দেশৰ ভিতৰতে মহিলাৰ বিৰুদ্ধে আটাইতকৈ বেছি অপৰাধ সংঘটিত হোৱা ৰাজ্য হিচাপে পৰিগণিত হোৱা উত্তৰ প্ৰদেশত পুনৰ সংঘটিত হৈছে শিশু ধৰ্ষণৰ দৰে লজ্জাজনক কাণ্ড। ৰাজ্যখনৰ মথুৰা জিলাত এটি আঠ বছৰীয়া শিশুক বলাৎকাৰ কৰাৰ অভিযোগ উঠিছে এগৰাকী ৬০ বছৰীয়া বৃদ্ধৰ বিৰুদ্ধে।
কেৱল সিমানেই নহয়, ধৰ্ষণৰ পিছত শিশুটিৰ যৌনাঙ্গত মমবাতি সোমোৱাই অমানুষিক অত্যাচাৰ কৰা বুলিও অভিযুক্ত ব্যক্তিগৰাকীৰ বিৰুদ্ধে অভিযোগ উত্থাপিত হৈছে। অভিযুক্ত ব্যক্তিগৰাকীক প্যাৰেলাল বুলি চিনাক্ত কৰা হৈছে।
অভিযুক্ত প্যাৰেলালে কন্যা শিশুটিক সোমবাৰে সন্ধিয়া প্ৰলোভিত কৰি নিজৰ ঘৰলৈ লৈ আহে আৰু তাৰ পিছতে শিশুটিক যৌন আতিশয্য চলায়। পৰৱৰ্তী সময়ত, দুৰ্বৃত্ত গৰাকীয়ে শিশুটিৰ গোপন অঙ্গত মমবাতি সোমোৱাই দিয়ে বুলি এগৰাকী আৰক্ষী বিষয়াই জানিবলৈ দিয়ে।
ইফালে ধৰ্ষণৰ পিছত শিশুটিয়ে কান্দি কান্দি ঘৰলৈ যায় আৰু পৰিয়ালৰ সদস্যসকলক সমগ্ৰ ঘটনাৰ বিষয়ে অৱগত কৰে। শিশুটিৰ পৰা ঘটনাৰ বিষয়ে জানিব পাৰি অভিভাৱকে এক অভিযোগ দাখিল কৰে।
এই অভিযোগৰ আধাৰত আৰক্ষীয়ে অভিযুক্ত প্যাৰেলালৰ বিৰুদ্ধে ভাৰতীয় দণ্ডবিধিৰ ধাৰা ৩৭৬ (ধৰ্ষণ)ৰ লগতে যৌন অপৰাধৰ পৰা শিশুৰ সুৰক্ষা আইনৰ অধীনত এক গোচৰ ৰুজু কৰে।
ইফালে গোচৰ ৰুজু কৰা হৈছে বুলি জানিব পৰাৰ পিছতে অভিযুক্ত প্যাৰেলালে বিহ সেৱন কৰি আত্মহত্যাৰ চেষ্টা চলায়। আৰক্ষীয়ে প্যাৰেলালক গ্ৰেপ্তাৰৰ উদ্দেশ্যে তেওঁৰ ঘৰলৈ যোৱাৰ সময়ত সংকটজনক অৱস্থাত তেওঁক উদ্ধাৰ কৰে আৰু লগে লগে এখন চিকিৎসালয়ত ভৰ্তি কৰে।
অৱশ্যে অভিযুক্ত প্যাৰেলাল বৰ্তমান বিপদমুক্ত বুলি আৰক্ষীয়ে জানিবলৈ দিছে। আনহাতে ধৰ্ষিতা শিশুটিক চিকিৎসা পৰীক্ষাৰ বাবে প্ৰেৰণ কৰা হৈছে বুলি বিষয়াগৰাকীয়ে লগতে কয়।