বিদ্যুতৰ বিলক লৈ অসন্তুষ্টিৰ বিষয়টো প্ৰায়েই বাতৰি হোৱা দেখা যায়। কিন্তু সেয়া যদি দেখি চকু কপালত উঠা ধৰণৰ হয়? কি ঘটিব পাৰে তেনে গছত গৰু উঠাৰ দৰে এক বিশ্বাস কৰিব নোৱাৰা সংখ্যাৰ বিল যদি কাৰোবাৰ ওচৰলৈ আহে।
গণপত নায়কৰ দৰে অশীতিপৰ বৃদ্ধগৰাকীৰ ক্ষেত্ৰতো ঘটিল এনে এক কাণ্ড। অলপ অচৰপ ডাঙৰ সংখ্যাৰ বিল নহয়, একেবাৰে চকুকে বিশ্বাস কৰিব নোৱাৰা এখন ৮০কোটি টকাৰ বিদ্যুতৰ বিল!
বিলখন দেখা মাত্ৰকে বজ্ৰপাত পৰা মানুহৰ দৰে থৰ হৈ পৰে গণপত নায়ক। লগে লগে বৃদ্ধি পায় তেওঁৰ ৰক্তচাপ। তেওঁৰ অৱস্থা দেখি ততাতয়াকৈ তেওঁ হাস্পাতলত ভৰ্তি কৰা হয়।
মহাৰাষ্ট্ৰৰ নালা ছোপাৰাৰ বাসিন্দা বৃদ্ধগৰাকী অৱশ্যেই ধনী ব্যক্তি। ধান কলৰ মালিক গণপতৰ বাবে তথাপিও কিন্তু এনে এক অদ্ভুত বিদ্যুৎ বিলৰ সন্মুখীন হোৱাটো সম্ভৱ নহয়। তদুপৰি, তেওঁ আছিল এগৰাকী হৃদৰোগী।
এনে অৱস্থাত তেওঁৰ শৰীৰত কঁপনি উঠে। পৰিয়ালৰ লোকে লগে লগে তেওঁক হাস্পাতললৈ লৈ যায়। গণপতৰ নাতিয়েক নীৰজেও বিলখন দেখি স্তম্ভিত হৈ পৰে।
নীৰজে কয়,’’আমি সকলোৱে তেতিয়া ধানকলতেই আছিলো। বিলখন দেখি প্ৰথমতে ভাৱ হৈছিল গোটেই জিলাখনৰ বিল এইখন। কিন্তু ভালকৈ চোৱাৰ পাছত বুজিব পাৰো যে সেই আমাৰেই বিল। লকডাউনৰ সময়ত মিটাৰ ৰিডিঙৰ সমস্যাৰ বাবে বহুসময়ত অধিক টকাৰ বিল আহিছে। আমি ভয় খাইছিলো ইলেকট্ৰিচিটি বোৰ্ডে বোধহয় বকেয়া বিল পঠিয়াই দিছে।‘’
কিন্তু তথাপিও ইমান টকা? এয়া যে কল্পনাৰো বাহিৰত। তেনেহ’লে এয়া কি? সকলোকে চিন্তিত কৰি তুলিছিল বিলখনে।
অৱশেষত ইলেকট্ৰিচিটি বোৰ্ডে বিলখন ভুল হোৱাৰ কথা স্বীকাৰ কৰি জানিবলৈ দিয়ে, ‘’যিটো এজেন্সিয়ে বিল বনাইছে তেওঁলোকে ৬ টা অংকৰ ঠাইত ৯টা অংকৰ বিল বনাইছে। তাতেই গোলমালটো লাগিল। পাছত আমি বিষয়টো বিতংভাৱে চাই ভুলটো ধৰিব পাৰিছো।‘’
তাৰপাছত নতুন বিল পঠিওৱা হৈছে গণপত নায়কৰ পৰিয়াললৈ। সেয়া পোৱাৰ পাছত স্বস্তি লাভ কৰিছে পৰিয়ালটোৱে। গণপততৰ ৰক্তচাপো স্বাভাৱিক অৱস্থালৈ আহিছে।
