অন্ধ্ৰ প্ৰদেশৰ বিশাখাপট্টনমৰ এটা তীখা কাৰখানাত মৰ্মান্তিক দুৰ্ঘটনা সংঘটিত হৈছে। ১৬০০ ডিগ্ৰী উষ্ণতাত গলিত লোহাৰ সংস্পৰ্শলৈ আহি মৃত্যু হয় ৮ জন শ্ৰমিকৰ। এই ঘটনাত আন বহু শ্ৰমিক আহত হয়। সোমবাৰে নিশা অজানিতে সংঘটিত হয় এই ভয়ংকৰ দুৰ্ঘটনা। আহতসকলক চিকিৎসাৰ বাবে চিকিৎসালয়ত ভৰ্তি কৰোৱা হৈছে।
জানিব পৰা মতে, সোমবাৰে নিশা কামৰ সময়ত গলিত লোহাৰ বৃহৎ বাল্টি এটা ক্ৰেনেৰে এঠাইৰ পৰা আন ঠাইলৈ লৈ যোৱা হৈছিল। সেই সময়ত ১৬০০ ডিগ্ৰী চেলছিয়াছ উষ্ণতাত গলিত লোহা নিয়ন্ত্ৰণ হেৰুৱাই তলৰ সেই শ্ৰমিকৰ ওপৰত পৰিল। থিতাতে মৃত্যু হয় ৮ জনৰ। ওচৰতে থিয় হৈ থকা আৰু বহু শ্ৰমিক আহত হয়।
দুৰ্ঘটনাটোৰ খবৰ পোৱাৰ পিছতে উদ্ধাৰকাৰী দল ক্ষীপ্ৰতাৰে সেই স্থানত উপস্থিত হয়। আহতসকলক উদ্ধাৰ কৰি চিকিৎসালয়লৈ লৈ যোৱা হয়। কাৰখানাৰ বিষয়াসকলে জনোৱা মতে, দুৰ্ঘটনাটো কাৰিকৰী ত্ৰুটিৰ বাবেই হৈছে নে সুৰক্ষাৰ উলংঘাৰ বাবেই হৈছে তাৰ তদন্ত কৰি আছে।
অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৱে এই দুৰ্ঘটনাক লৈ শোক প্ৰকাশ কৰে। তেওঁ ৰাজ্যৰ গৃহমন্ত্ৰী, বিশাখাপট্টনম জিলা দণ্ডাধীশ আৰু আৰক্ষী অধীক্ষকক ফোন কৰি দুৰ্ঘটনা সন্দৰ্ভত সোধা-পোছা কৰে। আহতসকলৰ চিকিৎসাৰ ক্ষেত্ৰত কোনো ধৰণৰ গাফিলতি নকৰিবলৈ তেওঁ নিৰ্দেশ দিছে। তেওঁ লগতে মৃতকৰ পৰিয়ালক ২ লাখ টকাকৈ ক্ষতিপূৰণ দিয়াৰ কথাও ঘোষণা কৰিছে।
প্ৰধানমন্ত্ৰী নৰেন্দ্ৰ মোদীয়েও এই দুৰ্ঘটনাক লৈ গভীৰ শোক প্ৰকাশ কৰিছে। ছ’চিয়েল মিডিয়াত মৃতকৰ প্ৰতি শোক প্ৰকাশ কৰি তেওঁ মৃতকৰ পৰিয়াললৈ ২ লাখ টকাকৈ আৰু আহতসকলক ৫০ হাজাৰকৈ আৰ্থিক সাহায্য প্ৰদান কৰাৰ কথা ঘোষণা কৰে।
