰীক আগবাঢ়ি আহি স্বইচ্ছাই যদি তেওঁলোকে শিক্ষকতাৰ বৃত্তিটোত থাকিব বিচাৰিছে তেতিয়াহলে অন্য লাভজনক বৃত্তি য’ত দৰমহা আদি জড়িত হৈ থাকে সেয়া এৰি দিবলৈ আহ্বান জনালো ৷
কাৰণ দুটা দৰমহা কেনেকৈ লয় ? সেয়ে মই দুটাৰ এটা এৰি দি একাগ্ৰতা আৰু নিষ্ঠাৰে তেওঁলোকক শিক্ষকতা কৰি যাবলৈকো আহ্বান জনায় ৷ তেওঁ লগতে কয় যে শিক্ষক এজনৰ পৰিয়ালে কি ব্যৱসায় কৰে বা পৰিয়ালৰ যদি কিবা ব্যৱসায় আছে তেতিয়াহলে তাত তেওঁৰ অৱদান থাকিব পাৰে ৷ সেইবিলাকত আমি চৰকাৰ নোসোমাও বুলিও কয় ৷
